SABIDURÍA 9 - Guarani Bible with DC

Yerure arakuaa yaupitɨ vaerä

1“Cheñemuñagüe reta iTumpa, Tumpa iporoparareko vae,

neñee rupiño reyapo opaete mbae,

2ndearakuaa rupi reyapo kuimbae

oyangareko vaerä opaete mbae nderembiapo re,

3oyangareko vaerä ɨvɨ re jekombae reve jare isɨmbi rupi

jare toyangareko jupigüe re ipɨa sɨmbi reve:

4emee cheve arakuaa, ndeɨpɨ rupi oporookuai vae,

jare agüɨye tachemboyao nderaɨ reta oiko vae güi,

5echa nderembiokuai ko che, nderembiokuai kuña imembɨ,

kuimbae ipɨtugüe vae, oiko pukumbae vae,

mbae jupi vae pe oikuaa rapembae jare mborookuai reta regua.

6Oipotagüe kuimbae oyembojupi vae pe,

mbaeä etei ko mbaetɨ yave güɨnoi arakuaa ndegüi ou vae.

7Nde etei ko cheparavo nerëta ipo reta juvicha guasurä aiko vaerä

jare nderaɨ reta pe jare nderayɨ reta pe teko iyapo kaviä ra aiko vaerä;

8cheokuai amopüa vaerä metei tupao nde ɨ ikɨambae vae pe

jare metei mɨmba oyeyuka oñemeea tëtaguasu reiko pɨpe vae pe,

oyovake etei o ikɨambae oyereroatase vae ndive

kugüive reyapouka vae.

9Nde ndive ko oï arakuaa, nderembiapo oikuaa vae

jare oiko aeño ma vi ɨvɨ reyapo yave vae;

jae oikuaa mbae ikavi ndeve vae

jare mbae ndeporookuai jei rami oï vae reta.

10Embouño ndeara ikɨambae vae güi,

embouño ndeporookuaía ikavigüe vae güi,

chemoïru vaerä cherembiapo rupi

jare chemboe vaerä mbae ikavi ndeve vae pe.

11Jae, opaete mbae oikuaa jare oikuaa kavi ete,

jae chererajata ikavi rupi opaete oyapogüe rupi

jare cheangarekota imbaepuere rupi.

12Jayave cherembiapo reta oikota ndepɨa potaa rami,

ayangarekota nerëta ipo re jupi rupi

jare jupi rupi opɨta vaerä cheve cheru iporookuaía.

13Maera, ¿kia nunga kuimbae pa ko oikuaa Tumpa iyemongeta?

¿Kia pa ipuereta oikuaa Tumpa ipɨa potaa?

14Ipɨtu ko kuimbae reta iyarakuaa,

jare jaangaño ko amo yave iyemongeta reta;

15yanderete mano pegua vae tekove imboavaiaräño ko;

echa tuyuapo güi ko oyeapo, güɨrekoasɨ katu äka,

yemongeta reta jäsémbai oiko pɨpe vae.

16Yavai yae reve yayemongeta mbaembae reta oï ɨvɨ pe vae pe,

jare ñaïraro reagüe yamondo ñanoi mbae yaecha ñanoi vae.

Ërei, ¿kia pa ipuereta oikuaa mbae ara pe oï vae?

17Ngaraa kia ipuere oikuaa ndeyemongeta reta

jaeño ma jókuae nde arakuaa remee chupe vae

jare jókuae nde ara güi rembou chupe nde espíritu ikɨambae vae.

18Yasoropai arakuaa pe

echa jese ko kuimbae reta oipɨɨ tape ikavigüe

jare oikuaa reta vaerä ndepɨa potaa:

oasayepe reta vae pe yayapo yasoropai chupe.”