1Año ciento sesenta pe, Alejandro Epífanes, Antíoco taɨ, ou oyemboiya Tolemaida re, ipɨakatu reve oövaiti reta, jare oyeapo mburuvicharä joko pe.
2Mburuvicha guasu Demetrio oikuaa yave jesegua, omboatɨ tuicha jeta yeyé vae ejército jare omboɨpɨ oguata Alejandro re opüa vaerä.
3Jökorai ramboeve Demetrio omondo kuatía Jonatán pe ñeeröɨsa pegua jare ñemoäta ngatu pegua.
4Jae ipɨa pe ikɨ̈reɨ jae räri judío reta ndive iñɨ̈ro oyoupe, ndei Jonatán omopane mbove Alejandro ndive jare mókoi reve oñomoïru ikotɨ.
5Iyemongeta pe jekuaeñotaecha Jonatán imaendúa mbae pɨ̈chɨi vae Demetrio oyapo ikotɨ, jëtara reta kotɨ jare opaete jókuae tëtaɨgua reta kotɨ vae re.
6Jayave oyókuai Jonatán omopüa vaerä metei ejército jare oeka vaerä tembiporu ñoraro pegua ndive oñemoïru vaerä jae ndive. Oyókuai vi oyora vaerä chupe tembipɨɨ tëta mí Jerusalén pe ñogüɨnoi vae.
7Jonatán ojo Jerusalén kotɨ jare omongeta kuatía tëta jóvai jare järoa reta jóvai.
8Kuae reta okɨɨye yae oendu yave mburuvicha guasu ikɨ̈reɨ omopüa metei ejército,
9jayave oyora reta chupe tembipɨɨ reta, jare jae omboasa yoapɨ yé tu reta kotɨ.
10Jonatán opɨta Jerusalén pe jare omboɨpɨ omopüa ye jare oyapokatu ye tëta guasu.
11Omee ñee mbaravɨkɨ iyapoa reta pe omopüa ye vaerä oguambɨ guasu jare oimama vaerä ɨvɨtɨ Sión ita oñeopagüe pe omomɨ̈rata vaerä, jökorai oyeapo.
12Báquides oyapogüe ñepɨ̈roa pe yogüɨreko vae tëta ambuaeɨgua reta opa osɨi joko güi,
13oeya reta jenda yogüɨraja iɨvɨ kotɨ.
14Ërei ngatu, amogüe opɨtaño Bet-sur pe mborookuai jei vae güi opia vae reta, joko pe oñepɨ̈ro yogüɨreko.
15Mburuvicha guasu Alejandro imaendúa Demetrio oñererökuavee Jonatán pe vae re, jae nunga vi tenonde yave oñoraro reta vae re, imaendúa vi Jonatán oechauka jäta ngatu jëtara reta ndive jare omomara reta jeta tekoasɨ vae,
16jae jei: “¡Kuae nunga kuimbae mona yareko! Ikavi ko añave voi yayopokuaa jare ñañomoïru jae ndive.”
17Jayave omondo chupe tupapire kuae ñee ndive:
18“Mburuvicha guasu Alejandro omondo tamaraeme jëtara Jonatán pe.
19Nerërakua cheve ndepoaka yae jare neräta ngatu yae vae, jáeramo eiko cheïrurä.
20Jáeramo ameeta reiko vaerä sacerdote ruvicharä nerëta pe jare jupi rupi reñeenɨi vaerä ‘mburuvicha guasu iñeïru’, chemborɨ vaerä ayapogüe pe jare reiko avei vaerä cheïrurä.”
Tupapire ndive, Alejandro omondo chupe temimonde pɨ̈taasɨ vae jare äka-regua oro pegua.
21Jonatán oyemonde temimonde ikɨambae vae pe yasɨ chiúa año ciento sesenta pe, jae ko arete o ñairaka pegua jee vae iara pe. Omboatɨ sundaro reta jare güeru jeta tembiporu ñoraro pegua.
22Demetrio pe jërakua yave kuae, jasɨ katu yae chupe jare jei:
23“¿Maera pa ñañemopaneuka Alejandro pe oñomoïru jare oyomborɨ judío reta ndive?
24Che vi jayave tambaekuatía chupe vɨakatu rupi jare tarökuavee chupe mbaemboete jare mbota reta, oasa reta vaerä chekotɨ chemborɨ.”
25Jayave ombaekuatía chupe reta körai:
26“Mburuvicha guasu Demetrio omondo tamaraeme judío reta jëta guasu pe. Chepɨakatu yae aikuaa yave peyapo yemongeta ñajäa oyoupe vae, aendu peiko cheïru ete rami jare mbaetɨ peñemoïru cherovaicho reta ndive.
