ECLESIÁSTICO 8 - Guarani Bible with DC

Yeandu katu opaete mbaembae güi

1Agüɨye eñono tekorai metei imbaepuere vae pe,

reipotaä rea ipo pe yave.

2Agüɨye eñoraro metei oikokatu vae ndive;

ikorepoti ipoɨ yae ko, jaema neamɨrita ko.

Echa oro jeta ko ombotuicha vae,

jare mbaeyekou, omopüa omboyekuaa.

3Agüɨye eyovaicho metei imiari pota vae ndive:

Yepea tata pe yaitɨ rami ko.

4Agüɨye eguata iyarakuaa mbae reta ndive,

agüɨye vaerä nerenoti oyekuaagüe reta.

5Agüɨye emomarai mbaeyoa güi oyembopɨambuae vae;

nemaendúa katu opaete ko yandeyoa.

6Agüɨye emomarai metei indechi vae,

echa yande yandendechita vi ko.

7Agüɨye eyembotuicha kia omano ma vae güi;

nemaendúa opaete ko ñamanota.

8Agüɨye eröɨro iyarakuaa vae reta iporomboe;

eyemboe pɨagüive iñee yavaigüe re,

echa chugüi reta reipɨɨta yemboe reta,

jare jökorai ndepuereta reo tuicha vae reta jóvai.

9Agüɨye eröɨro indechi vae reta jeko,

jókuae ko jae vae reta iñemuña reta güi oendugüe.

Echa chugüi oikuaa retata iyarakuaa vaerä

jare jei kavi vaerä oime oata yave.

10Agüɨye jeko kavimbae jata emoïru,

reipotaä rékai pɨpe yave.

11Agüɨye esɨi imiari pota vae jovake,

remee vaerä chupe mbae oyapo ndekotɨ.

12Agüɨye eiporuuka kia má tuicha ndegüi vae pe,

jare oime mbae reiporuuka chupe yave, eñono remokañɨ ko vae.

13Agüɨye metei re embopɨauka kia má güɨnoi ndegüi vae pe,

jare remee ko yave, eyeapo nde ko ndepɨa vae.

14Agüɨye eñono ñeapo metei teko iñono kavía re,

echa mbaeyavɨ güi oñerenoe täi jae.

15Agüɨye eguata metei kuimbae pochɨ katu vae ndive,

reipotaä reiko pɨ̈chɨi vae rembojeiete yave;

echa jae ombosɨmbita ko ojo oipotaa kotɨ,

jaema nde reñemokañɨta ko iyarakuaa mbae jeko pegua.

16Agüɨye eyomboarasɨ metei kia pochɨ katu vae ndive,

jare agüɨye ekua ketɨ jupíe.

Echa chupe mbaeä etei ko oporoyuka vaerä,

jare mbaetɨ kia ndereepɨ vaerä yave, ndeyukata ko.

17Agüɨye nemiari ndeyé metei yarakuaambae pe,

echa ngaraa oñovatu kïri jókuae reregüe vae.

18Agüɨye mbae eyapo vɨari reikuaambae jóvai,

echa mbaetɨ reikuaa mbae oikota vae.

19Agüɨye eipea ndepɨa oipotagüe pe,

reipotaä vɨakatu ndereeya yave.