ECLESIÁSTICO 31 - Guarani Bible with DC

Mbaravete jare mbaeyekou

1-2Oke katumbae vae ko oikokatu vae ombopɨtu;

yemoambeko tembíu re vae oporombojopeɨä ko;

má ko jasɨkatu mbaerasɨ jeiete vae güi; mbaetɨ ko omaeño yake.

3Oikokatu vae oyemoambeko omboatɨ vaerä mbaeyekou,

jare oputuu yave jese oyekouta oï.

4Paravete vae jëta pe mbae oata vae re oyemoambeko,

jare oputuu ma oï yave opaete mbae oata oï chupe.

5Kia ojo oro oeka vae mbaetɨta ko opɨta jeko mbae,

jare kia ñavo oaɨu korepoti vae oyembojopata ko jese.

6Jeta vae ko opɨta oyepokua oro re vae,

jaema oñono reta ipɨa mbae jepɨ vae re.

7Kuae mbae reta metei tavɨ ko yarakuaambae pegua,

jaema opaete ko iyarakuaambae reta oa pɨpe.

8¡Oyerovia katu ko jeko reve kavi oiko vae

jare mbaetɨ osɨi mbaeyekou jaɨkue!

9¿Kia pa jae? Yaja yamboyerovia,

echa oyapo mbae oporomopɨakañɨ vae japicha ipɨte pe.

10Güɨreko mbaeyekou jare oiko avei jokoreve,

jókuae jae ko yemboete ma chupegua.

Ipuere jopa viña, ërei mbaetɨ;

ipuere ikavimbae oyapo viña, ërei mbae oipota.

11Jókuae ramo imbaeyekou jaema täta oï

jare tëta reta omboeteta ko.

Mborookuai reta yomboete pegua

12Cheraɨ michi, oparea reta ndeve rekaru vaerä tuichagüe reta ndive yave,

agüɨye ekua yɨmbɨaɨ jeko peguaño,

jare agüɨye ere: “¡Tataɨ mbae jeta vae re!”

13Nemaendúa katu mbae ipota mbae ikavimbae vae ko.

Tumpa güɨröɨro yae ko tesa imbaepota vae;

Tumpa mbaetɨ yé ko mbae má pɨ̈chɨi tesa güi vae oyapo.

Oipotagüe mbae tesa pe, oyemboɨpɨ

jaema jaɨkue rupi tesaɨ osɨrɨrɨ tovape rupi.

14Kia ïru vae omaea kotɨ agüɨye nde ndepopuku,

agüɨye vaerä pepo perokua oyoe ñae pe.

15Eyomboete nerëta-ɨpɨ pegua ndive nde reyemboete rami;

eyemongeta opaete ndeve ipöra mbae vae re.

16Ei mesa iárambo mboupa rami,

jare agüɨye epoko voi agüɨye vaerä reñemotareɨuka.

17Ndeporomboete kavi jeko pegua nde räri opa ekaru;

jare agüɨye embosururu reugüe agüɨye vaerä nerenoti reta.

18Jare yepe ei mesa pe jeta vae ipɨte pe,

agüɨye ndepopuku nde räri ndeɨpɨ pe oï vae güi.

19¡Mbae mbovɨ vae jeta yae ma metei kuimbae iporomboete vae pe!

Echa jökorai yave ngaraa ipɨtupa kuri jupa pe.

20Kia oasa ete okaru vae jasɨta ko mbae chupe,

jopeɨ potaä, ipɨa-tïɨta, iyarasɨta jare jova ambuaeta.

Ërei ngatu, kia okaru mboki kavi vae opaɨu kavi yaeta

jare ndeimbove yave opüata iñäka jaekavita.

21Reipota oasa ete rekaru yave,

epüa ekua jare egüëe, jaema reï kavi yeta.

22Eyeapɨsaka cheré cheraɨ, jare eyapo jaegüe;

kuri reikuaata mbae jae ndeve vae.

Opaete mbae reyapo yave eiko mboki

jaema ngaraa maratu reiko.

23Ipɨakavi vae oporomongaru yave opaete vae ko omboete;

ɨma yae ko jërakua kavita oiko.

24Käteɨ vae oporomongaru yave tesa pe ko imiari kavi potaä jese vae;

jare ɨmata ko jökorai jërakua oiko.

25Agüɨye ndekuimbae eyeapo vino reu rei yave,

echa jókuae iúa jeta ko oipɨaka vae.

26Horno pe ko oñejäa mbaerɨru jiero pegua,

jare vino pe ko oñejäa oyembotuicha vae reta.

27Vino jae ko tekove kuimbae pe,

jare oɨu mbegüe kavi jese.

¿Kërai ya oiko vino mbaetɨa pe vae?

Iyɨpɨ güive oyeapo yerovia omee vaerä.

28Yerovia yandepɨa peguarä,

mbaeyekou jare pɨakatu:

Jökorai ko vino iara pe kavi oyeu yave

jare mboki pe kavi vae.

29Äka-rasɨ, mbochɨ jare yemboetembae;

jókuae jae ko vino oyeu oyúe reve jare ikɨ̈reɨ reve vae.

30Oporombosavaɨpo vae jeta ete yave tavɨ ko yarakuaambae pegua;

oporomoëogüe jare oporombopere vi.

31Kia ñavo jou oï yave, agüɨye emboeta chupe;

agüɨye emboarasɨuka oyerovia oï ramboeve;

jare ani ejäa chupe ñee yemboarasɨ pegua,

ani ramo agüɨye eeka tekorai chupe kia reta jovake.