27Jeiete peyapo chekotɨ jupi vae, echa amboekovia kavita peve kuae peyapogüe,
28poyorata jeta mbɨa reta güi jare pombopotata jeta rupi.
29Kuae kuatía rupi poyora agüɨye vaerä ma pemboepɨ tributo, impuesto yukɨ regua jare impuesto oro pe mburuvicha guasu pegua.
30Añave güive apoi mbɨte oasa rupi temitɨ jäɨ vae güi jare mbɨte rupi ɨvɨra ia vae reta chembaerä arekose vae güi. Añave güive ngaraa ye ma pogüɨraja Judea güi, jaeramiño vi mboapɨ distrito reta tenonde yave Samaria jare Galilea ndive oyepapa vae reta, añave oasa yeta Judea pe oyepapa vaerä.
31Jerusalén, jaeramiño vi, oñeñono teeta Tumpa imbaerä, jare oyeyorata diezmo jare impuesto imboepɨ güi.
32Ayora vi chepogüɨ güi tëta mí Jerusalén jare amboasa sacerdote ruvicha pe oiparavo järoarä oyangareko vaerä jese.
33Toiko iyambae, iñeataiämbae opaete judío reta oyereraja tembipɨɨrä oipotagüe tëta rupi kuae cheɨvɨ guasu pe vae. Jae reta jɨmba ndive ñavo oyeyora impuesto imboepɨ güi.
34Opaete arete reta, yasɨ pɨau pegua, ara mbutuu reta jare opaete arete iara reta, mboapɨ ara oata oväe mbove jare mboapɨ ara ma oasa yave, ngaraa judío reta cheɨvɨ pe yogüɨreko vae omboepɨ impuesto jare opaete ïru mbaemboepɨ reta.
35Mbaetɨta kia ipuere oiporu korepoti ani omoambekoiño judío reta.
36Judío reta ojota, treinta mil kuimbae rupi, mburuvicha guasu isundarorä, jare oyovaketa oyemboepɨ chupe reta mburuvicha guasu isundaro aeño reta ndive.
37Oimeta vi amogüe judío reta mburuvicha iyangarekoarä yogüɨreko, jare amogüe reta mburuvicha guasu pe etei oparavɨkɨ vae. Juvicha reta judío vi ko jare oikota vi jembiokuai guasu jeia rupi, mburuvicha guasu mborookuai omee opaete Judea pe rami.
38Mboapɨ reve distrito reta oyemboyao Samaria güi jare oasa Judea pe vae, topɨta joko peño, jokuaeɨgua mburuvicha ipo pe jare metei sacerdote ipogüɨ pe.
39Amee Tolemaida jare iɨvɨ, mbotarä tupao Jerusalén pegua pe, jese oiko vaerä.
40Mburuvicha reta ikorepoti güi omboasata ciento sesenta y cinco kilo korepoti año ñavo, oñemae kavita ketɨ güi ko oyeekɨta vae.
41Opaete mbota reta jembɨregüe, oparavɨkɨ vae reta añave omeeta vae, oasata tupao pegua mbaravɨkɨ oyeapo vaerä.
42Mbaetɨta ma vi añave oyemboepɨ impuesto cincuenta y cinco kilo vae korepoti, tupao pe oyemboatɨse mburuvicha guasu peguarä vae, ërei añave güive oyemboasata sacerdote reta tupao pe oparavɨkɨ vae ipo pe.
43Oime yave kia ipía mburuvicha guasu jëta pe ani oime yave oipotagüe mbaemboepɨ Jerusalén itupao pe ani jókuae ɨvɨ rupi, opaeteita oyeyora chugüi.
44Oñemopüa pɨau jare oyeapokatu ye pɨau yave tupao, mburuvicha reta ikorepoti güi oyemboepɨta jókuae mbaravɨkɨ.
45Oñemopüa ye pɨau yave oguambɨ guasu Jerusalén pegua, jare oñemomɨ̈rata jembeɨ rupi yave, ani ramo oñemopüa yave oguambɨ guasu reta ïru tëta reta Judea pegua pe, oyemboepɨta vi mburuvicha guasu reta ikorepoti güi.”
46Jonatán jare jëtaɨgua reta oendu yave kuae, mbaetɨ güɨrovia jare mbaetɨ vi ipöra chupe reta, echa imaendúa jeta mbae pɨ̈chɨi vae mburuvicha guasu Demetrio güeru Israel pe vae re jare jasɨ katu rupi oyapouka reta mbae chupe vae re.
