1¡Benjamín iñemuña reta Jerusalén pegua, petekuarai!
Pemoñee mimbɨ guasu Tecoa pe,
pemoätati ikañɨmaa vaerä Bet-haquerem pe,
echa susere yavaetegüe oyekuaa ou ɨvɨtuguasu kotɨ güi.
2Amboaita Sión ikavi yae jare ipöra yae vae,
3mɨmba iyangarekoa reta yogüeruta chupe reta jɨmba ndive;
oyembojeyupa retata iyɨ́vɨri rupi,
jare jɨmba ñavo omongaru retata, ñogüɨnoia rupi.
4Tovaicho reta jei:
“¡Peyeapo katu ñañoraro vaerä!
¡Pepüa, ñaporepeña Jerusalén re,
kuaraɨ ara mbɨte ma yave!
Ërei, ¡kaaru yae ma, kuaraɨ oa ma!
5¡Jayave, pɨ̈tu yave ñapüa jese,
yamboai chugüi reta jo ñepɨ̈roka reta!”
6Echa yandeYa Imbaepuere yae ete vae jei körai:
“¡Peyasɨa ɨvɨra reta jare pemopüa yeupika,
Jerusalén pe peike vaerä!
Kuae tëta guasu oiporara vaerä etei ko oï,
echa tɨnɨe oï ikavimbae pe.
7Jerusalén güi oë ikavimbae,
ɨesaɨ güi ɨ iyapɨmbae oë rami.
Ikavimbae jare jupimbae reño oyemongeta reta;
aecha avei yombopere reta jare mbaerasɨ reta.
8Jerusalén, eyapo kavi ndereko,
echa mbaetɨ yave, asɨrɨta ndegüi,
jare ñuurä repɨtata,
ɨvɨ ipombae vaerä.”
Oñemoërakua tembiporara9YandeYa Imbaepuere yae ete vae jei:
“Israel iñemuña reta jembɨregüe opaeteita oyeeka,
uvarupa iya, opaetei oyevɨka uva re rami.”
10Che jae: “¿Kia pa oenduta cheñee,
amoërakua yave kuae re?
Oyeapete ko oï iyapɨsa reta, cheYa,
mbaetɨ ipuere oendu reta,
oyóyai yoyaiño ko neñee reta,
mbaetɨ oaɨu reta iyeupe.
11Chearasɨ yae vi ko aï
ndearasɨ ramo cheYa,
mbaetɨ ma chepuere chepɨaguasu.”
YandeYa jei cheve:
“Eitɨ chearasɨ michia reta kaye rupigua re,
taɨrusu reta yatɨ yatɨ vae re.
Toyereraja tembipɨɨrä kuimbae reta jembireko reve reve,
ndechi reta jare indechiasɨ vae reta.
12Jo reta, iɨvɨ reta,
jare jae reta jembireko oñemeeukata ambuae vae reta pe.
Echa chepo ko amopüa
aiporarauka vaerä kuae ɨvɨ pegua reta pe.
Che ndeYa jae kuae.
13Opaete vae, michia güive okuakuaa vae pe,
iyeupeguaräño imbaepotarai yae reta,
ñeemombeúa reta jare sacerdote reta ave,
opaetei oporombotavɨ vae reta ko.
14Chembae vae reta ombopɨakatu vaerä jei reta,
opaete mbae jaekavi ko oï,
mbaetɨ tëi ikavi oï reve.
15¡Jae reta imarata tëi ko kuae oyapogüe re,
jókuae che mbaetɨ ma aropɨa vae!
Ërei mbaetɨ, ¡mbaetɨ oikuaa
imara vaerä kërai ave yepe!
Jáeramo, aiporarauka chupe reta yave,
ïru reta rami opata oa.
Che ndeYa jae kuae.”
Israel oyembopɨapochɨ16YandeYa jei imbae vae reta pe:
“Peyemboɨ tape reta rupi jare pemae,
peparandu tape reta ñɨma yae vae re,
kia nunga tape ra jae ikavi vae;
peguata jupi jare peväeta mbutuu peyeupe.”
