1Pemboete yandeYa, echa jae ipɨakavi ko;
echa iporoparareko jekuae avei vae ko.
2Israel iñemuña reta tei añave:
“Iporoparareko jekuae avei vae ko.”
3Opaete Aarón iñemuña reta tei añave:
“Iporoparareko jekuae avei vae ko.”
4YandeYa güi oipoɨu vae reta tei añave:
“Iporoparareko jekuae avei vae ko.”
5Chepɨatɨtɨ aï yave aenɨi yandeYa,
oendu cheve yandeYa, jare cheyora chugüi.
6YandeYa oï che ndive,
ngaraa akɨɨye, kia oipota oyapo mbae cheve vae güi.
7YandeYa oime oï che ndive,
jae chemborɨ oï.
¡Jáeramo, che aechata chemotareɨ vae reta isusere!
8YandeYa re yayeko vae ko ikavi,
kuimbae re yayeko vae güi.
9YandeYa re yayeko vae ko ikavi yae,
mburuvicha reta re yayeko vae güi.
10Opaete tëtaguasu reta cheöva,
ërei yandeYa jee re opata amoamɨri reta.
11Cheöva reta jare opa cheokenda reta,
ërei yandeYa jee re opata amoamɨri reta.
12Cheöva reta kävee rami,
tata jendɨ ñurati re rami iyarasɨ reta chekotɨ,
¡ërei yandeYa jee re opata amoamɨri reta!
13Täta chemoaña reta tëi chepɨaka vaerä,
ërei yandeYa chemborɨ.
14Cheñepɨ̈roa jare chetairari ko yandeYa.
¡Jae ko chereroasayepe vae!
15Jupi vae reta jo pe,
oime sapúkai oporomoamɨri pegua, jei reta:
“¡YandeYa imbaepuere oyapo mbae tuichagüe!
16¡YandeYa imbaepuere tuicha yae ko!
¡YandeYa imbaepuere oporomoamɨri!”
17¡Ngaraa amano, aikoveta ko,
amoërakua vaerä yandeYa oyapogüe reta!
18YandeYa täta oiporarauka cheve chereko re,
ërei mbaetɨ omaeño amano.
19¡Peipea cheve tupao guasu jöke,
aiketa amboete yandeYa!
20Jae ko yandeYa jöke,
jokoropi ko oiketa jupi vae reta.
21CheYa, tamee mbaemboete ndeve, echa reendu cheve,
echa nde ko chereroasayepe vae.
22O iyapoa reta güɨröɨro ita vae,
ou opɨta o ekina iguapɨkarä.
23YandeYa ko oyapo kuae,
yaecha ma, jare ñanemopɨakañɨ.
24Kuae ara jae ko yandeYa oyapo vae;
¡yavɨakatu jare yayerovia katu jese!
25CheYa Tumpa, ¡romoñera, orereroasayepe añave!
Romoñera, cheYa Tumpa,
¡toroiko kavi añave!
26¡Mbaemboete toï yandeYa jee re ou vae pe!
YandeYa jo güi roe ñee kavi pekotɨ.
27YandeYa ko Tumpa, ¡jae ko omee yandeve tekove!
Peñapɨti tembiarä vae tɨmasa pe
mbota renda re guakarätiecha oï vae re.
28CheTumpa ko nde, toromboete;
cheYa Tumpa, torombotuicha.
29Pemboete yandeYa, echa jae ipɨakavi;
echa iporoparareko jekuae avei vae ko.
Who We AreWhat We EelieveWhat We Do
2025 by iamachristian.org,Inc All rights reserved.
