1Pemoñee peremimbɨguasu ñeraro pegua,
yandeYa imbae vae reta järoa rami,
echa pemboeteä cheporogüɨrökuavee
päve jare peäteɨ peyapo cheporookuai.
2Jökorai reve pesapúkai cheve körai:
‘¡Rokuaa ko nde, jae ko Israel iTumpa!’
3Ërei Israel pegua reta güɨröɨro ikavi vae,
jókuae jeko pegua tovaicho reta pembotekuarai.
4Pemboguapɨ peruvicha guasu retarä,
ërei mbaetɨ che aiparavogüe;
peñono peruvicha retarä, ërei che mbaetɨ aikuaa.
Pekorepoti jare peoro peyapo petumpa-raangarä,
pe reta aeño peñemokañɨtei.
5¡Samaria pegua reta,
pɨ̈chɨi yae ko cheve toro taɨrusu vae iä pemboete vae!
Chearasɨ yae ikotɨ.
¿Kërai yave pa peyetɨota?
6Echa Israel imbae vi ko kuae,
ipoki vae jembiapoño ko,
Tumpaä ko;
jaeramo opata ko oyemonguruvi,
jókuae toro taɨrusu vae iä Samaria itumpa.
7Echa ikavimbae peyapo jeko pegua, peiporara yaeta ko;
mbaetɨta pembaagüɨye,
mbaetɨta peremitɨ reta ia;
jare pemboɨru tëi yave,
opata ketɨgua reta jou pegüi.
8¡Israel pegua reta,
pekañɨteita aramoete pegua!
Ïru tëtaguasu pegua reta mbaeä eteita omae peré,
9echa pe reta peo Asiria pe mburika imasombae rami.
Efraín pegua reta omee mbota, iyaguasa pe oyeaɨuka vaerä.
10Yepe tëi omee mbota reta ïru tëtaguasu reta rupi,
ërei opata amboatɨ reta,
opa vaerä amoai moai,
jare oiporara retata michi pegua,
mburuvicha guasu jare imborɨa reta ikovara yae jeko pegua.
11Echa Efraín jeta omopüa mɨmba oyeyuka oyeapɨ jese vae,
ërei mbaeyoa omoïru iyeupe vaeräño omopüa reta.
12Yepe tëi aikuatía chupe jeta yemboe cheporookuai reta re,
ërei jae mbaeä etei omae jese.
13Jae reta omomora yae omee mɨmba oyeyukagüe, omee reta,
jare jou reta isoogüe;
ërei cheve mbaetɨ ikavi jókuae,
chemaenduata ikavimbae oyapo reta vae re,
aiporaraukata chupe reta iyoa re, amboyerova yeta Egipto kotɨ.
14Israel oyapo o reta ikavigüe,
ërei ñakañɨ iYapoa Tumpa güi,
Judá omopüa jeta tëta guasu reta jëguambae,
ërei che opata amboai tata pe jókuae tëta guasu reta,
jare mburuvicha guasu jo reta opata oyemboai.”
Who We AreWhat We EelieveWhat We Do
2025 by iamachristian.org,Inc All rights reserved.
