1 REYES 3 - Guarani Bible with DC

Salomón omenda Faraón tayɨ ndive

1Salomón oñemoëtara Faraón mburuvicha guasu Egipto pegua ndive, echa omenda tayɨ ndive, jare güɨraja David Jëta guasu pe opa oyeapo ramboeve mburuvicha jo, tupao jare Jerusalén ikësea.

2Jókuae ara rupi opaete vae omee mɨmba oyeyukagüe ɨvɨtɨ rupi, echa mbaetɨ vɨteri tupao oñemopüa yandeYa peguarä.

Salomón oiporu arakuaa katu(2 Cr 1.1-13)

3Salomón oaɨu yae yandeYa, jare oyapo opaete mborookuai reta tu David oyapo oeyagüe, jare jae etei omee mɨmba oyeyukagüe jare ikäti kavi vae incienso ɨvɨtɨ rupigua mbaemboetea re.

4Mburuvicha guasu ojo Gabaón pe omee vaerä mɨmba oyeyukagüe, echa jókuae ɨvɨtɨ re oï mbaemboetea tenondegua opaete vae reta pe vae, joko pe Salomón omee mil mɨmba oyeyukagüe opaetei oyeapɨ vae.

5Jare metei pɨ̈tu Salomón ipaɨu pe yandeYa oyekuaa chupe Gabaón pe, jei chupe: “Eiporu cheve nde reipota vae, tamee ndeve.”

6Jare Salomón jei: “Nde reiparareko yae ete nderembiokuai cheru David, echa jae oguata añetete rupi nderóvai, jupi rupi jare ipɨa isɨmbi ndekotɨ. Jáeramo nde reiparareko tuicha, remee ramboeve chupe taɨ oguapɨ vaerä jekovia pe mburuvicha guasurä, kuae ara oasa oï vae rami.

7Añave, cheYa Tumpa, che nderembiokuai nde cheñono mburuvicha guasurä cheru David jekovia pe; jare che chetaɨrusu ko, mbaetɨ aikuaa kërai aiko vaerä mburuvicha guasurä.

8Jare che nderembiokuai aï kuae tëta reiparavogüe juvicharä: Tëta tuicha yae vae ko, mbaetɨ ipuere oyepapa jeta yae vae jeko pegua.

9Emee che nderembiokuai pe chepɨarakuaa katu yae vaerä, aikatu vaerä ajäa ndembae vae reta, jare aikuaa vaerä ikavi vae ikavimbae güi; echa, ¿kia pa ipuereta oporookuai kuae tëta tuicha yae vae re?”

10Jare yandeYa pe ikavi yae kuae, Salomón oiporugüe.

11Jare jei chupe: “Kuae reiporu ramo, jare mbaetɨ reiporu ndeyeupe reikopuku vaerä, jare mbaetɨ reiporu ndeyeupe reikokatu vaerä, jare mbaetɨ reiporu nderovaicho reta omano vaerä, jaeño ma reiporu ndeyeupe arakuaa katu reikuaa vaerä reporojäa,

12mase, ko ayapo ndeve reiporu rami: Ko amee ndeve arakuaa katu, mbaetɨi nde rami vae nde ndei reiko mbove, jare ngaraa ye kia opüa nderaɨkue rupi nde rami vae.

13Jare reiporumbae ave vi amee ndeve, jae ko mbaeyekou jare mbaemboetea, jökorai opaete mburuvicha guasu reta güi mbaetɨta nde rami vae, reikove reiko ramboeve.

14Jare reguata yave cheremimbota rupi, reñovatu reve cheporookuai reta, nderu David oguatase rami, che ambopukuta nderekove.”

15Salomón opa yave, oecha opaɨu yepe; jare ou Jerusalén pe, ou oñeñono yandeYa ikäjou morogüɨrökuavee päve pegua jóvai, jare oyuka omee mɨmba oyuka opaetei oyeapɨ vae, jare mɨmba oyeyuka yembopɨakatu pegua vae, jare oyapo vi arete opaete iyɨvɨrigua reta pe.

Salomón iyarakuaa katu jare imbaeyekou

16Jókuae ara rupi yogüeru mókoi kuña iyaguasa pota vae mburuvicha guasu oïa pe, jare oyemboɨ reta jóvai.

17Jare metei jei:

—¡Cheya! Che jare kuae kuña roiko päve metei o peño, jare ayekuaku aiko ramboeve jae ndive jókuae o pe.

18Jare mboapɨ ara ma chemembɨ oa güire, jae oyekuaku vi, oreño roiko; mbaetɨ ye kia ikatu pegua oiko jókuae o pe, jaeño ore mókoi.

19Jare metei pɨ̈tu kuae kuña imembɨ omano, oyapakua jese ramo.

20Jare opüa pɨare mbɨte yave, che ake aï yave, jare ovoɨ chemembɨ oñono iyɨke pe, jare imembɨ jëogüegüe oñono cheɨpɨ pe.

21Jare köe-pota yave apüa chemembɨ ambokambu vaerä yave, aecha omano; ërei köe ma yave amae kavi jese, jare aecha chemembɨä ko, jókuae chegüi oa vaeä.

22Jayave ïru kuña jei:

—Mbaetɨ; chemembɨ ko jae oikove vae, nemembɨ ko jókuae omano vae.

Jare ïru jekuae jei ye:

—Mbaetɨ; nemembɨ ko jae omano vae, jare chemembɨ ko jae oikove vae.

Jökorai oyoaka reta mburuvicha guasu jóvai.

23Jayave mburuvicha guasu jei: “Kuae jei: ‘Chemembɨ ko jae oikove vae, nemembɨ ko jae omano vae,’ jare ïru jei: ‘¡Mbaetɨ, nemembɨ ko jae omano vae, chemembɨ ko jae oikove vae!’ ”

24Jayave mburuvicha guasu jei:

—¡Peru cheve metei kɨsepuku!

Jare güeru reta mburuvicha guasu pe metei kɨsepuku.

25Jare mburuvicha guasu jei:

—Peyasɨa mbɨte rupi kuae michia raɨ oikove vae, jare pemee mbɨte metei pe, jare ïru mbɨte ïru pe.

26Jayave kuña imembɨ oikove vae, omomiari mburuvicha guasu (echa oyandu ipɨatɨtɨ yae imembɨ re), jare jei:

—¡Cheya! ¡Emee kuae pe michia raɨ oikove vae, jare agüɨye eyuka!

Ërei jókuae ïru jei:

—Agüɨye toikove cheveguarä ani ndeveguarä ave, ¡peyasɨa!

27Jayave mburuvicha guasu jei:

—Pemee pea kuña pe michia raɨ oikove vae, jare agüɨye peyuka; jae ko ichɨ.

28Jare opaete Israel oendu jókuae mburuvicha guasu oyapo morojäa vae regua; jare okɨɨye reta mburuvicha guasu güi, echa oecha reta oime ko jese Tumpa iyarakuaa oporojäa vaerä.