ECLESIÁSTICO 42 - Guarani Bible with DC

1Ërei ngatu, agüɨye eñemomarai kuae reta güi,

jare agüɨye eyapombae epɨta ndeporomboete jeko pegua:

2mborookuai reta jare ɨvate ete pe oï vae jeigüe vae,

reyapo vaerä mbae jupi rupi jare jeko vae pe reiporarauka vaerä;

3reï kavi vaerä neïru ndive ani ramo ndemombaravɨkɨ vae ndive,

jare remboyao kavi vaerä mbae opɨtagüe ani ramo mbae kia imbae;

4reiporu vaerä maejäa jaekavi vae,

agüɨye vaerä reporombotavɨ nemaejäa pe;

5reyapo vaerä tuicha vae reta jare michi vae reta ipɨa,

jare mbaerepɨ reroäse vaerä omaemee vae ndive;

jare reyopia aveita mbae nemichia reta güi,

jare tembiokuai jeko kavimbae reinupa vaerä;

6jare kuña jeko kavimbae eyokenda toï jare oyokenda,

kia jeta oïa pe oyeokenda mbae oï yave ndive;

7eipapa kavi kia korepoti omee ndeve yave,

jare emboguapɨ tupapire pe mbae kia pe remeegüe jare reipɨɨgüe;

8eyopia mbae iyarakuaambae reta güi,

jare ndechi ojo kuña imbokere vae reta pɨri vae.

Jare jökoraita añetete ndeyemboete,

jaema opaete vae ndearakuaa katuta omae nderé.

Yayangareko yanderayɨ reta re

9Kuñatai tu peguarä metei mbaeyekou jaekavimbae vae ko;

iyangareko ombojopeɨä ko.

Taɨrusu oï yave, oipoɨu omendambae oiko vaerä;

ani ramo ime ma yave, oipoɨu ime oeya ye vaerä.

10Jaegüɨrai vae ko yave, jare jekuaeño oiko tu re yave,

oipoɨu kia opokoiño vaerä jese jare ipurúa vaerä opɨta;

ime ma ko yave, jare ime re ma oiko yave,

oipoɨu ambuae vae ndive oiko vaerä ime güi, ani ramo opɨta imembɨmbae.

11Cheraɨ michi, emae ngatu nderayɨ jaegüɨrai oï vae re,

agüɨye vaerä güeru ndeve ñemoërakua pɨ̈chɨi,

miari reta jesegua tëta guasu rupi jare ñemomarai kia reta ipɨte rupi,

jare nde vi nemomarai yemboatɨa pe.

Ikea pe agüɨye toï ventana

jare jöke agüɨye toyeecha oipota rupi güi.

12Agüɨye ikavi toechauka oipotagüe kuimbae pe,

jare agüɨye tovɨa ïru vae kuña reta re.

13Echa temimonde güi ko oë mbae ikɨ,

jare kuña güi ko oë kuña jeko kavimbae vaerä.

14Má ko ikavi kuña ime pochɨ vae kuña ipɨakavi vae güi,

jare metei kuñatai imbaepoɨu vae oipotagüe oporomboete mbae vae.

Tumpa iparavɨkɨ reta

15Chemaenduata Tumpa oyapogüe re

jare chemiarita che etei aechagüe re.

Tumpa metei iñee omoe vae peño, opaetei mbae oyeapo,

jare oyapo opaete jae oipota vae.

16Kuaraɨ oë rupive, oesape oipota rupi;

jökorai Tumpa imbaepuere oyeecha opaete oyeapogüe re.

17Tumpa iaraɨgua reta ave ko

mbaetɨ ipuere opa oipapa Tumpa iporomopɨakañɨ.

Tumpa omee mɨ̈rata isundaro araɨgua reta pe

ñogüɨnoi vaerä jae jóvai.

18Jae ojäa ɨguasu tɨpɨgüe jare kuimbae ipɨa,

jaema opaete ko mbae oñeomi oï vae oikuaa chugüi reta.

Ɨvate ete pe oï vae re oikuaa opaete mbae,

jare jae oecha ñomai ko opaete mbaembae.

19Jae oikuaauka mbae oasagüe jare omoërakua mbae kuri oikota vae

jare oecha mbae má oñeomi oï vae.

20Mbaetɨ ko arakuaa jae güɨnoi mbae vae;

chugüi mbaetɨ etei ko mbae oñemi.

21Jae iyarakuaa ikavigüe vae täta ko ikavi;

jae ae ñomai ko arakae güive ma.

Mbaetɨ yé ma ko yamboarambogua vaerä ani ramo mbae yaekɨ vaerä chugüi;

jae mbaetɨ ko oeka kia omboe vaerä.

22¡Aa täta ipöra opaete mbae jae oyapogüe,

mbae michi overa michi vae pe ojo iyapɨ!

23Opaete oikove oï jare oiko oiko reta,

jaema oñeñovatu ñogüɨnoi oime mbae oata pegua.

24Opaetei ko mbae reta oyoavɨ avɨ,

jare mbaetɨ ko mbae oyapoiño.

25¡Omboyoaɨkuei kuei oechauka ikavigüe,

jare yandekuérai yé ko ñamae ipöragüe re!