2 CRÓNICAS 7 - Guarani Bible with DC

1Jare Salomón opa oyerure yave, ou tata ara güi, jare opa oapɨ mɨmba oyeyukagüe opaeteita oyeapɨ vae, jare mɨmba oyeyukagüe reta,

4Jayave mburuvicha guasu opaete Israel iñemuña reta ndive omee mɨmba oyeyukagüe yandeYa pe.

5Jare mburuvicha guasu Salomón omee mɨmba oyeyukagüe vae: Veintidó mil toro jare ciento veinte mil vecha.

Jökorai mburuvicha guasu jare opaete vae oñono tee reta tupao guasu Tumpa pe.

6Jare sacerdote reta oyapo iparavɨkɨ, jaeramiño vi levita reta, tembiporu tairari pegua ndive, kuae temimbɨ reta oyapouka mburuvicha guasu David omboete vaerä yandeYa, jei reve: “Echa iporoparareko jekuae avei”, David ombaemboete yepi jókuae temimbɨ reta pe. Jaeramiño vi sacerdote reta omoñee mimbɨguasu jae reta jóvai, jare opaete Israel iñemuña reta oyemboɨ ñogüɨnoi.

7Jaeramiño vi Salomón oñono tee yandeYa itupao guasu joka, jöke jenonde oï vae, echa joko pe omee mɨmba oyeyukagüe opaetei oyeapɨ vae jare mɨmba oyeyukagüe yembopɨakatu pegua ikɨragüe, echa mɨmba oyeyuka oyeapɨ jese vae jiero iyu vae pegua Salomón oyapo vae, mbaetɨ iyave mɨmba oyeyukagüe opaetei oyeapɨ vae reta, mbota reta temitɨ jäɨ jare mɨmba ikɨragüe reta.

8Jayave Salomón oyapo arete chiu ara, jeta yeyé yatɨ vae, yogüeru Hamat güive ɨ̈aka raɨ Egipto kotɨ güi.

9Juría ara pe oyapo reta yemboatɨ guasu mbaemboete pegua, echa mɨmba oyeyuka oyeapɨ jese vae oñeñono tee vae omboarete reta chiu ara, jare chiu ara vi arete küaraɨa ñairaka pegua.

10Chiúa yasɨ veintitré araa pe opa omondo jeta vae reta jëta kotɨ, yerovia jare mbɨakatu yandeYa omborɨ ramo David, Salomón jare opaete Israel pegua reta.

Tumpa oyapo morogüɨrökuavee päve Salomón ndive(1 R 9.1-9)

11Salomón opa oyapo tupao guasu yandeYa peguarä jare o mburuvicha guasu iporookuaía peguarä; opaete Salomón oyemongeta ipɨa pe oyapo vaerä yandeYa jo pe jare jae jo iporookuaía peguarä vae, opa kavi oyapo.

12Jare yandeYa oyeechauka Salomón pe pɨ̈tu yave jare jei chupe: “Che aendu ndeyerure jare aiparavo cheyeupe kuae o mɨmba oyeyukagüe oñemee vae peguarä.

13Ayopia ara agüɨye vaerä okɨ yave, ambou tuku opa vaerä ñana jou ɨvɨ re yave ani ambou mbaerasɨ ovakatu vae chembae vae reta re yave,

14ërei chembae vae reta, jese reta cheree oyemboeteuka vae oñemomichi reve oyerure reta chereeka yave, jare oyepoepɨ reta jeko ikavimbae güi yave, che aenduta iyerure reta ara güi jare cheɨ̈rota chupe reta iyoa re, jare iɨvɨ pe oime yeta jeta mbaembae.

15Añave amaeta jare aendu aveita yerure oyeapo kuae güi vae,

16echa añave aiparavo jare añono tee kuae tupao guasu, pɨpe oiko vaerä cheree jekuae avei rupi. Amae aveita jare jeseita chepɨa.

17Jare nde reguata yave nderu David oguata rami, reyapo opaete cheporookuai reta yave,

18che amoañeteta ndeporookuaía nderu David pe arökuavee rami jae reve: ‘Ngaraa oata neñemuña güi metei kuimbae mburuvicha guasurä Israel pe.’2 S 7.11-16; 1 R 2.4.

19Ërei pe reta peyerova jare peeya cheporookuai reta amee peve vae, jare pemboete tumpa ambuae reta yave,

20pogüɨnoeta kuae ɨvɨ amee peve vae güi, jare kuae tupao guasu añono tee cheree re vae amombota cheróvai güi, oikota ïru tëta reta oyóyai yóyai vaeräño.

21Jare kuae tupao guasu ipöra yae vae jendagüeño opɨtata, jare opaete oasa jokoropi vae omopɨakañɨta jare jei retata: ‘¿Maera ra körai Tumpa oyapo kuae ɨvɨ jare kuae tupao guasu?’

22Jare jei retata iyeupe, oeya reta ramo iYa iñemuñagüe reta iTumpa ɨvɨ Egipto güi güɨnoe vae, jare tumpa ambuae pei oyeokuai jare omboete reta, jáeramo güeru opaete kuae mbae ikavimbae jese reta.”