1Kuimbae oiko kuae ɨvɨ pe yemoambeko rupi oiko vaerä,
ara ñavo iparavɨkɨ jepɨ chupe oikoasɨ katu rami.
2Tembiokuai oipotaecha küaraɨa pe oï tëi vae rami,
jare ara ñavo iparavɨkɨ jepɨ chupe vae, oäro rami.
3Jökorai aiko mbovɨ yasɨ tembiporara guasu rupi,
aropɨ̈tu pɨ̈tui aiporara vae.
4Cherupa pe aï yave jae:
¿Kërai yave ra akuera yeta ma?
Jare mbaetɨ chepuere ake köe-pota regua.
5Cherete tɨnɨe ma taso reta jare ñapiruata,
chepire ipeu jare oporomboyuguaru.
6Cheara reta iñäkua yae mbaepɨaa oñeësɨvo pɨpe vae güi,
jare oasa mbaetɨ reve cheräro.
7Nemaendúa, cherekove mbaeä etei ko nderóvai,
ngaraa ye aecha yerovia.
8Chereechase vae reta ngaraa ye ma chereecha.
Nde remae cheré yave, ngaraa ma chereecha,
echa mbaetɨta ma aï.
9Amapɨtu opa oyemboai jare okañɨ,
jökorai omanogüe reta ñogüɨnoia pe ojo vae, ngaraa ma oë ye.
10Ngaraa ma ou ye jo pe,
jo pegua reta ngaraa ma oecha ye.
11Jáeramo, ngaraa chekïrii.
Aiporara tëi reve chemiarita,
aiporara tëi reve amboetata.
12¿Ɨguasu ani mbaeporou ɨguasu pegua yera che,
reñono vaerä cheré omaeäro vae?
13Jae yave: “Cherupa pe tachepɨakatu,
topeɨ tomboasa chegüi chepɨatɨtɨ.”
14Jayave nde, chepaɨu rupi chemongɨɨye yae,
chepaɨu rupi cheiämondo yae.
15Jáeramo, aipotaecha ma nde chetïmbɨ jare chepɨ̈tupa amano,
tekove mbaetɨ aipota, manoño ko aipota.
16Añereröɨro ma, mbaetɨ ma aipota aikove aiko,
chereeya mbɨakatu pe, cherekove mbaeä etei ko.
17Tumpa, ¿mbae pa ko kuimbae, rembotuicha yae vaerä,
jare reyemoambeko yae vaerä jese?
18Ara ñavo remae jese,
jare rejäa aramoete ete.
19¿Kërai yave pa remae poita ayapogüe re,
chepuere vaerä añenɨvókoi yepe?
20Cheyoa yave, ¿mbae ikavimbae pa ayapo ndeve, kuimbae reta iYangarekoa?
¿Maera pa cheñono mbae reyembokuaakatu jese vae rami?
¿Mbae pe pa romboavai?
21¿Maera pa mbaetɨ reekɨ chegüi chepɨa pochɨ?
¿Mbaetɨ pa ndepuere neɨ̈ro cheve cheyoa re?
Jarembae amanota ete ma,
pɨareve chereeka yave, mbaetɨta ma aiko.
Who We AreWhat We EelieveWhat We Do
2025 by iamachristian.org,Inc All rights reserved.
