NÚMEROS 7 - Guarani Bible with DC

Mbota reta oñeñono tee vaerä tupao guakapi pegua jare mɨmba oyeyuka oyeapɨ jese vae

1Moisés opa ma omopüa tupao guakapi pegua yave, oñapiramo olivo iasaite pe oñono tee vaerä Tumpa peguarä, opaete pɨpegua tembiporu reta ndive, jaeramiño vi mɨmba oyeyuka oyeapɨ jese vae oñapiramo olivo iasaite pe oñono tee vaerä, opaete jembiporu reta ndive,

2jayave opaete Israel iñemuña juvicha reta, metei tu ñavo rupi tenondeguarä ñogüɨnoi vae reta, jókuae oporomborɨ oporopapa vae reta omee mbota,

3güeru reta mbota yandeYa jóvai, ova käretou jo reve vae, jare doce güeye; mókoi mburuvicha ñavo re metei käretou, jare iñavo metei güeye; jare omee reta tupao guakapi pegua jóvai.

4Jayave yandeYa jei Moisés pe:

5“Eipɨɨ chugüi reta jókuae käretou reta jare güeye reta, toï tupao guakapi pegua pe oyeporu vaerä; emee Leví iñemuña reta oiporu vaerä, iparavɨkɨrä oñemee rupi.”

6Jayave Moisés oipɨɨ jókuae käretou reta jare güeye reta, jare omee Leví iñemuña reta pe.

7Gersón iñemuña reta pe omee mókoi käretou jare irundɨ güeye, iparavɨkɨrä oñemee rupi,

8Merari iñemuña reta pe omee irundɨ käretou jare juri güeye, iparavɨkɨrä oñemee rupi; Itamar, sacerdote Aarón taɨ oyókuai rupi.

9Ërei Coat iñemuña reta pe mbaetɨ omee käretou jare güeye, echa iyatiɨ re ko güɨroata retata ivoɨta o mbaemboetea pegua.

10Jare mɨmba oyeyuka oyeapɨ jese vae oñono tee Tumpa pe vaerä yave, tenondegua reta güeru mbota, mɨmba oyeyuka oyeapɨ jese vae jóvai.

11Jayave yandeYa jei Moisés pe: “Mɨmba oyeyuka oyeapɨ jese vae oñeñono tee vaerä cheve yave, ara ñavo metei tenondegua tomee mbota, jare pɨareve pe tomee ïru vae.”

12Jare tenondegua ara pe omee mbota vae, jae ko Naasón, Aminadab taɨ, Judá iñemuña pegua.

13Mbota güerugüe jae ko, metei ñae korepoti pegua, ipoɨgüe metei kilo y medio jare metei tasa guasu, ipoɨgüe seteciento setenta gramo, o mbaemboetea pe korepoti ipoɨ oñejäa rami; jare jókuae ñae jare tasa guasu tɨnɨe güeru trigokúi ipɨuasɨ vae olivo iasaite pe oyemómbɨu vae mbotarä;

14jare metei kuchara guasu oro pegua, ipoɨgüe ciento diez gramo vae, tɨnɨe ikäti kavi vae incienso;

15jare metei toro taɨrusu vae, metei vecha kuimbae, metei vecha kuimbae taɨrusu vae metei año vae, mɨmba oyeyuka opaetei oyeapɨ vaerä vae;

16jare metei kavara kuimbae, Tumpa iñɨ̈ro vaerä mbaeyoa re vae;

17jare mókoi toro, pandepo vecha kuimbae, pandepo kavara kuimbae jare pandepo vecha kuimbae taɨrusu vae metei año vae mbota yembopɨakatu peguarä. Kuaekuae ko jae Naasón, Aminadab taɨ mbota omee vae.

18Mokoía ara pe omee mbota vae, jae ko Natanael, Zuar taɨ, Isacar iñemuña reta juvicha;

19-23omee vi mbota Naasón omee rami etei.

