EZEQUIEL 17 - Guarani Bible with DC

Yembojaanga güɨraké re jare uva re

1YandeYa jei cheve körai:

2“Nde kuimbae, eyapo Israel iñemuña reta pe metei yembojaanga.

3Ere chupe reta:

‘YandeYa Tumpa jei körai:

Metei güɨraké tuicha vae ou oväe Líbano pe;

ipepo reta tuicha jare ipuku yae,

jeta jaa jare oipotagüe ipïra;

oipɨɨ ɨ̈vɨrare iyapokɨ,

4jare oakɨo iyapokɨ iyapɨte regua ete,

jare güɨraja oñotɨ omaemee vae reta iɨvɨ pe;

omaemee vae reta jëta guasu pe.

5Oipɨɨ vi jókuae ɨvɨ güi metei temitɨ jäɨ,

jare oñotɨ metei ɨvɨ kavi pe;

oñono ɨ tuicha vae jembeɨ pe,

ɨvɨra sause jee vae rami.

6Jókuae temitɨ jäi jeñɨi,

jare oyeapo metei uva jokɨ katu vae;

yepe tëi ɨ̈vɨi,

ërei jäka reta omondo güɨraké kotɨ,

jare japo reta ojo ɨ́vɨkotɨ.

Jökorai oyeapo uvarä;

jokɨ jare jeta jäka.

7Ërei oime vi ïru güɨraké tuicha vae,

tuicha ipepo reta jare jeta jaa.

Jayave jókuae uva japo reta

jare jäka reta omondo güɨraké kotɨ,

oyemboɨuka vaerä chupe,

mombɨrɨ jae oñeotɨa güi.

8Ërei ngatu ɨvɨ kavi pe oñeotɨ tëi oï,

ɨ tuicha vae iyɨpɨ pe,

joko pe ipuere vaerä jeta jäka jare ia,

jare oyeapo vaerä metei uva ikavi vae.’

9Ere chupe reta: ‘YandeYa Tumpa jei Körai:

Kuae uva ngaraa oiko.

Tenondegua güɨraké oapomondorota,

jare opata osururu ia reta,

jare opata yɨpi;

yavaimbae etei jare mbovɨ vae

ndiveño oapomondorota.

10Yepe tëi oñotɨ pɨau yeta

ngaraa ma oyepota;

ipiruta ɨvɨtuakuvo oipeyu yave.

Opata ipiru jókuae oñeotɨa pe.’ ”

11YandeYa jei cheve:

12“Eparandu kuae tëta ipɨapochɨ vae pe, oikuaa reta ra kuae oyembojaanga vae re. Ere chupe reta: ‘Mburuvicha guasu Babilonia pegua ou Jerusalén pe oipɨɨ mburuvicha guasu Judá pegua jare iyɨvɨrigua mburuvicha reta, jare opa güɨraja reta jupíe Babilonia pe.

13Javoi oiparavo metei mburuvicha guasu iñemuña pegua güi, jare oyapo morogüɨrökuavee päve jae ndive, jeiuka chupe Tumpa jee re oiko vaerä jae jeia re; jare güɨraja jupíe tuichagüe reta jókuae ɨvɨ güi,

14agüɨye vaerä ma Judá iporookuaía güɨnoi mbaepuere oñemopüa ye vaerä, jaeño morogüɨrökuavee päve ombopo vae rupi oikoño vaerä.

15Ërei kuae mburuvicha oñemopüa mburuvicha guasu Babilonia pegua re,2 R 24.15-20; 2 Cr 36.10-13. omondo jekovia pe kuimbae reta imiari vaerä Egipto pe, omee vaerä chupe kavayu reta jare jeta kuimbae. ¿Perovia pa kuae oyapo yave oasayepeta? ¿Ipuereta ra morogüɨrökuavee päve mbaetɨ ombopo vae oasayepe?

16Che jae cheyé aeño jei yandeYa Tumpa, omanota ko Babilonia pe, jókuae mburuvicha guasu oñono tëi mburuvicharä Judá pe vae oikoa pe, echa jae mbaetɨ ombopo iñee jare morogüɨrökuavee päve mburuvicha guasu ndive oyapo vae güɨrokomegua.

17Faraón ngaraa etei omborɨ sundaro jëia vae reta pe ani jeta vae reta pe, mburuvicha guasu Babilonia pegua opüa yave jese, oñono kavi yave yeupika reta ñeraro pegua, omokañɨtei reta vaerä jeta vae.

18Echa mbaetɨ ombopo iñee jare omboeteä morogüɨrökuavee päve; jae yepe oñererökuavee tëi, ërei oyapo ye kuae mbaembae reta. Jáeramo ngaraa oasayepe.

19Jáeramo, yandeYa Tumpa jei körai: Che jae cheyé aeño: Jae oyapoä oñererökuavee che ndive vae, jare omboeteä cheporogüɨrökuavee päve; jáeramo aiporaraukata chupe.

20Amombota chepɨsa jese jare aipɨɨta pɨpe; arajata Babilonia pe, joko pe ajäata mbaetɨ ramo jupi oiko cheve.Jer 37.1-2; 52.4-11; Ez 12.13.

21Jare isundaro reta jëia vae reta omanota ñeraroa pe, jare oasayepe vae reta opata oñemoai moai oipota rupi. Jayave pe reta chekuaata che ko jae peYa vae.

22Che ndeYa Tumpa jae körai: Che aipɨɨta vi jókuae ɨ̈vɨrare iyapokɨ iyapɨteasɨ regua jare añotɨta; jeñɨi kavi vae ayasɨata jare añotɨta metei ɨvɨtɨ ɨvate yae vae re.

23Ɨvɨtɨ ɨvate yae vae Israel pegua re añotɨta. Jokɨta jare iata jare oyeapota metei ɨ̈vɨrare ikavi yae vae. Oipotagüe mɨmba oikota igüɨ pe, jare oipotagüe güɨra reta oyapota jaitɨrä jäka re.

24Jare opaete ɨvɨra reta oikuaata che ko jae peYa vae. Che amboai ɨvɨra ɨvate yae vae, jare amboɨvate ɨvɨra ɨ̈vɨi vae; che amboɨpi ɨvɨra jokɨ vae, jare ɨvɨra yɨpi vae ambojokɨ. Che peYa jae kuae, jare ayapota.’ ”