TOBIT 10 - Guarani Bible with DC

Tobit jare Ana ipɨatɨtɨ

1Pe pe ko Tobit oipapa pɨi oï ara reta, Tobías ojo oväe jare oyerova ye vae. Echa ara reta oasa ma ɨma ma mbaetɨño taɨ oväe,

2jei ipɨa pe: “¿Oime ra mbae omboavai joko pe?, ani ¿Gabael omano jare mbaetɨ kia omee chupe korepoti?”

3Jare omboɨpɨ ipɨatɨtɨ reta.

4Joko güi Ana jei ime pe:

—¡Chemembɨ omano ko, mbaetɨ ma ko oikove oï!

Jaemai omboɨpɨ oyaeo jare, ipɨatɨtɨ imembɨ re, jare jökorai jei:

5—¡Aa, chemembɨ michi! ¿Maera ra amaeño reo, ndeño ko cheve jare nde chembovɨa katu vae?

6Ërei Tobit jei chupe:

—¡Nekïriiño, cherembireko michi, agüɨye ndepɨatɨtɨ! Jae ikaviño ko oï. Oime ko mbae jeko pegua mbaetɨño ou. Iguata ïru kuimbae yarovia katu vae ko, jare ñanerëtara vi. Agüɨye mo ndepɨatɨtɨ cherembireko, outa ko oväe kuri.

7Ërei jembireko jei chupe:

—¡Nekïrii chegüi, emaeño cheré! Agüɨye chembotavɨ. Chemembɨ omano ko.

Pɨareve ñavo opüa omae jape re, imembɨ outaa rupi, jare mbaetɨ ma oyangareko kia re, kaaru yave oike ojo jope omboɨpɨ oyaeo, opaete pɨ̈tu mbaetɨ ipuere oke.

Tobías oyemongeta oyerova ye vaerä

8Mókoi semana oasa ma Ragüel tayɨ imenda omboarete yave, Tobías ojo jei Ragüel pe:

—Emaeño mo taja. Aipo ko cheru jare chesɨ chereeka yae ma ko, oyemongeta reta ma ko aipo ngaraa ma aja ye vae. Jare chemiari ko ndeve kërai ko aeya reta vae re.

9Jaema Ragüel jei chupe:

—Epɨtaño, cheraɨ, epɨtaño che ndive. Che amondota metei cherembiokuai nderu Tobit jëta pe omombeu vaerä chupe nderegua.

Ërei Tobías jei ye chupe:

—Mbaetɨta chepuere. Aiporu ndeve emaeño tajaño cheru jëta pe.

10Jaema jayave Ragüel omee Sara pe, mbɨte rupi opaete imbaeyekou jembiokuai kuimbae jare kuña reta, mɨmba güeye, vecha reta, mburika reta, camello reta, temimonde reta, korepoti jare jembiporu reta.

11Jaema omaeño ojo reta. Joko güi Tobías pe jei ye körai tamaraeme:

—¡Tumpa ndiveño ekua cheraɨ! ¡Ikaviño ekua! YandeYa ara pe oï vae tomae peré pekua ikavi peväe nde jare nderembireko Sara. ¡Tomae Tumpa ndei amano mbove taecha vi pemichia!

12Jare tayɨ Sara pe jei vi:

—Ekua kavi nemendu jëta pe. Kuae güive tenonde kotɨ jae reta ko jae nderurä jare ndesɨrä, ore royangareko nderé rami. Ekua kavi, cherayɨ michi, aikove aiko ramboeve taendu peregua ikavi peiko vae.

Jare opa ma omboyupavo reta yave, jaema opa omondo.

13Jare Edna jei vi Tobías pe:

—Chemembɨ jare cherëtara michi vae, jare yandeYa tapemborɨ peyerova ye ramboeve nerëta kotɨ, jare che jekuaeño taikove taiko aecha vaerä pemichia, ndei amano mbove. YandeYa jesa róvai arovia jare aiporu chupe chemembɨ kuña re oyangareko kavi vaerä. Agüɨye mbae toasa. ¡Tamaraeme, chemembɨ! Añave güive che jae ko ndesɨ jare Sara nderembireko. Jare opaete yande reta ikavi yaiko opaete ara rupi yanderekove oiko regua.

Joko güi oovapɨte reta mókoi reve jare omaeño ojo reta.

14Tobías täta oyerovia ojo Ragüel jëta güi jare omboete reve yandeYa ara pe oï vae jare ɨvɨ pe oï vae, jae ko Mburuvicha guasu opaete pegua vae, echa jae omee guata ikavigüe chupe. Jare oiporu Tumpa iporerekua vaerä Ragüel re jare Edna, jare jei chupe:

—¡Tumpa tomae cheré opaete ara rupi mboromboete toiko che ndive!