PROVERBIOS 15 - Guarani Bible with DC

1Ñee yeaeä, omoröɨsa arasɨ;

ërei ñeeasɨ katu, ombojeiete arasɨ.

2Yarakuaa vae reta iñee, omopöra arakuaa;

ërei yarakuaambae reta iñee, ikavimbae yae ko.

3YandeYa omae oï opaete re, jeko kavi vae reta re jare

jeko kavimbae reta re.

4Ñee yeaeä, tekove katu ko;

ërei ñeeasɨ katu, oporombopɨatɨtɨ yae.

5Yarakuaambae, güɨröɨro tu iporomboarakuaa;

ërei yemboarakuaa oendu vae, yarakuaa katu ko.

6Jupi vae jo pe, jeta mbae güɨnoi,

ërei iyoa vae, opa omokañɨtei omonganagüe.

7Yarakuaa vae reta, omoai arakuaa iñee rupi;

ërei yarakuaambae reta, mbaetɨ jökorai.

8Ikaviä yae ko yandeYa pe, iyoa vae reta

omee mɨmba oyeyukagüe chupe yave,

ërei omboyerovia, jupi vae reta iyerure.

9YandeYa pe, ikaviä yae ko iyoa vae jeko,

ërei oaɨu, jupi rupi kavi oiko vae.

10Teko kavi oeya vae pe, yembosɨmbi jasɨ katu yae,

ërei yembosɨmbi güɨröɨro vae, omanota ko.

11YandeYa, oecha güɨnoi omanogüe ñogüɨnoia jare tɨvɨa,

¡vɨtei pa kuimbae reta iyemongeta!

12Iporoyóyai yoyaise vae,

mbaetɨ oaɨu omboeta chupe vae, mbaetɨ vi oñemoïru, yarakuaa katu vae reta ndive.

13Ipɨa oyerovia katu vae, jova kuera katu;

ërei ipɨatɨtɨ yae vae, ipɨarúi.

14Iyarakuaa vae, oeka arakuaa,

ërei yarakuaambae reta, omoïru iyarakuaambae.

15Mbɨatɨtɨ rupi oiko vae pe, ara reta ikaviä etei;

ërei yerovia katu rupi oiko vae pe, arete avei ko chupeguarä.

16Ikaviño ko mbaravete, yaipoɨu reve yandeYa güi yave,

oikokatu yae tëi reve ipɨatɨtɨ vae güi.

17Ikavi yae ko tembíu isoombae, mboroaɨu reve vae,

tembíu kavi, mboroaɨumbae reve vae güi.

18Kuimbae iyarasɨ katu vae, oporomoñoraro katu;

ërei mbaetɨ iyarasɨ raivi vae, omoröɨsa arasɨ.

19Iyakɨ vae pe, tape yuu katuai ko; ërei jupi vae reta jape ikavi yae ko.

20Iyarakuaa katu vae, omboyerovia tu; ërei yarakuaambae, güɨröɨro ichɨ.

21Yarakuaambae, oyeroviaño iyarakuaambae vae re;

ërei yarakuaa katu vae, ombosɨmbi jeko.

22Yemboarakuaa mbaetɨa pe, yemongeta reta opa oikomegua;

ërei yemboarakuaa jetaa pe, oë kavi yemongeta.

23¡Kuimbae omboyevɨ mbarandu vae, oyerovia,

vɨtei pa iara pe kavi omboyevɨ yave!

24Yarakuaa vae pe, tape tekove pegua ojo ɨvate kotɨ,

jökorai opia agüɨye vaerä ojo ɨ́vɨkotɨ, omanogüe reta ñogüɨnoia pe.

25YandeYa, omboai ipɨapochɨ vae reta jo,

ërei imemano vae omboyekou aveita opaete imbaembae rupi.

26YandeYa pe ikaviä yae ko, jeko kavimbae iyemongeta reta,

ërei omboyerovia, jeko kavi vae reta iñee kavi.

27Imbaepotarai vae, güɨrokomegua jo aeño;

ërei mbaemboepɨ vɨari güɨröɨro vae, oiko kavita.

28Jupi vae, ipɨa pe oyemongeta kavi omboyevɨ vaerä ñee;

ërei iyoa vae, jei ñee ikavimbae.

29YandeYa, mombɨrɨ oï iyoa vae reta güi,

ërei oendu, jupi vae reta iyerure.

30Okuera katu vae, yandemboyerovia;

mbae jërakua kavi vae, ñanemoäta ngatu.

31Yemboeta tekove pegua re oyeapɨsaka vae,

oikota, yarakuaa vae reta ipɨte pe.

32Yembosɨmbi güɨröɨro vae, jae aeño ko oñereröɨro;

ërei yembosɨmbi oendu vae, yarakuaa katu ko.

33YandeYa güiño yaipoɨu vae, yandemboe arakuaa katu re;

yayemboeteuka vaerä, tenonde ikavi ko ñañemomichi.