47Jáeramo oasa reta oñemoïru Alejandro ndive, echa jae güɨraja chupe reta yemongeta pɨakatu pegua. Jáeramo oñemoïru avei yogüɨreko reta.
48Mburuvicha guasu Alejandro omboatɨ ejército tuichagüe vae jare oñeñonondaivi reta Demetrio jóvai.
49Mókoi reve mburuvicha reta oa oyoe ñoraro pe, ërei Demetrio jare isundaro reta otekuarai joko güi, jare Alejandro oaɨkuemoña reta opa oyuka regua.
50Yepe tëi Demetrio oñemomɨ̈rata omomara vaerä jovaicho reta iyɨva ndei kuaraɨ oike mbove, ërei oyovakei omano jókuae ara.
Jonatán ombotuicha reta51Alejandro, joko güi, omondo ñee jerajaa reta, mburuvicha guasu Tolomeo Egipto pegua pe, jei vaerä:
52“Ayu ye cheɨvɨ pe aguapɨ vaerä cheramɨigüe reta jendagüe pe, echa añave anoi mbaepuere chepo pe. Amoamɨri Demetrio jare oyemboiya ñanerëta re.
53Añoraro yave jae reta ndive amoamɨri, opaete isundaro reta reve, jare aguapɨ tenda guasu jae oguapɨse vae pe.
54Jáeramo, aipota yandepɨa yera oyoupe jare remee cheve nderayɨ areko vaerä, aiko vaerä nderovayarä. Che ameeta ndeve jare nderayɨ pe, mbota ikavigüe vae.”
55Mburuvicha guasu Tolomeo omondo jei chupe kuae ñee: “Ara kavi pe reyerova ye neramɨigüe reta iɨvɨ pe jare reguapɨ ye tenda guasu pe,
56ipöra cheve jókuae rere nderembikuatía pe vae, eiko jayave cherovayarä, nde reiporu rami. Ërei aipota ñañoväe Tolemaida pe, ñanemiari kavi vaerä.”
57Tolomeo oë tayɨ Cleopatra ndive Egipto güi yogüɨraja Tolemaida kotɨ, año ciento sesenta y dos pe.
58Mburuvicha guasu Alejandro oë jape, jare Tolomeo omee chupe tayɨ, omboarete reta tuicha rupi jókuae menda, mburuvicha reta jeko rupi.
59Mburuvicha guasu Alejandro ombaekuatía Jonatán pe, oparea chupe ou vaerä imiari jae ndive.
60Jonatán jayave ojo jeta vae ndive Tolemaida kotɨ, joko pe oñoväe mókoi reve mburuvicha guasu reta ndive; chupe reta jare ivɨaka reta pe omee mbota oro jare korepoti pegua, jare jeta ïru mbae yekou reta, jökorai oyopokuaa reta jae ndive.
61Jayave omboɨpɨ amogüe Israel-ɨgua jeko ae güɨröɨro vae reta jare ipɨapochɨ vae reta, oñeapo Jonatán re; ërei mburuvicha guasu mbaetɨ oyeapɨsaka jese reta.
62Jae etei, oporookuai oipoepɨ vaerä Jonatán jemimonde metei pɨ̈taasɨ vae ndive, jökorai oyapo reta.
63Mburuvicha guasu omboguapɨ jóvai, jare oyókuai sundaro ruvicha reta güɨraja vaerä tëta mbɨte pe jei vaerä opaete vae pe, agüɨye etei vaerä kia mbae oyapo chupe, mbaetɨta vi omoambeko jekombae reve.
64Oñeapo jese vae reta oecha yave omboete, mbɨtea pe jare omondeuka reta chupe temimonde pɨ̈taasɨ vae, opa otekuarai reta joko güi.
65Mburuvicha guasu, jayave, ombotuicha jare omoapɨta jee iñeïru tenondegua ete reta ipɨte pe, jare ombojee vi sundaro ruvicha jare tuvicha jókuae provincia pegua.
66Joko güi Jonatán ou ye Jerusalén kotɨ, oyerovia katu reve.
Jonatán omoamɨri Apolonio67Año ciento sesenta y cinco pe, Demetrio, jae ko mburuvicha guasu Demetrio taɨ, ou Creta kotɨ, tamɨigüe reta iɨvɨ pe.
68Mburuvicha guasu Alejandro pe jërakua yave, ipɨa yoyavi jare oyerova ye Antioquía kotɨi.
