1Kuaekuae jaɨkue rupi Nahas omano, jae ko Amón iñemuña reta juvicha guasu, jare taɨ Hanún oï mburuvicha guasurä jae jekovia pe.
2Jayave David jei:
—Tamboyekuaa cheporoparareko Hanún, Nahas taɨ re, tu oyapo cheve rami.
Jare David omondo imborɨa reta ombopɨakatu vaerä Hanún, tu imano re. Ërei opa ma yogüɨraja oväe Amón iñemuña reta iɨvɨ pe yave,
3mburuvicha jókuae ɨvɨ pegua reta jei juvicha guasu Hanún pe: “¿Rerovia pa David ombou kuae reta omboete nderu ramo, ndembopɨakatu vaerä nderu imano re? ¡Ombou ko oipïaro jare omae reta kuae ɨvɨ re, opa vaerä omboai!”
4Jayave Hanún opa oipɨɨ David jembiokuai reta, jare oñapi jañɨka-raa mbɨte rupi, oyasɨa vi jemimonde chugüi reta jevi rupi jare opa ye omondo reta.
5David oikuaa jókuae yave omondo oövaiti reta vaerä jei reve chupe reta: “Pepɨta Jericó pe, okuakuaa ye perañɨka-raa regua, jayave ramo peyu ye.” Echa jae reta imara yae yogüɨreko reta.
6Jare Amón iñemuña reta oikuaa oñemotareɨuka yae David pe ramo, omondo güeruruka omboepɨ reve sundaro reta Siriaɨgua Bet-rehob pegua jare Soba pegua, veinte mil kuimbae reta ɨvɨ rupigua, jare mburuvicha guasu Maaca pegua mil kuimbae ndive, mburuvicha guasu Is-tob pegua doce mil kuimbae ndive.
7Jare David oikuaa jókuae regua yave omondo Joab opaete sundaro jëia vae reta ndive.
8Jare Amón iñemuña reta oyeapo kavi ñeraro peguarä tëta guasu jöke pe etei; ërei Siriaɨgua sundaro reta Soba jare Rehob pegua, Is-tob pegua jare Maaca pegua isundaro reta ñogüɨnoi ïkotɨa kaa pe.
9Jare Joab oecha oporepeñata jese tovaicho reta jóvai kotɨ güi jare ikupe kotɨ güi yave, oiparavo sundaro jëiagüe Israel iñemuña reta güi, javoi oyeapokatu oñeraro vaerä Siriaɨgua reta ndive,
10jare opaete ïru sundaro reta oeya tɨvɨ Abisai ipo pe, omboyupavo oñeraro reta vaerä Amón iñemuña reta ndive,
11jare jei: “Siriaɨgua reta jëia yae chegüi yave, nde ekua chemborɨ; ërei Amón iñemuña reta jëia yae ndegüi yave, che tayu toromborɨ.
12Eñemoäta ngatu, ñañemoäta ngatu ñañoraro ñanerëtaguasu re, jare tëta guasu reta pɨpegua Tumpa imbae reta re. ¡Jare yandeYa toyapo jaekavi chupe vae!”
13Jayave Joab jare isundaro reta oporepeña Siriaɨgua reta re, oñeraro vaerä jae reta ndive; ërei jae reta opa otekuarai.
14Jare Amón iñemuña reta oecha Siriaɨgua reta otekuarai yave, jae reta opa vi otekuarai Abisai güi, opa yogüɨraja reta oñepɨ̈ro tëta guasu pe. Jayave Joab mbaetɨ ma oñeraro jae reta ndive, oyerova ye Jerusalén kotɨ.
15Ërei Siriaɨgua reta oecha oñemoamɨriuka Israel iñemuña reta pe yave, oyomboatɨ reta ye.
16Mburuvicha guasu omondo oenɨiuka Siriaɨgua reta ɨ̈aka Éufrates jovaicho kotɨgua, jare yogüeru reta tëta Helam pe. Juvicharä güɨnoi reta Sobac, Hadad-ezer isundaro reta itenondegua ete.
17Jókuae omombeu reta David pe yave, jae opa omboatɨ opaete Israel pegua sundaro reta, oasa reta ɨ̈aka Jordán jare opa yogüɨraja oväe Helam pe. Joko pe Siriaɨgua reta oñeraro David ndive,
18ërei Siriaɨgua reta opa otekuarai, echa David oyuka seteciento sundaro käretou pegua reta, jare cuarenta mil sundaro kavayu regua reta; ombopere vi Sobac sundaro reta itenondegua ete jare omano joko pe.
19Jayave opaete mburuvicha guasu reta omborɨ Hadad-ezer vae oecha oñemoamɨriuka Israel iñemuña reta pe yave, oyapo reta mbɨakatu jae reta ndive jare oyeokuai reta chupe reta; jókuae güive Siriaɨgua reta okɨɨye ma omborɨ Amón iñemuña reta.
Who We AreWhat We EelieveWhat We Do
2025 by iamachristian.org,Inc All rights reserved.
