2 REYES 18 - Guarani Bible with DC

Ezequías oiko mburuvicha guasurä Judá pe(2 Cr 29.1-2)

1Oseas, Ela taɨ mboapɨ año ma oiko mburuvicha guasurä Israel pe yave, Ezequías omboɨpɨ oï mburuvicha guasurä Judá pe, jae ko Acaz mburuvicha guasu Judá pegua taɨ.

2Güɨnoi veinticinco año omboɨpɨ oï mburuvicha guasurä yave; oiko mburuvicha guasurä Jerusalén pe veintinueve año. Ichɨ ko jee Abi, Zacarías tayɨ.

3Oyapo jupi vae yandeYa jesa róvai, oyapo opaete mbaembae iñemuñagüe David oyapo rami.

4Omboai opaete mbaemboete renda ɨvɨtɨ rupigua reta, oyoka mbae iä reta, oyasɨa Asera iä reta, opa omboai mboi iä jiero iyu vae pegua Moisés oyapo vae,

5Ezequías oyeko, Israel iYa Tumpa reño, opaete mburuvicha guasu reta Judá pegua, jenonde ani jae jaɨkue rupi yogüɨreko mburuvicha guasurä vae, mbaetɨ yé jae rami vae.

6Echa oiko yandeYa jeia re, mbaetɨ oyembosɨrɨ chugüi, oyapo yandeYa omee mborookuai reta Moisés pe vae.

7Jare yandeYa omborɨ opaete mbae oyapo vae rupi.

Ezequías oñemopüa mburuvicha guasu Asiria pegua kotɨ, mbaetɨ ma oiko jae jeia re.

8Omoamɨri vi filisteo reta Gaza kotɨ güɨraja güɨroväe regua; maeka ɨvate vae reta güive tëta guasu reta oñekëse kavi vae kotɨ.

Tëta Samaria ñamɨri

9Ezequías irundɨa año ma oiko mburuvicha guasurä Judá pe yave, jare Oseas, Ela taɨ, chiúa año ma oiko mburuvicha guasurä Israel pe yave, Salmanasar, Asiria pegua reta juvicha guasu oporepeña Samaria re jare opa oñova.

10Jare opɨ̈ro reta mboapɨ añoa pe; jae ko Ezequías ova año ma oiko mburuvicha guasurä yave, jare Oseas chaúa año ma oiko mburuvicha guasurä Israel pe yave, oñepɨ̈ro tëta guasu Samaria; kuae tëta guasu güi mburuvicha reta oporookuai opaete tëta reta re.

11Mburuvicha guasu Asiria pegua güɨraja tembipɨɨrä Israel iñemuña reta Asiria pe; opa güɨraja oñono reta tëta Halah pe, ɨvɨ Habor pe, ɨ̈aka Gozán jembeɨ pe, jare tëta guasu reta ɨvɨ Media pegua rupi;

12mbaetɨ yandeYa Tumpa omboete reta jeko pegua, echa ko oyavɨ reta morogüɨrökuavee päve kotɨ; mbaetɨ oyapo reta opaete mbaembae, Moisés yandeYa jembiokuai oporookuai vae, mbaetɨ oendu reta.

Senaquerib oike ɨvɨ Judá pe(2 Cr 32.1-19; Is 36.1-22)

13Ezequías catorce año ma oiko mburuvicha guasurä Judá pe yave, Senaquerib mburuvicha guasu Asiria pegua oporepeña opaete tëta guasu oñekëse kavi vae Judá pegua re, jare opa opɨ̈ro.

14Jayave Ezequías mburuvicha guasu Judá pegua omondo jei mburuvicha guasu Asiria pegua pe, Laquis pe ma oï yave: “Che ayapo mbaeyoa; ekua ye cherëta guasu güi, tambaemboepɨ ndeve opaete rekovara cheve rupi.”

Jayave mburuvicha guasu Asiria pegua okovara Ezequías mburuvicha guasu Judá pegua pe nueve mil noveciento kilo korepoti jare noveciento noventa kilo oro.

15Jökorai Ezequías omee opaete korepoti yandeYa jo pe oime vae jare mburuvicha guasu jo pe mbaembae jepɨ vae oñeñovatúa pegua.

16Oekɨ vi oro yandeYa itupao jöke güi jare öke-ɨta reta regua, jae etei oñova oro pe vae, javoi omee mburuvicha guasu Asiria pegua pe.

17Ërei jeseve mburuvicha guasu Asiria pegua ombou mburuvicha guasu Ezequías kotɨ Tartán, Rabsaris, Rabsaces, jetagüe sundaro ndive Laquis güi Jerusalén kotɨ, oïraro reta vaerä. Yogüeru oyembojeyupa ɨ rape ɨrɨru iyɨ́vɨri ɨvategua pe, tape ojo Mbaeputuka renda rupía pe.

18Javoi oenɨi reta mburuvicha guasu; ërei jekovia pe ñogüɨnoe oövaiti reta Eliaquim, Hilcías taɨ, mburuvicha guasu imbaembae iyangarekoa, jare Sebna ombaekuatía vae, jare mburuvicha Joa, Asaf taɨ.

