ZACARÍAS 2 - Guarani Bible with DC

Tembipɨɨ reta oñeenɨi

1Jaɨkue rupi amae aecha vi metei kuimbae ipo pe güɨnoi tɨmasa raɨ omaejäa pɨpe vae.

2Jare jae chupe: “¿Ketɨ pa reo?” Jae jei cheve: “Ayu ajäa Jerusalén aikuaa vaerä mbovɨ ra ipɨguasugüe jare mbovɨ ra ipukugüe vae.”

3Jare jókuae araɨgua imiari che ndive vae oë ojo, jare ko ïru araɨgua oë oövaiti.

4Jare jei chupe: “Esɨi ekua nemiari kunumi güɨnoi tɨmasa raɨ vae pe, körai: ‘Jerusalén ikëseambaeñota, kuimbae jare mbaemɨmba jeta yae vae jeko pegua.

5Ërei yandeYa jei: Che aïta chupe reta ikësearä tata rami, jare aïta ipɨte pe mbaemboetea peguarä.’ ”YandeYa güɨroasayepe imbae vae reta

6YandeYa jei: “Che ko opa pomoai moai kerupi, petekuarai añave ɨvɨtuguasu kotɨ güi.

7Sión pegua Babilonia pe peiko vae, petekuarai.”

8Echa yandeYa Imbaepuere yae ete vae chembou tëtaguasu reta pepogüɨrai pereeya vae pe kuae ñee ndive. “Echa opoko pere yave kia nunga vae, cheresäɨ kunumi re opoko rami ko.

9Mase, ko chepo añono jese reta, jembiokuai ae reta opɨ̈rota imbaembae reta chugüi.” Jökorai peikuaata yandeYa Imbaepuere yae ete vae ko chembou.

10YandeYa jei: “Petairari jare peyerovia Sión pegua reta, echa ko ayu, jare aikota pepɨte pe.”

11Oñemoïruta jeta tëtaguasu reta yandeYa re jókuae ara, jare jeita: “Toyogüɨreko chembaerä, che aikota jae reta ipɨte pe.” Jökorai peikuaata yandeYa imbaepuere yae ete vae ko chembou.

12Jare yandeYa güɨnoi yeta Judá imbae vae ɨvɨ oñeñono teea pe, jare tëta Jerusalén jekuae oiparavo yeta iyeupe.

13¡Tikïrii opaete vae yandeYa jóvai; echa jae ou jëta ikɨambaea güi!