SABIDURÍA 1 - Guarani Bible with DC

Isɨmbi oiko vae, tekove opambae pegua ko

1Mburuvicha reta ɨvɨ pegua, peaɨu mbae jupi vae,

peyemongeta kavi Tumpa kotɨ

jare peeka pepɨa añete reve.

2Kia ipɨakɨɨyembae reve oeka vae oväeta ko chupe;

jare jae oyekuaauka ko oï kia güɨrovia jese vae pe.

3Jare yemongeta ñape vae oporombosɨrɨ ko oï Tumpa güi.

Jae imbaepuere, oyemboaporova yave,

iyarakuaambae reta omoñeeä etei ko oeya.

4Jare arakuaa ngaraa oike kia jeko kavimbae jete re,

jare ngaraa ko oiko metei mbaeyoa pe oñemee yae oiko vae jete re.

5Espíritu ikɨambae vae, jae ko kuimbae reta imboea,

jaema ngaraa etei ko oporombotavɨ;

jae osɨrɨ ko yemongeta ikavimbae güi

jare oñemoata vi oime mbae jupimbae oï yave.

6Arakuaa jae ko metei espíritu oiko aeño kuimbae reta ndive vae,

jare jae ngaraa iñɨ̈ro kia Tumpa kotɨ iñee pochɨ vae pe;

Tumpa opaetei ko oecha güɨnoi mbae oï kuimbae re vae,

omae avei oï ipɨa re

jare oendu güɨnoi opaete mbae jeigüe vae.

7Oipota jei, Tumpa iespíritu tɨnɨe oï opaete ɨvɨ rupi,

jae ko omee oikove vaerä ɨvɨ

jare oikuaa kuimbae reta iyemongeta.

8Jókuae ramo ko, kia ñavo mbae ikavimbae jei vae ngaraa ipuere oikuaku,

jaema ngaraa ko ipuere oasayepe Tumpa iporojäa güi.

9Ipɨapochɨ vae iyemongeta oyeekata ko oyekuaa kavi vaerä,

jaema, iyemongeta ikaviä jeko pegua

ojota ko Tumpa pe oväe jeigüe vae.

10Tumpa iyapɨsa katu yae ko;

kuimbae mbae jei mbegüe vae ave ko oendu.

11Jayave, agüɨye peñeenguru guasuiño

jare agüɨye pere mbae ikavimbae vae,

echa opaete mbae yae vɨari vae ave ko oimeta mbae rupi iyapɨ kuri,

jare metei yuru iyapu yae vae jae ko kuimbae oyukaukata.

12Jare agüɨye peiko kaviä reve peeka mano,

ani ramo, mbae peyapo vae rupi, peru peyeupe ñemokañɨtei.

13Echa Tumpaä ko oyapo mano

jare Jae mbaetɨ ko oyerovia tekove omokañɨtei yave.

14Opaete ko mbae oyapogüe oikove vaerä;

jare opaete mbae oë ɨvɨ re vae ikavigüe ko,

mbaetɨ ko mbayachi güɨnoi;

jaema ɨvɨ pe mano mbaetɨ ko mbaepuere güɨnoi,

15echa mbae jupigüe vae ngaraa omano.

Yemongeta ikavimbae vae regua

16Mbae ikavimbae vae ko oenɨi mano isapúkai pe;

oyemongeta jae ko ichëi vae, jókuae ramo ko täta oeka,

jare jae ndive ko oñemoïru,

jare jaekavi vi jökorai vaerä.