ESTER (gr) 3 - Guarani Bible with DC

Mardoqueo jare Amán

1Mbovi ara ye jaɨkue rupi, mburuvicha guasu Artajerjes omboyeupi Amán, Amedata taɨ, jae ko Bugai iñemuña, metei mborookuai tuicha vae pe, oiko vaerä tenondeguarä opaete mburuvicha guasu ivɨaka reta pe.

2Jare opaete vae mburuvicha guasu pe oyeokuai vae reta oyevatɨka vaerä chupe, echa jökorai mborookuai omee mburuvicha guasu; ërei Mardoqueo mbaetɨ oyapo.

3Jare mburuvicha guasu jembiokuai reta oparandu Mardoqueo pe maera ra ko jae mbaetɨ oyapo mburuvicha guasu mborookuai omeegüe vae.

4Jaema jökorai opa ara rupi oparandu reta chupe jókuae re, ërei jae mbaetɨ oyapo chupe reta jeigüe vae, jare ojo reta omombeu Amán pe Mardoqueo mbaetɨ mburuvicha guasu jeigüe vae oyapo vae. Ërei Mardoqueo jei ma vi chupe jae ko judío vae.

5Jaema Amán oikuaa ma yave Mardoqueo mbaetɨ ko oyevatɨka chupe vae yave, ou täta iyarasɨ jókuae re,

6jare oñono opa vaerä ombopaa opaete judío reta yogüɨreko Artajerjes iɨvɨ pe vae.

Mborookuai opa vaerä judío reta oñemokañɨtei

7Payandepo mókoi año ye ma oiko mburuvichara Artajerjes, Amán oñono ara jare yasɨ opa vaerä omokañɨtei, metei ara peño, Mardoqueo jëta ipo reta yogüɨreko vae, jare oë ojo payandepo ara güi mboapɨ ara ye ma Adar iyasɨ re yave.

8Jaema Amán ojo jei mburuvicha guasu Artajerjes pe:

—Oime oñemoai yogüɨreko opaete tëta reta rupi kuae ndeɨvɨ pe vae mburuvicha guasu, oime oiko metei mborookuai ambuaeyee güɨreko opaete vae güi vae, jare jae mbaetɨ oyapo ndeporookuai mburuvicha guasu. Jaema mbaetɨ ko jaekavi jókuae reta jökoraiño oiko vaerä ndeɨvɨ japɨpe rupi mburuvicha guasu.

9Jaema, mburuvicha guasu ndeve jaekavi vi ko yave, toñemoërakua metei mborookuai jare tei opa vaerä oñemokañɨtei reta. Jare che, che aeño pe, ameeta tresciento treinta mil kilo korepoti mburuvicha ikorepoti jɨru pe.

10Jaema mburuvicha guasu oekɨ ipoäka-vera jare omee Amán pe pɨpe ombosello vaerä mborookuai judío reta peguarä vae,

11jare jei chupe:

—Enoiño ndeyé jókuae korepoti. Ërei jókuae tëta ipo reta pe eyapo ndepɨapotaa.

12Payandepo ara güi mboapɨ ara ye ma tenondegua yasɨ pe jókuae año re yave mburuvicha guasu opa oeka jembiokuai mbaekuatía regua reta, jare jae reta opoko oikuatía Amán mborookuai jeigüe vae opaete ciento veintisiete provincia rupi oï vae tëta ruvicha reta pe, India güive Etiopía pe iyapɨ, jare ïru vae tëta guasu ruvicha reta rupi. Jare jókuae mborookuai oyekuatía ko tëta ñavo oï vae iñee ae pe, mburuvicha guasu Artajerjes mborookuai omee rami,

13jare jupivei omondo reta ñeereroataa reta ndive opaete provincia ñavo vae rupi. Jókuae mborookuai pe jei metei ara peño yasɨ docea pe, jae ko Adar iyasɨ re opaetei vaerä oñemokañɨtei judío reta jare opa vaerä opɨta jae reta ipo pe imbaembaegüe reta.]

Tembikuatía mborookuai regua

13aKuae jae tembikuatía ojo vae güi oyeekɨ vae:

“Mburuvicha tuicha vae Artajerjes ciento veintisiete provincia rupi oï vae tëta ruvicha reta pe, India güive Etiopía pe iyapɨ vae, jaeramiño vi ïru vae mburuvicha raɨ raɨ reta pe.

13bChe, jae mburuvicha guasu opaete vae tëta pegua jare yemboetea opaete ɨvɨ pegua vae, aipota ramo opaete cheɨvɨ ipo reta yogüɨreko kavi, jare opaete reve vae yaeka vaerä yaiko pɨagüive vaerä yandeɨvɨ iyapɨa rupi, jare oiko vaerä pɨakatu opaete pe, echa jókuae ko opaete vae yaipota oyoupe. Kuae ayapo ayembotuicha aiko jeko peguaä ko, aipota opaete vae juvicharä aiko mboroaɨu rupi jeko pegua ko.

13cAparandu reve cheivɨrɨgua reta pe kuae ayapo vaerä vae re, jare Amán jei cheve mbae ayapo vaerä vae. Echa jae ko oyekuaa oiko yandepɨte rupi yemongeta kavi rupi vae, jare opaete omae jese jae ko iporoaɨu vae jare jupi vae; jókuae ramo ko jae oiko oporookuai vaerä vi mburuvicha jëta pe.

13dAmán imiari cheve vae jae ko, oime opa jei vae yayea yea yaiko kuae ɨvɨ pe vae, oime tovaicho yogüɨreko vae reta, jae reta iporookuai ambuaeyee opaete vae tëta reta güi vae, jare mbaetɨ ete mburuvicha iporookuai oyapo reta vae, jare jókuae rupi jeta yemboavai omee reta cheve mbae ayapo kavita tëi vae pe.

13eJókuae jeko pegua, jare jókuae tëta ipo reta jaeño ete ko opaete mbae rupi omee yemboavai vae, ambuaeyee etei jeko reta, jae reta mborookuai ambuaeyee ete kavi güɨreko vae jeko pegua, jaema che mborookuai amee vae güɨröɨro reta jeko pegua jeta ma ko oporoyuka reta, jaema jókuae rupi yandemboavai reta yaiko vaerägüe kuae ɨvɨ pe,

13fopaete jókuae mborookuai reta Amán, cheporookuai pe ministro oiko vae jare jae ko chevegua cheru rami oiko vae, jae etei jembikuatía omondota vae pe, opaete jembireko reve reve jare imicha reta reve reve, topa toyeyuka reta jovaicho reta ikɨsepuku pe, yopararekombae reve jare mboroaɨumbae reve, payandepo irundi ara ye ma yasɨ docea re, Adar iyasɨ re, kuae año pe.

13gJökorai, kuae reta añave rupi jare kugüive ma tovaicho yogüɨreko vae, metei ara peño topa tomano reta jarembae pegua vae, jare joko güive tenonde kotɨ che taporookuai pɨagüive kavi taiko pɨakatu reve.”

[

14Kuae tembikuatía güi oyekuatía yoapɨ yegüe ko oñemoërakua jare opaete tëta ñavo ñogüɨnoi provincia rupi vae oikuaa vaerä, jare jökorai opaete vae oñemokätɨro vaerä ñogüɨnoi jókuae ara peguarä vae.

15Jarembae pegua yae jókuae mborookaui oñemoërakua ma vi Susa tëta pe. Jare mburuvicha guasu oyerovia ramboeve oï Amán ndive, tëta rupi maiñaa ma oï miari jókuae regua.