TOBIT 1 - Guarani Bible with DC

Yemongeta ipɨ

1Kuae jae ko arakae Tobit oiko vae regua. Tobit jae Tobiel taɨ jae ko Ananiel iñemuña jare Anduel jare Gabael güi, Rafael güi jare Ragüel güi jae reta yogüeru Jahseel güi, Neftalí iñemuña reta güi.

2Salmanasar oiko mburuvicha guasurä Asiria pe yave, Tobit oyererajauka tembiokuairä Tisbe güi, jae ko tëta raɨ oï Galilea tuicha vae pe vae, Cedes Neftalí güi opɨta arayevɨ kotɨ vae, Hasor güi ɨvate kotɨ, kuaraɨ oikea kotɨ, jare Sefat güi ɨvɨtuguasu kotɨ.

Tobit oyemombo oiko yave vae

3Che, Tobit, aechauka aiko chereko ikavi vae jare mboromboete pegua opaete ara aiko vae pe. Ayapo jeta mbaravɨkɨ mborerekua pegua cherëtara rupi jare cherëtaɨgua reta pe cheavei oyemombouka reta Asiria kotɨ, Nínive tëtaguasu pe oiko vae reta pe.

4Chetaɨrusu aiko yave jare aikose cheɨvɨ pe, Israel pe, opaete Neftalí iñemuña reta, jare che joko güi aë vi, opa osɨrɨ reta David iñemuña reta güi jare Jerusalén güi. Ërei, Jerusalén ko tëta oyeparavo ñomai opaete Israel reta peguarä joko pe jae reta güɨrökuavee vaerä Tumpa pe mɨmba reta oyeyukagüe. Joko pe oñemopüa tupao Tumpa oiko vaerä pɨpe vae jare oñererökuavee ko oiko avei vaerä Tumpa imbaerä.

5Opaete Galilea pe ɨvɨtɨ reta rupi, opaete cherëtara reta, jare Neftalí iñemuña reta jare jae reta iñemuña ko che, jae reta omee mbota guaka raɨ iä Jeroboam, Israel ruvicha guasu, oyapouka Dan pe vae pe.

6Jaema, che ñoete ko arete ñavo aja Jerusalén pe, mborookuai jei rami opaete Israel-ɨgua pe. Che räriño ko aja Jerusalén kotɨ araja vaerä tenonde mbae yagüɨye cheve vae, cherɨmba imembɨrɨpɨ jare payandepo guaka güi, metei vae jaeramiño vi vecharaa tenondegua oyeekɨgüe vae.

7Jare araja amee pai reta pe, Aarón iñemuña reta pe, opaete oyeporu vaerä mbota renda pe. Jare amee vi levita reta pe tupao re Jerusalén pe oyangareko vae reta pe, payandepo güi metei, chevino, chetrigo, asaite, granada jare ɨva opaete mbaagüɨye reta güi. Jare ïru payandepo vae vi año ñavo amee, jaema jókuae ova ñavo rupi araja amongata aiko Jerusalén pe.

8Jare mboapɨ payandepo güi metei payandepo mboapɨ año ñavo opa amboyao yao tɨ̈reɨ reta pe, jare imemano vae reta pe jare kuaeɨguambae reta opa oyepoepɨ yande oporogüɨrovia pe vae reta pe echa jae reta oñeñono metei rami oiko vaerä Israel-ɨgua reta ndive. Jaema jókuae payandepo yemboyao vae güi metei aekɨ vae peko royapo arete, Moisés iporookuai pe jei rami jare cheyarɨ Débora jökorai vi jei cheve, jae ko cheru ichɨ ma, jare cheru omano jeko pegua ko che aiko tɨ̈reɨrä.

9Jare ojo akuakuaa ma yave, areko metei chekuña, Ana jee vae. Jae metei amomembɨ, jare ambojee Tobías pe.

10Jaema chereraja reta tembiokuairä Asiria kotɨ yave, aja aväe Nínive pe. Aecha opaete cherëtara reta jare ïru Israel-ɨgua reta jou tembíu tumpa-raanga re omboete vae reta jembíu.

11Ërei, che, mbaetɨ jau jare ayeandu reve aiko.

12Jare ayembojupi avei aiko chepɨa reve Tumpa kotɨ,

13jaema Tumpa ara pe oï vae omee mburuvicha guasu Salmanasar pe omae kavi vaerä cheré, jare cheñono tembíu agua vaerä aiko chupe.

14Aja tëta Media jee vae pe ambaegua vaerä chupe. Jare jökorai aiko tuvicha guasu omano regua. Jare Ragues Media pegua pe metei vese aeya tresciento treinta kilo korepoti, oñovatu vaerä cheve, cherëtara, Gabael jae ko, Gabrí taɨ.

15Jare Salmanasar omano yave, opɨta jekovia pe taɨ Senaquerib. Jaema joko güi tape Media kotɨ yaja vae yavai ma oyeapo, jaema mbaetɨ ma aja ye jókuae tëta kotɨ.

Tobit iparavɨkɨ mboroaɨu pegua vae

16Salmanasar oiko yave jeta amborɨ mbaravɨkɨ ikavigüe pe Israel pegua reta.

17Cherembíu amboyao yɨmbɨaɨ oiporara vae reta pe, cheremimonde amee mbaetɨ güɨnoi vae reta pe. Jare Israel-ɨgua omano yave jetegüe oyemombo ko Nínive ikësea ikupe kotɨ, jare che aecha yave, aja añotɨ.

18Jare Senaquerib ñee ikavimbae vae jei Tumpa kotɨ yave, jae ko Mburuvicha guasu ɨvategua kotɨgua, jare jae iyarasɨ ou jese jare oë otekuarai Judea güi, jare iyarasɨ jeko pegua jeta oyuka Israel-ɨgua reta. Ërei che aja añotɨ reta. Añomi jëogüegüe jare opa añotɨ. Jare Senaquerib oeka tëi yave, mbaetɨ ma oväe chupe.

19Jare metei Niniveɨgua ojo omombeu mburuvicha guasu pe che ko opa añotɨ vae, jare che añemi chugüi. Aikuaa ma mburuvicha guasu oikuaa ma cheregua yave, echa chereeka cheyuka vaerä, ou akɨɨye jare atekuarai chugüi.

20Jare opaetei mbae opɨ̈ro reta chegüi, jare opa reta güɨraja mburuvicha guasu pe. Jaeño ma oeya reta cheve cherembireko Ana jare cheraɨ Tobías.

21Jare jókuae ndei ave cuarenta ara oasa yave Senaquerib oyeyukauka mókoi taɨ reta pe, jare opa otekuarai reta ɨvɨtɨ Ararat kotɨ. Jare Senaquerib jekovia pe opɨta mburuvicha guasurä taɨ Asarhadón jee vae, jare jae oyókuai Ajicar, cherɨkeɨ Anael taɨ, jae oyangareko vaerä opaete kuatía reta tëta pegua re, jaema Ajicar oï opaete mbae re oyangareko vaerä ma.

22Jaema jayave Ajicar oñemoe cheré, jare jókuae jeko pegua aja ye Nínive pe. Echa ko Senaquerib oiko mburuvicha guasurä Asiria pe yave, Ajicar jayave oiko tembíu iyapoa reta tenondeguarä, jare mburuvicha isello iñovatuarä, jare opaete mbae re oyangareko vaerä, jare Asarhadón omee ye chupe jókuae mbaravɨkɨ, Ajicar ko cherëtara cheriɨ ko.