24Mboapɨa ara pe omee mbota vae, jae ko Eliab, Helón taɨ, Zabulón iñemuña reta juvicha;

25-29omee vi mbota ïru reta omee rami etei.

30Irundɨa ara pe omee mbota vae, jae ko Elisur, Sedeur taɨ, Rubén iñemuña reta juvicha;

31-35omee vi mbota ïru reta omee rami etei.

36Pandepoa ara pe omee mbota vae, jae ko Selumiel, Zurisadai taɨ, Simeón iñemuña reta juvicha;

37-41omee vi mbota ïru reta omee rami etei.

42Ovaa ara pe omee mbota vae, jae ko Eliasaf, Deuel taɨ, Gad iñemuña reta juvicha;

43-47omee vi mbota ïru reta omee rami etei.

48Chiúa ara pe omee mbota vae, jae ko Elisama, Amiud taɨ, Efraín iñemuña reta juvicha;

49-53omee vi mbota ïru reta omee rami etei.

54Juría ara pe omee mbota vae, jae ko Gamaliel, Pedasur taɨ, Manasés iñemuña reta juvicha;

55-59omee vi mbota ïru reta omee rami etei.

60Chaúa ara pe omee mbota vae, jae ko Abidán, Gedeoni taɨ, Benjamín iñemuña reta juvicha;

61-65omee vi mbota ïru reta omee rami etei.

66Payandepoa ara pe omee mbota vae, jae ko Ahiezer, Amisadai taɨ, Dan iñemuña reta juvicha;

67-71omee vi mbota ïru reta omee rami etei.

72Oncea ara pe omee mbota vae, jae ko Pagiel, Ocrán taɨ, Aser iñemuña reta juvicha;

73-77omee vi mbota ïru reta omee rami etei.

78Docea ara pe omee mbota vae, jae ko Ahira, Enán taɨ, Neftalí iñemuña reta juvicha;

79-83omee vi mbota ïru reta omee rami etei.

84Jökorai, Israel pe tenondegua reta omee mbota, mɨmba oyeyuka oyeapɨ jese vae oñeñono tee Tumpa pe vaerä yave: Doce ñae korepoti pegua, doce tasa guasu korepoti pegua, doce kuchara guasu oro pegua.

85Ñae ñavo ipoɨgüe jae ko metei kilo y medio, jare tasa guasu ñavo ipoɨgüe jae ko seteciento setenta gramo. Jare opaete reve ñae jare tasa guasu korepoti pegua, oñejäa ipoɨgüe veintisei mil cuatrociento gramo, o mbaemboetea pe korepoti ipoɨ oñejäa rami.

86Jare doce kuchara reta oro pegua tɨnɨe ikäti kavi vae incienso, metei ñavo vae ipoɨ ciento diez gramo, o mbaemboetea pe korepoti ipoɨ oñejäa rami. Jare opaete kuchara reta ipoɨgüe ko, mil tresciento veinte gramo.

87Mɨmba oyeyuka opaetei oyeapɨ vaerä vae opaete reve jae ko: Doce toro taɨrusu vae, doce vecha kuimbae, doce vecha kuimbae taɨrusu vae metei año vae, mbota temitɨ jäɨgüe ndive ndive, jare doce kavara kuimbae reta, Tumpa iñɨ̈ro vaerä mbaeyoa re vae.

88Opaete reve mbota yembopɨakatu peguarä vae, jae ko veinticuatro toro, sesenta vecha kuimbae, sesenta kavara kuimbae, jare sesenta vecha kuimbae taɨrusu vae metei año vae reta. Kuaekuae ko jae mbota reta oñemeegüe, mɨmba oyeyuka oyeapɨ jese vae oñeñono tee Tumpa pe vaerä yave.

89Moisés oike tupao guakapi pegua pe, imiari vaerä Tumpa ndive yave, oendu yandeYa iñee ñɨ̈ro renda iárambo güi, jókuae mókoi araɨgua querubín iä ipäu güi, jare imiari jae ndive.