JOSUÉ 18 - Guarani Bible with DC

Ïru ñemuña reta iɨvɨ

1Opaete Israel iñemuña reta oyomboatɨ Silo pe, jare joko pe omopüa reta o guakapi pegua opɨ̈ro güire ɨvɨ,

2ërei Israel iñemuña reta güi chiu ñemuña vɨteri oata güɨnoi vaerä ɨvɨ.

3Jayave Josué jei Israel iñemuña reta pe: “¿Mbae pa peäro peo vaerä pepɨ̈ro jókuae ɨvɨ, yandeYa peñemuñagüe reta iTumpa omee peve vae?

4Peiparavo mboapɨ kuimbae ñemuña ñavo güi, che amondo vaerä omae reta opaete ɨvɨ re, ipuere vaerä oyemboyao ɨvɨ jae reta yogüeru imiari jese rami.

5Jare jókuae kuimbae reta tomboyao ɨvɨ chiu yemboyao pe, jare Judá iñemuña reta topɨta iɨvɨ pe ae, arayevɨ kotɨ, jare José iñemuña reta topɨta iɨvɨ pe ae, ɨvɨtuguasu kotɨ.

6Pe reta peikuatía peru jókuae ɨvɨ iä chiu yemboyao pe, jare peru cheve, jare che ayapota suerte kuae pe yandeYa Tumpa jóvai.

7Ërei Leví iñemuña reta pe mbaetɨta ɨvɨ oyemboyao pepɨte pe, echa jae reta ko yogüɨrekota sacerdoterä yandeYa pe. Gad jare Rubén iñemuña reta jare Manasés iñemuña reta oyemboyaogüe oime ma güɨnoi reta iɨvɨ, ɨ̈aka Jordán jovaicho kotɨ kuaraɨ oëa kotɨ, Moisés yandeYa jembiokuai omee chupe reta vae.”

8Jayave jókuae kuimbae reta ɨvɨ iä oikuatiata vae opüa yogüɨraja yave, Josué jei chupe reta: “Pekua opaete ɨvɨ rupi jare pemboyao, jare peyerova ye opa peyapo yave, che ayapo vaerä suerte kuae Silo pe, yandeYa jóvai.”

9Jayave jókuae kuimbae reta opa yogüɨraja jare oguata reta opaete ɨvɨ rupi, omboyao reta tëta guasu reta chiu yemboyao pe, jare oikuatía reta güeru iä. Javoi yogüeru ye Josué oïa pe, teyupa pe, Silo pe.

10Jayave Josué omboyao ɨvɨ suerte rupi yandeYa jóvai Silo pe, jökorai omboyao ɨvɨ Israel iñemuña reta imbaerä.

Benjamín iñemuña reta iɨvɨ

11Ɨvɨ oyembosuerte Benjamín iñemuña reta imbaerä jëtara ñavo rupi yave, oë chupe Judá jare José iñemuña reta iɨvɨ ipäu pe.

12Kuae ɨvɨ jembeɨ oyemboɨpɨ ɨvɨtuguasu kotɨ güi, ɨ̈aka Jordán güive, jare oyeupi Jericó güi ɨvɨtuguasu kotɨ rupi; joko güi oyeupi ɨvɨtɨ guasu re, kuaraɨ oikea kotɨ jare oë ojo ñuu Bet-avén pegua pe.

13Joko güi oasa Luz kotɨ arayevɨ kotɨ rupi (jae ko Bet-el), jare Atarot-adar güi ogüeyɨ ɨvɨtɨ guasu oï Bet-horón ɨvɨpe pegua güi arayevɨ kotɨ vae re;

14joko güi ombosɨmbi kuaraɨ oikea kotɨ, Bet-horón jenonde ɨvɨtɨ guasu oï vae güi arayevɨ kotɨ rupi; jare ojo oë Quiriat-baal pe (jae ko Quiriat-jearim), Judá iñemuña reta jëta guasu. Kuae ko jae ɨvɨ jembeɨ kuaraɨ oikea kotɨ rupi.

15Arayevɨ kotɨgua ɨvɨ jembeɨ oyemboɨpɨ Quiriat-jearim jembeɨ güive, oë ojo kuaraɨ oikea kotɨ, ɨesaɨ Neftoa pe,

16javoi kuae ɨvɨ jembeɨ ogüeyɨ ɨvɨtɨ päu Hinom jóvai ɨvɨtɨ guasu oï vae iyapɨ kotɨ, ɨvɨtɨ päu Refaim güi ɨvɨtuguasu kotɨ. Joko güi ogüeyɨ ɨvɨtɨ päu Hinom kotɨ, jebuseo reta güi arayevɨ kotɨ rupi Jebús ikúa rupi arayevɨ kotɨ jare joko güi ogüeyɨ ɨesaɨ Rogel pe.

17Javoi ombosɨmbi ɨvɨtuguasu kotɨ jare oë ojo En-semes pe, joko güi oasa Gelilot kotɨ, ɨvɨtɨ ikúa Adumín jee vae jóvai oï vae kotɨ, jare ogüeyɨ Bohán, Rubén taɨ iyeita oïa kotɨ;

18javoi oasa Arabá jóvai rupi, jare ogüeyɨ jókuae Arabá pe,

19jare oasa Bet-hogla güi ɨvɨtuguasu kotɨ rupi jare ojo iyapɨ Ɨguasu Jembochɨ vae pe, ɨguasu ipɨmiía pe, ɨvɨtuguasu kotɨ oï vae pe, ɨ̈aka Jordán ou oyeaa pe, arayevɨ kotɨ. Kuae ko jae ɨvɨ jembeɨ arayevɨ kotɨ.

20Jare ɨ̈aka Jordán jae ko oï ɨvɨ jembeɨrä kuaraɨ oëa kotɨ. Kuae jae ko Benjamín iñemuña reta jëtara ñavo rupi iɨvɨ jembeɨ.

21Tëta guasu reta, Benjamín iñemuña reta jëtara ñavo pe oyemboyao vae jae ko: Jericó, Bet-hogla, ɨvɨtɨ päu Casis,

22Bet-arabá, Zemaraim, Bet-el,

23Avim, Pará, Ofra,

24Quefar-haamoni, Ofni jare Geba; doce tëta guasu; tëta guasu ñavo güɨnoi tëta raɨ raɨ.

25Ïru tëta guasu reta jae ko: Gabaón, Ramá, Beerot,

26Mizpa, Cafira, Mozah,

27Requem, Irpeel, Tarala,

28Zela, Elef, Jebús (jae ko Jerusalén), Gabaa jare Quiriat; catorce tëta guasu; tëta guasu ñavo güɨnoi tëta raɨ raɨ. Kuae ko jae Benjamín iñemuña reta iɨvɨ jëtara ñavo rupi.