1Roboam, Salomón taɨ ojo Siquem pe, echa opaete Israel iñemuña reta yogüeru Siquem pe oñono vaerä mburuvicha guasurä.
2Jare Jeroboam, Nabat taɨ oendu kuae regua, Egipto pe vɨteriño oï yave, echa otekuarai jokotɨ mburuvicha guasu Salomón güi; jare Egipto pe oñemoëta,
3omondo reta oenɨiuka. Jare ou Jeroboam; jae jare opaete Israel iñemuña reta ndive omomiari reta Roboam, jei reve:
4—Nderugüe ombojeiete yae ko oreve iporookuai, ërei añave nde embovevɨi mí kërai yepe oreve nderugüe oñono oreve vae, jare toroyeokuai ndeve.
5Jare jae jei:
—Pekua, jare kuae güi mboapɨ araa pe peyu ye chekotɨ.
Jare tëta pegua reta opa yogüɨraja,
6jayave mburuvicha guasu Roboam oiporu yemboarakuaa tenondegua reta pe, tu Salomón oimeño oikove yave yogüɨrekose jóvai vae reta pe, jare jei:
—¿Mbae pa pere pe reta, jae vaerä kuae tëta pegua reta pe?
7Jare jae reta omomiari jei reve:
—Añave nde reyapo yave kuae tëta oiporu ndeve vae, jare ñee kavi rupi remomiari reta yave, jae reta oyeokuaita ko ndeve jekuae avei pegua.
8Ërei ngatu, jae oeya tenondegua reta yemboarakuaa omee tëi chupe vae, jare oiporu taɨrusu vae reta iporomboarakuaa, iyaveigua jae ndive okuakuaa vae reta, iyɨvɨrigua reta pe.
9Jare jei chupe reta:
—¿Mbae pa pe reta chemboarakuaa jae vaerä kuae tëta pegua reta pe? Echa chemomiari reta, jei reta cheve: Kërai yepe embovevɨi oreve nderu mborookuai ipoɨ yae oñono oreve vae.
10Jayave jókuae iyaveigua taɨrusu vae reta, jae ndive okuakuaa vae reta, jei chupe:
—Körai ere kuae tëta pegua reta jei ndeve vae pe: Nderu ombojeiete yae ko oreve iporookuai, ërei nde embovevɨi mí kërai yepe oreve; körai emomiari reta: “Chepoäka raɨ imbaepuere yae ko cheru imbaepuere güi.
11Mase añave, cheru pembovoɨta mborookuai ipoɨ yae vae pe, ërei che amoïru eteta ko peve; cheru penupa tɨmasa pe, ërei che ponupata mbae jasɨ yae vae pe.”
12Mboapɨa ara pe ou Jeroboam opaete tëta pegua reta ndive Roboam jóvai: “Peyu ye chekotɨ mboapɨa ara pe”, jei chupe reta rami.
13Jare mburuvicha guasu jei iyarasɨ reve tëta pegua reta pe, osɨrɨ tenondegua reta yemboarakuaa omee tëi chupe vae güi;
14jare imiari chupe reta, taɨrusu vae reta omboarakuaa rami, jei reve: Cheru ombojeiete yae ko peve iporookuai, ërei che jeieteta amoïru peve mborookuai. Cheru oiporarauka peve tɨmasa pe, ërei che aiporaraukata peve mbae jasɨ yae ete vae pe.
15Jare mburuvicha guasu mbaetɨ oyeapɨsaka opaete vae re; echa yandeYa jei jökoraita ko vae, iñee oyembopo vaerä Ahías Silo pegua rupi jei Jeroboam, Nabat taɨ pe vae.
16Jare opaete tëta pegua reta oecha mburuvicha guasu mbaetɨ oendu chupe reta yave, jei reta chupe kuae ñee:
“¡Mbaetɨ etei ko mbae rogüɨnoi David re!
¡Mbaetɨ etei ko rogüɨnoi mbae ave Isaí taɨ re!
¡Israel iñemuña reta, pekua pero ae ae kotɨ!
¡David iñemuña reta, toyangareko iyé aeño!”
Jayave Israel iñemuña reta ñavo yogüɨraja jo ae ae kotɨ.
17Roboam oï mburuvicha guasurä Israel iñemuña reta yogüɨreko tëta guasu reta Judá pegua pe vae reta re.