19Jare Rabsaces jei chupe reta:

—Pemombeu Ezequías pe kuae ñee mburuvicha guasu tuicha yae vae Asiria pegua jei vae: “¿Mbae re pa reñeväe jëguambae ko reï vae?

20¿Reyemongeta pa ñee ikavi yae vae rupi oime arakuaa katu jare mbaepuere ñeraro peguarä? ¿Kia re yé pa reyerovia reyovaicho vaerä chekotɨ?

21Aikuaa reyerovia reï Egipto re. Ërei peikuaa kavi, Egipto ko täkuareerasɨ oyemboakuarovi vae rami, kia nunga vae oyeko jese yave oikutu voi jare oësɨvo ipo. Jökorai ko Faraón mburuvicha guasu Egipto pegua, opaete jese oyeko vae pe.”

22Jare pe pere cheve yave: “Ore romboete oreYa Tumpa.” ¿Mbaetɨ pa Ezequías omboai mbaemboete renda reta ɨvɨtɨ rupigua mɨmba oyeyuka oyeapɨ jese vae, jare mbaetɨ pa oyókuai Judá pegua reta jare Jerusalén pegua reta ombaemboete vaerä Jerusalén pegua mɨmba oyeyuka oyeapɨ jese vae peño?

23Che jae ndeve nemiari vaerä cheruvicha guasu Asiria pegua ndive, jare che ameeta ndeve dos mil kavayu, oime yave renoi kavayu regua reta.

24Nde ngaraa ndepuere remoamɨri oipotagüe sundaro ruvicha Asiria pegua mbaeä etei remae jese vae ave, ¿reyererovia pa reväeta Egipto pe käretou reta jare kavayu regua reta?

25¿Rerovia pa che ayu aporepeña amboai vaerä kuae tëta guasu yandeYa iporomborɨmbae reve? ¡Jae ko cheokuai aporepeña vaerä jese jare amboai vaerä!

26Jayave Eliaquim, Hilcías taɨ, Sebna jare Joa, jei Rabsaces sundaro ruvicha Asiria pegua pe.

—Romoñera oremomiari vaerä ñee arameo pe, echa ore roikuaa jókuae ñee, agüɨye oremomiari ñee Judá pegua reta iñee pe, echa oenduta ko tëta ikësea re ñogüɨnoi vae.

27Ërei Rabsaces Asiria pegua jei chupe reta:

—Mbaetɨ ko peruvicha pe, ani peve retaño mburuvicha guasu chembou jae vaerä kuae ñee reta, jókuae tëta ikësea re ñogüɨnoi vae reta peguarä vi ko, echa jae reta, pe reta rami eteita vi ko jou retata jɨmba repoti jare jou retata ikuarugüe.

28Jayave Rabsaces opüa oyemboɨ jare täta osapúkai Judá pegua reta iñee pe, jei reve:

—Peendu mburuvicha guasu tuicha yae vae Asiria pegua iñee.

29Körai jei mburuvicha guasu: “Agüɨye peyembotavɨuka Ezequías pe, echa ngaraa ipuere pereepɨ chepo güi.”

30Agüɨye Ezequías togüɨroviauka peve Tumpa re, jei yave peve: “YandeYa añetete ko yandereepɨta, jare kuae tëta guasu ngaraa oa mburuvicha guasu Asiria pegua ipo pe.”

31Agüɨye perovia Ezequías. Echa mburuvicha guasu Asiria pegua jei: “Peyapo che ndive mbɨakatu jare peë cherövaiti, jökorai yave metei ñavo pepuereta peu peuva, peɨva jare ɨ peuta peɨrɨru güi aeño,

32che ayu pogüɨraja peɨvɨ rami vae pe regua, trigo jare uva oimea pe, tembíu jare vino oimea pe, ɨvɨra olivo jare ei oime pɨpea pe. Joko pe pepuereta peiko kavi, mbaetɨta pemano. Ërei agüɨye perovia Ezequías, echa pembotavɨ ko jei yave peve yandeYa ko yandereepɨta.

33¿Tumpa-raanga reta oepɨ pa jëtaguasu mburuvicha guasu Asiria pegua güi?

34¿Ketɨ pa oime oï tëta Hamat jare Arfad itumpa reta? ¿Ketɨ pa oime oï tëta Sefarvaim, Hena, jare Iva itumpa reta? ¿Kuae tumpa reta oepɨ pa tëta guasu Samaria chembaepuere güi?

35¿Oime pa mbae nunga tumpa reta opaete kuae ɨvɨ pegua oepɨ iɨvɨ chembaepuere güi vae? ¿Maera pa peyemongeta peYa Tumpa ipuere oepɨ chegüi Jerusalén?”

36Ërei opaete vae kïrii opɨta, mbaetɨ iñee omoë reta chupe; echa mburuvicha guasu oyókuai reta agüɨye etei vaerä iñee omoë reta chupe.

37Jayave Eliaquim, Hilcías taɨ, mburuvicha guasu imbaembae iyangarekoa, jare Sebna ombaekuatía vae jare mburuvicha Joa, Asaf taɨ yogüeru Ezequías pɨri, omondoro reta jemimonde ipɨatɨtɨ güi, jare imiari reta chupe Rabsaces jei vae.