69Demetrio ombojee sundaro ruvicharä Apolonio, Celesiria pe tuvicha oikose vae, kuae omopüa metei ejército tuicha yae vae, jare oyembojeyupa Jabnia pe, joko güi omondo ñee Jonatán pe:
70“Nde ñoete ko reyovaicho chekotɨ; ndereko pegua apɨta ñemomarai pe jare jáeramo opaete chemotareɨ vae. ¡Agüɨye nepɨ̈rata eyeapo chekotɨ, jókuae ɨvɨtɨ rupi reï güiño!
71Añetete ko reyerovia ndesundaro reta re yave, egüeyɨ ñuu pe javoi joko pe yaecha kia ko añetete ipɨ̈rata vae. Che ndive ñogüɨnoi opaete tëta guasu reta.
72Eparandu, jare tei ndeve reta kia ko che vae jare kia kia ko ñogüɨnoi che ndive. Jae reta jeita ndeve pemomara rapeä ko cheve vae, echa peramɨigüe reta iñamɨri ko iɨvɨ pei mókoi ye ma.
73Ñuu pe mbaetɨ ita, ɨ̈vavira ani ñepɨ̈roa rendaa yepe, nde mbaetɨta ndepuere remomara chekavayu regua reta ani ramo cheejército reta pe.”
74Oendu yave Apolonio iñee, Jonatán iyarasɨ tuicha, oiparavo diez mil kuimbae reta jare oë Jerusalén güi. Jëtara Simón vi ojo jape pe omborɨ vaerä.
75Oyembojeyupa reta Jope iyɨpɨ pe, ërei jokuaeɨgua reta oyokenda jöke chugüi, echa joko pe Apolonio isundaro reta oporoäro ñogüɨnoi. Jayave judío reta oporepeña jókuae tëta re.
76Ërei jokuaeɨgua reta okɨɨye güi oipea jöke chupe reta, jare Jonatán oyemboiya Jope re.
77Apolonio pe jërakua yave kuae, omboyupavo metei ejército tres mil kavayu regua reta ndive jare jeta ɨvɨ rupigua reta, jayave omboɨpɨ oguata Azoto kotɨ, oasai jokoropi rami jaanga oyeapo, ërei jökorai ramboeve opia ñuu guasu rupi, echa oyerovia ikavayu regua reta re.
78Jonatán oaɨkuemoña güɨraja Azoto kotɨ, joko pe mókoi reve tovaicho reta okua oyoe.
79Yepe Apolonio oñomi tëi oeya diez mil sundaro kavayu regua reta;
80Jonatán oikuaañoi chugüi ñuai oipota tëi oñono chupe jaɨkue kotɨ rupi vae. Kavayu regua tovaicho reta oimama Jonatán iejército jare oporepeña jese uvɨ amandaɨvi nunga vae ndive, ndeimbove güive oyogüɨrokaarúi.
81Ërei jae reta mbaetɨ iyagüɨ, Jonatán oyókuai rami, ojoi kavayu regua reta opa ikangɨ.
82Ipɨtu ma yave kavayu regua reta, Simón, omboguata tenonde isundaro reta jare okua tovaicho ɨvɨ rupigua reta re; opa iñamɨri jare otekuarai reta joko güi.
83Kavayu regua reta opa vi oñemoai moai ñuu rupi, otekuarai reta Azoto güi, opa ojo reta oike Dagón itupao pe, jae ko jokuaeɨgua reta itumpa, joko pe oasayepe reta vaerä mano güi.
84Jonatán oapɨ Azoto jare tëta raɨ reta, opa etei opavusu jese; oapɨ vi Dagón itupao jare opa oyuka tata pe joko pe oñemi vae reta.
85Oupitɨ ocho mil rupi omano jókuae ara kɨsepuku pe jare opa ókai vae reta.
86Joko güi Jonatán ojo oyembojeyupa Ascalón pe. Jokuaeɨgua reta oë jape pe, jare tuicha rupi omboete.
87Jaɨkue rupi Jonatán oyerova ye Jerusalén kotɨ jeta vae reta ndive jare güɨraja iyeupe jeta teyupapo reta.
88Mburuvicha guasu Alejandro pe jërakua yave, jeiete ete omboete Jonatán:
89Omondo chupe broche oro pegua, mburuvicha guasu jëtara ete reta ndive oyapo rami, jare omboasavi chupe tëta Ecrón opaete iɨvɨ ndive.
Who We AreWhat We EelieveWhat We Do
2025 by iamachristian.org,Inc All rights reserved.