18Jare mburuvicha guasu Roboam omondo Adoram okovara vaerä mburuvicha peguarä; ërei Israel iñemuña reta oyapi oyuka ita pe. Jayave mburuvicha guasu Roboam jaɨai oyeupi metei käretou pe jare otekuarai Jerusalén kotɨ.
19Jökorai Israel osɨrɨ David iñemuña reta güi añave regua.
20Jare opaete Israel iñemuña reta oikuaa Jeroboam ou ye ma yave, omondo reta oenɨiuka ipɨte pe, jare oñono mburuvicha guasurä opaete Israel iñemuña reta re, opɨtambae reve metei ave ñemuña David iñemuña reta ndive, jaeño Judá iñemuña reta.
21Roboam ou oväe Jerusalén pe yave, omboatɨ ciento ochenta mil kuimbae ñeraro regua oyeparavogüe opaete Judá jare Benjamín iñemuña pegua reta, oñeraro reta vaerä jëtara Israel iñemuña reta ndive, jökorai opa ye vaerä güeru Roboam, Salomón taɨ iporookuaía pe.
22Ërei yandeYa imiari iñeemombeúa Semaías pe, jei reve:
23“Nemiari Roboam, Salomón taɨ pe, mburuvicha guasu Judá pegua pe, jare opaete Judá jare Benjamín iñemuña reta pe, jare opaete tëta reta pe,
24agüɨye vaerä oñeraro reta jëtara Israel iñemuña reta reta ndive. Opa ye toyogüɨraja jëta jëta ae rupi, echa, che ko ayapo kuae oasa vaerä.”
Oendu reta Tumpa jeigüe yave, opa yogüɨraja ye, yandeYa jei chupe reta rami.
Jeroboam iyoa25Jayave Jeroboam omopüa pɨau ye tëta Siquem ɨvɨtɨ Efraín re, jare oiko pɨpe; jare oë joko güi, jare omopüa pɨau ye tëta Penuel.
26Jare jei ipɨa pe: “Güɨramoi mborookuaía ojo yeta David iñemuña reta ipo pe,
27echa kuae tëta yogüɨraja ye omee mɨmba oyeyukagüe Tumpa pe Jerusalén pe yave, ipɨa oï yeta mburuvicha guasu Roboam, Judá pegua kotɨ, jare cheyuka retata; jökorai oyerova reta yeta Roboam mburuvicha guasu Judá pegua kotɨ.”
28Jare oyemongeta reta ma kuae re yemboatɨa pe ramo, mburuvicha guasu oyapouka mókoi toro taɨrusu iä oro pegua, jare jei opaete vae pe: “Pe Israel iñemuña reta, peo mbateeiño ma Jerusalén kotɨ; ko oï petumpa reta, kuae reta ko perenoe pereru EgiptoEx 32.4. güi.”
29Jare metei oñono tëta Bet-el pe, jare ïru tëta Dan pe.
30Jare kuae jeko pegua oime mbaeyoa; echa tëta pegua reta yogüɨraja omboete Dan pe oï vae.
31Jare oyapouka vi mbaemboete renda ɨvɨtɨ ñavo re, jare oñonouka sacerdoterä tëta pegua reta ipɨte güi, Leví iñemuña peguambae vae güi.
32Ombojee vi oyeapo vaerä metei arete ikavi yae vae quince ara juri yasɨa pe, Judá pe arete ikavi yae vae oyeapo rami, jare jae etei omee mɨmba oyeyukagüe, mɨmba oyeyuka oyeapɨ jese vae re. Oyapo Bet-el pe, omee mɨmba oyeyukagüe toro taɨrusu iä oyapogüe pe. Jókuae mbaemboete renda oyapoa pe ombojee vi sacerdote retarä.
33Jökorai jókuae ara quince ara yasɨ juría pe, Jeroboam omee mɨmba oyeyukagüe, mɨmba oyeyuka oyeapɨ jese vae re, jókuae oyapo Bet-el pe vae pe. Kuae jae yasɨ arete pegua jae iyemongeta ae rupiLv 23.33-34. oyapo vae, oyapo arete Israel iñemuña reta peguarä. Jókuae yasɨ oyeupi reta oapɨ ikäti kavi vae incienso.
Who We AreWhat We EelieveWhat We Do
2025 by iamachristian.org,Inc All rights reserved.
