SOFONÍAS 3 - Guarani Bible with DC

Jerusalén imbaeyoa jare iyemboepɨ

1¡Paravete Jerusalén,

tëta ipɨapochɨ vae,

tëta guasu oyemongɨa mbaeyoa pe vae,

tëta guasu ipïrimbae!

2Mbaetɨ oyeapɨsaka yandeYa iñee re,

mbaetɨ oipota oendu omboeta chupe vae,

mbaetɨ oyeko yandeYa re,

mbaetɨ ou Tumpa kotɨ.

3Juvicha reta yaguapope oñee vae rami,

oporojäa vae reta, aguarayaɨmba ñuu rupigua rami,

mbaetɨ omoembɨre maekägüe pɨareve peguarä vae rami.

4Joko pegua ñeemombeúa reta oporomboe raanga;

ërei mbaetɨ jupi reta Tumpa kotɨ.

Isacerdote reta omongɨa o mbaemboetea,

mbaetɨ omboete reta Tumpa iporookuai.

5Ërei yandeYa oime jókuae tëta pe;

jae ko jupi, mbaetɨ oyapo ikavimbae.

Ndeimbove ñavo oñono mbae ko oyeapota vae.

Ërei jupimbae vae, mbaetɨ imara.

6YandeYa jei:

“Opa amboai tëtaguasu reta,

opa amboai maeka reta tëta guasu ikësea regua;

ikaye ipombae opɨta,

mbaetɨ etei pɨpe vae.

7Jae cheyeupe:

‘Körai Jerusalén oipoɨuta chegüi, jare oyeapɨsakata cheré;

jayave ngaraa ñakañɨ opaete

jókuae mbaembae re aiporarauka chupe vae güi.’

Ërei jae reta jeieteño jarembae pegua oyapo reta jeta ikavimbae.

8Jáeramo, cheräro pe reta,

ayuta metei ara pojäa.

Che, peYa ko jae jökorai:

Ayemongeta amboatɨ vaerä tëtaguasu reta jare mborookuaía reta

aitɨ vaerä jese reta chearasɨ,

chearasɨ yavaetegüe.

¡Cherägüɨro jeko pegua chearasɨ yaeta,

opaeteita amboai kuae tëtaguasu reta!

9Jókuae ara, che ameeta opaete vae pe iñee kavi vaerä,

jökorai opaete vae chereenɨi vaerä jare oyeokuai vaerä

cheve ipɨa-kɨ̈reɨ ngatu reve.

10Ɨvɨ Etiopía pegua ɨ̈aka reta kutɨ jovaicho kotɨ güi

tëta chembae vae opa oñemoai moai ñogüɨnoi vae

güeru retata cheve mbota.

11Jókuae ara ngaraa ma nemara

pɨapochɨ rupi mbaembae reyapose chekotɨ vae güi.

Echa jókuae ara opata aekɨ

ndegüi ipɨapochɨ vae reta

jare ipɨayemboete vae reta.

Ngaraa ye ma ipɨayemboete reta

cheɨvɨtɨ oñeñono tee vae re.

12Aeyata ndeve ipɨa omomichi vae

jare mbaetɨ ipɨayemboete vae reta,

jae reta oyekota chereño.

13Israel iñemuña jembɨregüe reta

ngaraa ma oyapo jupimbae vae,

ngaraa ma jei reta apu,Jerusalén otairari oyerovia güi

14¡Etairari tëta Sión!

¡Pesapúkai, peyerovia katu güi Israel iñemuña reta!

¡Eyerovia opaete ndepɨa ndive Jerusalén!

15YandeYa Tumpa ombosɨrɨ ndegüi iporojäa,

opa oekɨ omombo ndegüi nderovaicho reta.

Echa yandeYa Tumpa ndeRuvicha guasu ko oï nde ndive;

ngaraa ye ma reecha ikavimbae.

16Jókuae ara jei retata Jerusalén pe:

“¡Agüɨye ekɨɨye Sión,

agüɨye torɨrɨi ndepo!”

17YandeYa oime oï nde ndive;

¡imbaepuere yae vae ko,

jae ndereroasayepeta!

Oyerovia katuta ndekotɨ.

Iporoaɨu jeko pegua omeeta ndeve tekove pɨau otairari reve.

18YandeYa jei:

“Amboatɨta ɨma rupi ma oiporara yogüɨreko vae reta,

ndembae areta ko, chupegua reta ñemomarai pe rupi yogüɨreko vae, ipoɨ yae ko.

19Jókuae ara che, añemopüata opaete oiporarauka ndeve vae reta kotɨ.

Amborɨta vecha iköcho vae,

aru yeta okañɨgüe;

amboeteukata jare jërakua yaeta opaete ɨvɨ rupi.

20Jókuae ara pogüeru yeta, pomboatɨta;

jare ameeta peyemboeteuka vaerä

jare perërakua yaeta opaete tëta ɨvɨ pegua rupi,

pogüeru ye ɨvɨ ambuae güi yave.”