1Ana oyerure, jei körai:
“CheYa chepɨa oyerovia nderé
chemopɨ̈rata nde,
tamoë cheñee cherovaicho reta kotɨ.
¡Ayerovia yae chemborɨ vae re!
2¡Mbaetɨ kia iyoambae nde rami cheYa!
¡Echa mbaetɨ yé kia nde rami!
¡Jare mbaetɨ kia oporoepɨ nde oreTumpa rami!
3Agüɨye kia timiari ipɨayemboete reve,
agüɨye kia toyembotuicha yae iñee pe,
echa Tumpa opaete mbae oikuaa vae jae ko yandeYa,
jae ojäa opaete kuimbae jembiapo.
4Jae omboai imbaepuere vae reta jembiporu ñeraro pegua
jare omborɨ ipuerembae reta;
5tenonde yave jɨ̈vɨatase vae reta,
añave oñemee reta tembíu re;
ërei yɨmbɨaɨse vae reta
añave mbaetɨ ma yɨmbɨaɨ.
Kuña imembɨmbae vae reta,
chiu ma imembɨ,
jare jeta imembɨse vae reta,
añave ipɨtu opɨta.
6YandeYa oekɨ tekove,
jare jae omee tekove;
jae oporomondo omanogüe reta ñogüɨnoia pe,
jae oporogüɨnoe ye joko güi.
7YandeYa yandembou yandeparavete vaerä ani yaikokatu vaerä;
jae oporomomichi ani jae oporombotuicha.
8Jae güɨnoe paravete vae mbaravete güi,
jare jae güɨnoe paravete vae, ɨtɨ oyemomboa pe oyevɨka vae güi,
jare omboguapɨ mburuvicha reta ndive
omboguapɨ mburuvicha jenda re omboeteuka vaerä;
echa yandeYa imbae ko opaete ɨvɨ iguapɨka,
jare jese ko omboguapɨ kuae ɨvɨ.
9Jae oyangareko jupi rupi oiko chupe vae re,
ërei iyoa vae reta omanota pɨtumimbi pe,
echa mbaetɨ kia ave ipuere iyeugüi aeño.
10YandeYa omoamɨrita jovaicho reta,
yavaete yaeta ama-tiriri rami.
YandeYa ojäata opaete ɨvɨ pegua reta;
omeeta mbaepuere jae oiparavo mburuvicharä vae pe
jare jae ombotuichata imbaepuere.”
11Jare Elcana ojo ye jëta kotɨ Ramá pe, ërei kunumi raɨ opɨtaño oyeokuai yandeYa pe, sacerdote Elí iporookuai rupi.
Sacerdote Elí taɨ reta iyoa12Elí taɨ reta ko iyoa, jare mbaetɨ oipoɨu reta yandeYa güi.
13Jae reta köraiñoi oyapo tëta pegua reta: Kia nunga güeru mɨmba oyeyukagüe omee yandeYa pe yave, ombou jembiokuai soo oyɨ oï ramboeve, güeru ipo pe metei tɨ̈ai mboapɨ jakambɨ vae,
14jare omopöe jókuae tɨ̈ai yapepo pe, jare yapepo jiero itapa reve vae pe, jare opaete tɨ̈ai pe güɨnoe vae güɨraja sacerdote imbaerä. Körai avei oyapo reta opaete Israel iñemuña reta yogüeru yave tëta Silo pe.
15Jaeramiño vi ikɨragüe ndei oyeapɨ mbove mɨmba oyeyukagüe oyeapɨ jese vae re, ou sacerdote jembiokuai jei jókuae mɨmba oyeyukagüe omee vae pe: “Emee soo cheve aape vaerä sacerdote pe; echa mbaetɨta oipɨɨ ndegüi oyɨgüe jaeño oyɨmbae.”
16Jare jókuae kuimbae jei yave chupe: “Toyeapɨ räri ikɨragüe jare jaɨkue rupi eraja nde reipota vae.” Jayave tembiokuai jei: “¡Emee cheve añave voi! Echa mbaetɨ remee yave apɨ̈rota ndegüi.”
17Jökorai tuicha yae iyoa kuae kunumi reta yandeYa kotɨ, echa omboeteä mbota reta oñemee yandeYa pe vae.
18Ërei kunumi raɨ Samuel oyeokuai yandeYa pe, oyemonde temimonde iyɨvambae sacerdote pegua pe lino pegua.
