1Ojo kaaru ma yave, Holofernes jembiokuai reta aramoete opa ojo. Bagoas oyokenda öke ikatu kotɨgua, jare opa omoë opaete mburuvicha pɨri ñogüɨnoi vae reta. Opa yogüɨraja oke, echa opa ikangɨ reta, arete puku yae ete oyapo reta jeko pegua.
2Judit opɨta jaeño joko pe, jare Holofernes täta osavaɨpo, oyepɨso oï tupa pe.
3Jare Judit yepe jei ma jembiokuai pe opɨtaño vaerä ikatu pe jae oïa güi, jare joko pe oäro vaerä jae oë regua, ara ñavo oyapo rami, echa jei yepe chupe jae oëta ko ojo oyerure vae, jare Bagoas pe jökorai vi yepe jei.
4Opaetei ma yogüɨraja vae, jare mbaetɨ etei kia opɨta joko pe. Jaema Judit opüa oyemboɨ Holofernes jupa iyɨke pe jare jei ipɨa pe: “CheYa, Tumpa imbaepuere vae, eiparareko emae cheré kuae añave ayapota aï Jerusalén pe yerovia oiko vaerä vae re.
5Kuae jae ko añave nerëta ipo reta remborɨ vaerä vae jare toiko cheyemongeta jei rami amokañɨtei vaerä tovaicho reta oñemopüa orekotɨ vae.”
6Jaema jayave ojo tupa iñäka kotɨ, Holofernes iyakandɨta oïa kotɨ, jare ombogüeyɨ kɨsepuku oï joko pe vae.
7Jare ojo oyemboya jupa re, oipɨɨ iñäka ia pe jare jei: “CheYa Israel iTumpa añave emee cheve mbaepuere.”
8Jare jökorai rupive jókuae kɨsepuku mókoi ye oiporu Holofernes iyayu re, jare oñäka-sɨa.
9Jare omboyapayere jete tupa güi jare oyeekɨ jókuae o ipɨ̈rata oï jese vae. Jökorai rupive oë ojo ikatu pe jare omee jembiokuai pe Holofernes iñäkagüe.
10Jare jae oñono güɨrave Judit imbaerɨru pe. Jupivei mókoi reve voi oë joko güi jare yogüɨraja oyerure, ara ñavo oyapo reta rami aeño. Oasa yogüɨraja teyupa rupi, ogüeyɨ reta ɨvɨtɨ päu rupi jare ojo oyeupi reta Betulia ɨvɨtɨ re jare jökorai yogüɨraja oväe tëta guasu jöke pe.
Judit oyerova yee Betulia pe vae11Matɨ peve, Judit osapúkai öke järoa reta pe:
—¡Peipea öke! ¡Peipea öke! ¡ÑaneTumpa oime oï yande ndive, jekuaeñoi Israel pe oechauka güɨnoi mɨ̈rata jare mbaepuere tovaicho reta kotɨ! ¡Añave oime jókuae oyapo oï!
12Jare kuimbae reta jókuae tëta pe ñogüɨnoi vae oendu jökorai osapúkai vae yave, aramoete pegua ogüeyɨ reta tëta guasu jöke pe jare oenɨi ndechi reta.
13Jare opaete vae ma osɨi yogüeru vae, mbaetɨ güɨrovia mbatee reta Judit ko ou ye vae. Oipea reta chupe öke, jare omoinge reta omoendɨ reta ma jata oecha kavi vaerä, jare yatɨ reta ma jese.
14Jaema Judit, iñeeäta reve jei chupe reta:
—¡Pemboete Tumpa, pemboete! ¡Pemboete Tumpa, echa jae iporoparareko mbaetɨ ko oikuaku Israel-ɨgua reta güi, jare kuae pɨare chepo pe opa oyakambɨ jovaicho reta!
15Jaema oekɨ imbaerɨru güi äkagüe, oechauka jare jei chupe reta:
—¡Pemae ko oï Holofernes iñäkagüe, jae ko Asiriaɨgua sundaro ruvicha tuicha vae! ¡Jare ko oï itondo jae igüɨ pe osavaɨpo yave oyapakua vae! ¡CheYa etei ko oyuka metei kuña ipo rupi!
16¡Jare Tumpa rovake, jae ko chemborɨ opaete mbae ayapo vae rupi! Chepöra vae ko ombotavɨ oñemokañɨteiuka vaerä, ërei jae mbaetɨ etei mbae nunga mbaeyoa oyapo che ndive, chemongɨa vaerä vae ani ramo chemomaraiuka vaerä vae.
17Jare opaete tëta ipo reta täta omopɨakañɨ, jare opareve itindɨ reta omee vaerä mbaemboete Tumpa pe jare metei rami jei reta:
—¡Yamboete ñaneTumpa, echa kuae ara jëta ipo jovaicho reta oñono ñemomarai pe!
18Jare Ozías jei chupe reta:
—¡Cherayɨ, Tumpa ara pe oï vae tandembotuicha opaete ɨvɨ pe oï vae kuña reta güi! ¡Yamboete Tumpa yandeYa, jae ko ara jae ɨvɨ iyapoa, jare jae ko nde reraja reyasɨa vaerä yanderovaicho reta itenondegua iñäka!
19Ndeporogüɨrovia reechauka vae güi ngaraa ye ko kuimbae reta iñakañɨ, imaendúa avei retata Tumpa imbaepuere re.
20Tumpa toipota jare kuae reyapogüe toyekuaa toiko ndeve vi jare tomee ndeve mbaeyekou echa jae ndemborɨ vae rupi ko reñono reiko nderekove reroasayepe vaerä ñanerëta tembiporara güi, jare orereroasayepe vi maemegua güi jare ojo oë kavi ndeve ndeyemongeta.
Jare opaete tëta ipo reta jei:
—¡Jökorai toiko! ¡Jökorai toiko!
Who We AreWhat We EelieveWhat We Do
2025 by iamachristian.org,Inc All rights reserved.
