HABACUC 3 - Guarani Bible with DC

Habacuc iyerure

1Kuae jae ñeemombeúa Habacuc iyerure sigionot.

2CheYa Tumpa, aendu nderegua,

jare opaete reyapogüe yave, chepɨakañɨ yae.

Tenonde rupi mbae tuichagüe reyapo vae eyapo añave oreve, roikuaa vaerä vi.

Eechauka oreve ndeporoparareko, yepe tëi ndearasɨ reve.

3Tumpa ou ɨvɨ Temán güi:

Tumpa Iyoambae ou ɨvɨtɨ Parán güi.

Iyemboetea oñemoai opaete ara re jare opaete ɨvɨ tɨnɨe imbaemboetea.

4Jembipe, köe jembipe ou rami,

ipo güi overa jembipeasɨ,

jökorai omboyekuaa imbaepuere güɨnoi vae.

5Jenonde yogüeru mbaerasɨ yavaetegüe oporoyuka vae jare jaɨkue takuasɨ.

6Jae oyemboɨ yave ɨvɨ okana

tëta guasu ipo reta orɨrɨi jae omae jese reta yave;

ɨvɨtɨ guasu reta ñɨma yae vae osururu jare opa oyemboai;

Tumpa jemimbota reta ko opambae.

7Che aecha Cusán pegua reta oiporara yae

jare Madián pegua reta, orɨrɨi okɨɨye güi.

8CheYa, ¿ndearasɨ pa ɨ̈aka reta kotɨ?

¿Ndearasɨ pa ɨguasu reta kotɨ?

¿Jaerä pa repo ndekavayu reta re jare reyeupi nekäretou pe ñeraro regua rami?

9Uvɨ oñerenoe jɨru güi reporoɨ̈vo pɨpe vaerä.

Nderee re aeño rere ñemuña reta pe vae oyembopo ko,

ɨ pe reyapo ɨ̈aka-soro.

10Ɨvɨtɨ reta okana ndereecha yave,

ara güi oa ama tuichagüe,

ɨguasu tɨpɨ vae jɨapu

ɨaparúa reta opüa ramboeve.

11Kuaraɨ jare yasɨ opɨta jenda pe,

nderuvɨ jembipe, jare nemii jembipe yae vae oecha reta yave.

12Ndearasɨ reve repɨ̈ro opaete ɨvɨ;

tëtaguasu reta re repɨ̈ro ndearasɨ rupi.

13Reyu reepɨ ndembae vae reta, nderembiparavo reta.

Jeko kavimbae reta juvicha remboai jare iyɨvɨrigua reta.

14Itenondegua reyuka imii raɨ pe ae,

ama ɨvɨtuai reve rami yavaete oporepeña yave ikavayu regua reta opa vaerä omoai moai ipuerembae vae reta,

omboai vaerä paravete vae reta oikuaambae reve.

15Ndekavayu re remboapɨ opaete ɨguasu

ipɨguasu ɨ tɨrɨyɨi vae.

16Opaete kuae aendu yave ayandu akɨɨye yae,

jare cherembe osɨsɨi,

chekägüe reta opa jëogüe,

opaete cherete orɨrɨi.

Jökorai reve aäro pɨagüiveta Tumpa ombou mbɨatɨtɨ vae iara pe,

jókuae sundaro reta yogüeru oremboai vaerä yave.

17-18Amboeteta, yepe tëi mbaetɨ ipotɨ ɨva, ani mbaetɨ uvarupa pe ia uva jare ɨvɨra olivo;

yepe tëi ko pe mbaetɨ mbaagüɨye;

yepe tëi mɨmbarókai pe opa vecha reta

jare guaka mbaetɨ jókai pe.

Jeseve ayerovia yaeta,

cheYa chereroasayepe vae re.

19Echa cheYa Tumpa omee cheve

mɨ̈rata chetɨma isɨrɨkɨ vaerä guasukaka rami

jare chereraja ɨvatea pe aasayepe vaerä.