19Jare ichɨ oyapo chupe metei temimonde michi raɨ vae, jare güeru chupe año ñavo ou yave ime ndive omee mɨmba oyeyukagüe oyapoñoi vae.
20Jayave Elí jei ñee kavi Elcana re jare jembireko re, jei reve: “YandeYa tomee ïru nderaɨ retarä kuae nderembireko imembɨ omee yandeYa pe vae jekovia pe.” Kuae jaɨkue rupi yogüɨraja ye jëta kotɨ.
21Jare yandeYa iporerekua Ana re. Opaete reve imembɨ mboapɨ kunumi mókoi kuñatai; jare kunumi Samuel okuakuaa yandeYa jóvai.
22Ërei Elí, indechi yae ma, jare oendu opaete taɨ reta oyapo Israel iñemuña reta pe vae, kuñatai reta oyeokuai o yemboatɨ renda jöke pe vae ave güɨroke reta.
23Jare jae jei taɨ reta pe: “¿Maera pa peyapo ikavimbae yae vae? Aendu opaete kuae tëta rupi ikavimbae yae peyapo vae.
24Agüɨye, cheraɨ reta, echa che aendu mbaetɨ perërakua ikavigüe pe, echa jökorai peyapouka mbaeyoa yandeYa imbae vae reta pe.
25Metei kuimbae iyoa yave japicha kotɨ, mburuvicha oporojäa vae reta ojäata; ërei metei kuimbae iyoa yave yandeYa kotɨ, ¿kia ra oñemoëta jese?” Ërei jókuae kunumi reta mbaetɨ oyandu tu jei chupe vae, echa yandeYa oyemongeta ma opa vaerä oyuka.
26Ërei kunumi Samuel jekuae okuakuaa jare jekuaeñoi omboyerovia yandeYa jare vi kuimbae reta.
27Jare ou metei kuimbae Tumpa iñeemombeúa Elí pɨri jare jei chupe: “Körai jei yandeYa: ‘Peñemuñagüe reta oyeokuai yogüɨreko Faraón jo pe Egipto pe yave, che ayekuaauka kavi chupe reta.
28Jare che aiparavo chesacerdoterä Israel iñemuña reta ipɨte güi, oyeokuai reta vaerä cheve mɨmba oyeyukagüe, jare oapɨ vaerä mbae ikäti kavi vae incienso, jare omonde vaerä temimonde iyɨvambae sacerdote pegua cheróvai.Ex 28.1-4. Jare amee chupe reta opaete mbota oyeapɨ vae, Israel iñemuña reta omee vae.Lv 7.35-36.
29¿Maera pa omboeteä mbota reta jare mɨmba oyeyukagüe oñemee cheve o yemboatɨ renda jöke pe vae? ¿Maera pa rembotenonde chegüi nderaɨ reta, remongɨra mbota reta ikavigüe Israel iñemuña reta omee vae pe?’
30Jáeramo, Israel iTumpa jei tëi tenonde yave neñemuñagüe reta pe, ndeve jare neñemuña reta oyeokuai vaerä chupe jekuae avei, ërei añave jei: ‘Ngaraa ma ayapo jökorai, amboeteukata chemboete vae reta, ërei chereröɨro vae reta aröɨrota vi.
31Mase, outa ara oväe romokañɨtei vaerä, nde jare neñemuña reta ndei indechi mbove opata omano.
32Reechata neñemuña reta oiporara, Israel iñemuña reta amboyekou ramboeve mbaembae re, jare mbaetɨta neñemuña reta indechi vae.
33Kuimbae nerëtara reta oyeokuai mɨmba oyeyuka oyeapɨ jese vae pe amoembɨre vae, reechata isusere jare jasɨ katu ndeve, opata omano taɨrusu reve.
34Kuae oikota ikañɨmaa ndeve vaerä, nderaɨ Ofni jare Finees omanota mókoi reve metei ara peño.
35Jare che aiparavota metei chesacerdoterä jupi rupi oiko vae, cheremimbota oyapo vae, ameeta chupe iñemuña oiko avei vaerä, jare oyeokuaita mburuvicha aiparavo vae jóvai ara ñavo.
36Jayave neñemuña güi opɨtaño vae outa oyetavatɨka oñemomichi reve sacerdote jóvai korepoti re, ani tembíu re jei reve: Romoñera remee vaerä mbaravɨkɨ cheve sacerdote reta ipɨte pe, chepuere vaerä akaru.’ ”
Who We AreWhat We EelieveWhat We Do
2025 by iamachristian.org,Inc All rights reserved.
