2 SAMUEL 23 - Guarani Bible with DC

David oñemoñee jaevaeño ma

1Kuae ñee David ojäa jaevaeño ma, jei körai:

“David, Isaí taɨ,

jókuae kuimbae Tumpa ombotuicha vae,

Jacob iTumpa jembiparavo,

tairari reta ikavigüe Israel pegua iyapoa jei körai:

2YandeYa iEspíritu jei cherupi;

iñee oime oï cheyuru pe.

3Israel iTumpa jei,

Israel iyangarekoa jei cheve:

‘Mburuvicha güɨroata yave jupi rupi jëta pegua reta,

Tumpa güi oipoɨu reve kavi güɨroata vae,

4oikota tembipe ou köe yave vae rami,

kuaraɨ jembipe oyekuaa ndeimbove yave, mbaetɨ amapɨtu yave rami.

Ama omojeñɨi temitɨ ɨvɨ re vae rami.’

5Jáeramo, cheñemuña reta täta ko ñogüɨnoi Tumpa re,

echa jae oyapo ko che ndive morogüɨrökuavee päve jekuae avei pegua.

Jupi rupi oyeapo jare oyembopo vaerä mbaembae.

Jae ko omee aporomoamɨri,

jare ombopo cheve opaete chepɨa jemimbota.

6Ërei opaete iTumpa potambae reta

ñurati oyeasɨagüe ramita,

mbaetɨ kia oipota opoko kuae ñurati re.

7Oipota opoko jese vae, oipɨɨ jiero ani mii iɨ pe,

jare oitɨ tata pe, opa vaerä ókai.”

David isundaro reta jëiagüe(1 Cr 11.10-47)

8Kuae ko jae David isundaro jëia vae reta jee: Joseb-basebet tacmonita, jae ko mburuvicha reta itenondegua ete; jae metei ara oyuka ochociento kuimbae.

9Kuae jaɨkue rupi oï, Eleazar, ahohíta Dodo taɨ, jae ko jókuae mboapɨ jëia yae vae reta pegua vi. Kuae oï David ndive oñoraro vaerä filisteo reta kotɨ, Israel pegua reta opa oñemoäta jaɨkue kotɨ yave.

10Ërei kuae Eleazar opüa oñeraro jare oyuka filisteo reta ipo ikangɨ regua, ipo täta (oyepokuaa) ikɨsepuku iɨ re. Jókuae ara yandeYa omee oporomoamɨri yae vaerä. Jare opaete vae reta yogüɨraja Eleazar jaɨkue omonoo güeru jovaicho reta güi mbaembae opɨ̈rogüe.

11Eleazar jaɨkue oï Sama, ararita Age taɨ. Filisteo reta oyemboatɨ Lehi pe, joko pe oime lentejarupa, jare sundaro Israel pegua reta opa otekuarai filisteo reta güi.

12Ërei Sama oñemopüa jókuae lentejarupa mbɨte pe jare oepɨ filisteo reta güi; jare omoamɨri filisteo reta. Jökorai jókuae ara yandeYa omee oporomoamɨri yae vaerä.

13Metei ara, mbaarɨvo iara pe, treinta jëia vae reta güi yogüeru mboapɨ David pɨri ɨvɨkua Adulam pe. Jare filisteo reta jeyupa oï ɨvɨtɨ päu ipe kavi vae Refaim pe.

14David oï jayave metei o oñekëse kavi yae vae pe, sundaro filisteo reta ñogüɨnoi ramboeve Belén pe.

15David jei körai: “¡Kia mona omee jau ɨ ɨkua Belén jöke pe oï vae pegua!”

16Jayave jókuae mboapɨ jëia vae reta oike filisteo reta jeyupa pe, jare güɨnoe reta ɨ jókuae ɨkua Belén jöke pe oï vae güi jare güeru reta David pe. Ërei jae mbaetɨ oipota jou, opɨyere mbotarä yandeYa pe, jei reve:

17“¡CheYa tachemborɨ agüɨye vaerä jau! Echa, ¡kuae kuimbae reta jugüɨ jau vae ramita ko! Mano pe ko oñeñono reta opa ramboeve yogüɨraja güeru.” Jare mbaetɨ oipota jou.

Jókuae mboapɨ jëia vae reta oyapo kuae.

18Abisai, Joab tɨvɨ, Sarvia imembɨraɨe jae ko jókuae treinta vae reta itenondegua. Jae oyuka imii pe metei ara tresciento filisteo reta. Jökorai jërakua yae vi jókuae mboapɨ vae reta ndive.

19Abisai jërakua yae jókuae treinta vae reta güi, opɨta jae reta juvicharä, ërei mbaetɨ omboyovake jókuae tenondegua mboapɨ vae reta.

20Benaía, Joiada taɨ, kuimbae jëia yae vae, jeta mbaembae tuichagüe oyapo. Jae ko tëta Cabseel pegua. Jae oyuka mókoi reve yaguapope Moab pe. Metei ara iroɨ oa oï reve ogüeyɨ ɨvɨkua pe joko pe oyuka metei yaguapope.

21Oyuka vi metei Egiptoɨgua puku yae vae. Jókuae Egiptoɨgua güɨnoi ipo pe metei mii, ërei Benaía oepeña ɨvɨra pe, oipoekɨ imii güi jare pɨpe yeño oyuka.

22Kuae oyapo Benaía, Joiada taɨ, jërakua vi jókuae treinta jëia vae reta ndive;

23imboetea yae jókuae treinta reta güi, ërei mbaetɨ omboyovake jókuae tenondegua mboapɨ vae reta. Jare David oñono iyangarekoa reta juvicharä.

24Jókuae treinta vae reta pe ñogüɨnoi: Asael, Joab tɨvɨ; Elhanán, Dodo Belén pegua taɨ;

25Sama, Harod pegua; Elica, Harod pegua vi;

26Heles, Pelet pegua; Ira, Iques Tecoaɨgua taɨ;

27Abiezer, Anatot pegua; Mebunai, Husah pegua;

28Salmón, ahohíta; Maharai, Netofaɨgua;

29Heleb, Baana taɨ Netofaɨgua vi; Itai, Ribai Gabaa pegua taɨ; Benjamín iñemuña reta iɨvɨ pegua;

30Benaía, Piratón pegua; Hidai ɨ̈aka raɨ Gaas pegua;

31Abi-albón, Arabaɨgua; Azmavet Bahurim-ɨgua;

32Eliaba, Saalbim-ɨgua; Jonatán, Jasén iñemuña reta pegua;

33Sama, Arar-ɨgua; Ahíam, Sarar, Arar-ɨgua taɨ;

34Elifelet, Ahasbai Maaca taɨ; Eliam, Ahitofel Gilo pegua taɨ;

35Hezrai, Carmel pegua; Paarai Arab pegua;

36Igal, Natán Soba pegua taɨ; Bani, Gad pegua;

37Selec Amón iñemuña pegua; Naharai, Beerot pegua; jae ko Joab, Sarvia imembɨraɨe iyeopiaka ovoɨ chupe vae;

38Ira, Jatir pegua; Gareb, Jatir pegua vi;

39Urías, Het iñemuña pegua. Opaete reve treinta y siete kuimbae.