ISAÍAS 56 - Guarani Bible with DC

Tumpa iporogüɨrökuavee päve omboete vae reta pe oyemboekovia vae regua

1YandeYa jei körai:

“Peyapo jupi vae, peyapo sɨmbi vae,

echa köiño ma ou cheporoyora;

amboyekuaa vaerä chembaepuere, cheporogüɨroasayepe.

2Oyeroviata kuimbae oiko kuae mborookuai reta jeigüe rupi vae,

omboete ara mbutuu ave agüɨye tei:

“Che ko ɨvɨra yɨpigüe rami.”

4Echa yandeYa jei:

“Eunuco reta omboete yave cheara mbutuu,

yogüɨreko yave jaegüe rupi jare cheporogüɨrökuavee päve rupi,

5yepe tëi mbaetɨ taɨ jare tayɨ,

ërei che ameeta chupe reta ikavi yae vae,

jae ko, jee opɨta vaerä jekuae avei pegua chero pe,

chero japɨpe pe;

ameeta chupe jee opambae,

ngaraa etei oyemboai vae.

6Jare ketɨgua reta taɨ,

cheremimbota rupi yogüɨreko, oyeokuai reta vaerä cheve vae,

jare oaɨu reta cheree yogüɨreko vaerä cherembiokuairä;

jare opaete omboete ara mbutuu vae reta,

agüɨye vaerä güɨröɨro,

yogüɨreko cheporogüɨrökuavee päve rupi vae reta,

7che araja retata cheɨvɨtɨ oñeñono tee vae pe,

jare ambovɨakatu retata chero yerure pegua pe;

jare mɨmba oyeyukagüe opa etei oyeapɨ vae,

jare ïru mɨmba oyeyukagüe reta re chepɨakatuta amae,

omee reta yave mɨmba oyeyuka oyeapɨ jese vae re;

echa chero oyembojeeta, o yerure pegua opaete vae reta peguarä.

8Che peYa Tumpa,

Israel iñemuña reta opa oñemoai moai ñogüɨnoi vae reta omboatɨ vae, jae körai:

Amboatɨ ye ñotai ïru tëta reta rupi oñemoai ñogüɨnoi vae.”Yemboeta mburuvicha jeko kavimbae reta kotɨ

9Opaete mɨmba kaa rupigua,

opaete mbaeporou kaa rupigua,

peyu pekaru;

10echa sundaro ɨvate güi omae vae reta, jesambae rami ñogüɨnoi,

mbaetɨ etei mbae oikuaa ñogüɨnoi.

Opaete jae reta yaɨmba iñarosembae rami ko,

mbaetɨ ipuere oñaro reta;

oke reteiño jare oaɨu yae reta jopeɨ.

11Yaɨmba jɨ̈vɨatambae rami ko,

maangarekoa mbae oikuaambae vae;

opaete yogüɨreko ipɨa jemimbota reño,

iyeupeguaräño mbae oeka reta.

12Jei reta: “Yaja yaeka vino jare mbae oporombosavaɨpo vae,

yandembosavaɨpo vaerä.

Javoi pɨareve yayapo ye añave rami,

ani oasa ete ye ikavi yayapo.”