1Toyerovia jókuae oyemongeta paravete vae re vae,
yandeYa oepɨta tembiporara iara pe.
2YandeYa oyangarekota jese,
omeeta chupe tekove,
oyeroviata oiko ɨvɨ pe;
ngaraa oeya jovaicho reta oyuvanga vaerä jese.
3YandeYa oyangarekota jese imbaerasɨ yave,
jupa rupi oiko reve okuera katuta.
4Che jae:
“CheYa, cheparareko;
chembogüera, yepe tëi cheyoa ndekotɨ.”
5Cherovaicho reta imiari kaviä cheré, oparandu reve:
“¿Kërai yave ra omanota jare jee okañɨta?”
6Jare yogüeru omae reta cheré yave, chemomiari reta añete rami;
ërei ipɨa pe oñovatu ikavimbae,
jare ikatu rupi oë yave omoërakua reta.
7Oyomboatɨ iñeenguru chekotɨ opaete chemotareɨ vae reta;
oyemongeta reta ikavimbae, jei reve chekotɨ:
8“Mbae ikavimbae vae oya jese;
oa jupa pe, ngaraa ma opüa ye.”
9Chevɨaka ave, jese arovia katu vae,
okaruse che ndive vae,
oyeapa cheré.
10Ërei ngatu nde cheYa,
cheparareko jare chemopüa,
jare tayepɨ jese reta.
11Kuae re taikuaa rombopɨakatu ko vae,
cherovaicho reta agüɨye tachemoamɨri.
12Echa che aiko jupi rupi ramo cheangareko,
jare cheñono nderóvai jekuae avei pegua.
13¡Toyemboeteuka cheYa, Israel iTumpa,
jekuaekuae avei!
¡Amén! ¡Amén!
Who We AreWhat We EelieveWhat We Do
2025 by iamachristian.org,Inc All rights reserved.