Ërei jae reta jei: “Mbaetɨ, ngaraa roguata jupi.”
17YandeYa oñono sundaro reta
ɨvate güi omae vae rami vae,
jae reta jei vaerä imbae vae reta pe:
“Peyeapɨsaka peï mimbɨguasu iñee re.”
Ërei chembae vae reta jei:
“Ngaraa royeapɨsaka jese.”
18Jáeramo yandeYa jei:
“Peyeapɨsaka tëtaguasu reta, peikuaa vaerä
mbae ra oasata chembae vae reta ndive vae.
19Ɨvɨ, eyeapɨsaka:
Aruta susere kuae tëta re,
iyemongeta kavimbae jeko pegua;
echa mbaetɨ oendu reta cheñee,
güɨröɨro reta cheporookuai.
20Judá, ¿maera pa reru cheve ikäti kavi vae
incienso Sabá pegua,
jare mbae ikäti kavi yae vae matɨ güi?
Mbaetɨ ikavi ndeve mɨmba
oyeyukagüe opaetei oyeapɨ vae,
ani ïru mɨmba oyeyukagüe reta ave
mbaetɨ ndembopɨakatu.”
21Jáeramo yandeYa jei:
“Ko añono kuae tëta chembae oyepɨaka
jare ogüɨapi vaerä.
Tu reta jare taɨ reta; jëta-ɨpɨ rupigua reta
jare iñeïru reta omanota vi.”
Tovaicho oporepeña ɨvɨtuguasu kotɨ güi vae22YandeYa jei:
“Ɨvɨtuguasu kotɨgua ɨvɨ güi,
oyeapo katu oï ou vaerä metei tëtaguasu imbaepuere yae vae.
23Jembiporu reta ñeraro pegua uvɨ jare mii;
ipɨa-pïrimbae reta ko
jare mbaetɨ etei oporoparareko reta;
isapúkai reta ɨguasu jɨapu rami,
opo reta yogüeru kavayu re,
oïndaivi oñeraro reta vaerä,
pe Sión pegua reta ndive.”
24Jerusalén pegua reta jei:
“Roikuaa yave jërakua yae vae reta regua,
opa orerëogüe;
orepɨatɨtɨ yae jare jasɨ oreve,
kuña imembɨrasɨ oï yave vae rami.
25¡Agüɨye peë tëta güi ikatu kotɨ,
agüɨye vi peguata tape rupi!
Echa ¡tovaicho reta jembiporu ñeraro pegua ndive ñogüɨnoi;
kɨɨye oime opaete rupi!”
26¡Cherëtaɨgua reta,
pemonde temimonde mbɨatɨtɨ pegua,
peyapayere tanimbu rupi,
peyemonde temimonde mbɨatɨtɨ pegua pe
jare peyaeo jasɨ katu yae reve,
michia jaevaeño vae omano yave oñeäpiro rami;
echa oporomokañɨtei vae outa ete ma yandekotɨ!
27YandeYa jei cheve: “Roñono remae vaerä reiko chembae vae reta re. Emae kavi jese reta, reikuaa kavi vaerä jeko reta.”
28Opaete jae reta ipɨapochɨ vae reta ko,
iñee ndaye reta,
opaete oikomegua vae reta ko,
jiero jare jiero iyu vae reta rami ko.
29Tata moendɨka pe oyepeyu tata
oyemondɨkui vaerä plomo.
Ërei mbaetɨ etei ikavi jókuae,
omondɨkui ombokavi vaerä tëi vae pe,
echa ikɨa mbaetɨi okañɨ chugüi.
Jökorai etei ko tëta chembae vae.
30Ikavi ko oyembojee “jatɨgüegüe”,
echa nde cheYa ko, reröɨro.
Who We AreWhat We EelieveWhat We Do
2025 by iamachristian.org,Inc All rights reserved.
