NEHEMÍAS 6 - Guarani Bible with DC

Tovaicho reta oyemongeta oyapo ikavimbae Nehemías pe

1Jare Sanbalat, Tobías, Arabiaɨgua Gesem jare ïru tovaicho reta oikuaa yave, romopüa ye tëta guasu ikësea jare mbaetɨ ma oasavigüe (yepe tëi jókuae ara rupi ndeiño añono öke reta),

2Sanbalat jare Gesem omondo chereenɨiuka, royemboatɨ vaerä tëta guasu Ono jee vae iyɨvɨrigua metei tëta raɨ pe, ɨvɨtɨ päu ipe kavi vae pe oï vae pe. Ërei jae reta yepe oyemongeta oyapo vaerä ikavimbae cheve.

3Jayave amondo ñee jerajaa reta, jae chupe reta: “Mbaravɨkɨ tuichagüe ko ayapo aï, mbaetɨ chepuere aeya; echa aeya yave mbaravɨkɨ opɨtata ko, mbaetɨ chepuere aeya aja vaerä pekotɨ.”

4Irundɨ ye ombou chereenɨiuka reta, ërei che jökorai yeño amboyevɨ chupe reta.

5Jayave Sanbalat jekuae ombou ye metei jembiokuai, pandepoa ma jei vaerä cheve jókuae yeño, metei tupapire oyepea ou vae rupi,

6körai oyekuatía jókuae tupapire pe: “Jërakua ñee tëtaguasu reta rupi jare Gasmu vi jei, kërai nde jare judío reta ndive peyemongeta peñemopüa vaerä mburuvicha guasu kotɨ; jare jáeramo pemopüa ye peï tëta guasu ikësea. Jërakua vi nde reïta mburuvicha guasurä vae,

7jare reñono ñeemombeúa reta nemoërakua vaerä Jerusalén pe, jei reta reve: ‘¡Oime ma ko mburuvicha Judá pe!’ Jókuae ñee reta ipuere ojo jërakua mburuvicha guasu Artajerjes pe; jáeramo, eyu ñanemiari päve.”

8Jayave che amondo jaeuka chupe: “Kuae nde rere vae mbaetɨ etei ko añete, nde aeño ma ko reyemongeta ndepɨa pe jókuae.”

9Echa opaete jae reta oreiämondo jei reve: “Topɨta reta mbaravɨkɨ güi, agüɨye topa toyapo reta.” Ërei, ¡chemoäta ngatu cheRu Tumpa!

10Javoi aja Semaías, Delaía taɨ jo pe, jae ko Mehetabel jɨmɨmino, echa jae oyeokenda oï jo pe, jei cheve: “Yayomboatɨ tupao guasu pe, jare yayokenda öke reta, echa kuae pɨ̈tu oyemongeta reta yogüeru vaerä ndeyuka.”

11Ërei che jae chupe: “¿Kuimbae che rami vae otekuaraita pa? ani, ¿kia che rami vae oiketa pa tupao guasu pe güɨroasayepe vaerä jekove? Ngaraa aike tupao guasu pe.”

12Jare aikuaa Tumpa güiä jei jókuae ñee vae, echa Sanbalat jare Tobías yepe omboepɨ vɨari chupe, jáeramo jei jókuae ñee chekotɨ;

13omboepɨ reta chupe cheiämondo vaerä jare cheyoa vaerä. Jökorai ikɨ̈reɨ chemoërakua pɨ̈chɨi reta.

14¡CheRu Tumpa: Agüɨye neakañɨ opaete Sanbalat jare Tobías oyapogüe güi; jare ñeemombeúa kuña Noadías jare ïru ñeemombeúa reta oipota tëi cheiämondo vae güi!

15Jare opa oyeapo tëta guasu ikësea cincuenta y dos araa pe, jae ko veinticinco ara yasɨ Elul re.

16Jare kuae oendu opaete orerovaicho reta yave, okɨɨye opaete vae tëta guasu reta oreɨ́vɨri ñogüɨnoi vae, jare oyandu oñemomichiuka yae opɨta reta, echa oikuaa oreTumpa imbaepuere rupi oyeapo kuae mbaravɨkɨ vae.

17Jókuae ara rupi Judá pegua tenondegua reta omondo pɨi tupapire Tobías pe; jare Tobías ombou pɨi vi tupapire chupe reta,

18echa jeta Judá pegua reta oñeñono mbaetɨ vaerä oeya Tobías, Secanías tayɨ ndive omenda jeko pegua, Secanías ko jae Ara taɨ; jare Johanán, Tobías taɨ omenda Mesulam tayɨ ndive ramo; Mesulam ko jae Berequías taɨ.

19Jare imiari kavi reta jese cheróvai rupi, jare che jaegüe omombeu reta chupe. Jare Tobías oikuatía tupapire rupi ombou cheiämondo vaerä.