1Tumpa pe täta yae asapúkai,
asapúkai chupe, echa jae oendu cheve.
2Chepɨatɨtɨ aï yave aeka cheYa,
chekueraimbae reve aupi chepo ayerure pɨ̈tu yave,
ërei mbaetɨ aväe mbɨakatu.
3Chemaendúa Tumpa re jare ayaeo;
ayemongeta jare chepɨtu.
4Nde cheYa, mbaetɨ remaeño ake;
¡chembopɨtu yae,
mbaetɨ chepuere chemiari!
5Ayemongeta ara reta jare año reta tenonde rupi vae re;
6chemaendúa atairarise pɨ̈tu rupi vae re.
Ayemongeta chepɨa pe jare aparandu cheyeupe:
7¿Oremombota ra oreYa jekuae avei rupi?
¿Ngaraa ye ma ra oreparareko?
8¿Opa ra chugüi iporoparareko jekuae avei pegua?
¿Opa ra chugüi iporogüɨrökuavee päve?
9¿Iñakañɨ ra Tumpa güɨnoi vaerä mboroparareko?
¿Iyarasɨ yae ete ra, mbaetɨ vaerä ma oporoparareko?
10Jae vi: “Tumpa Tuichagüe yae ete vae mbaetɨ ma tenonde yave rami.”
Kuae ou chepɨa pe jasɨ yae.
11Chemaenduata cheYa kërai mbaembae oyapogüe re,
jókuae arakae yave oyapogüe re.
12Tachemaendúa opaete jae oyapogüe re,
tachemiari opaete jókuae re.
13CheRu Tumpa, ikɨambae ko opaete reyapogüe;
¿oime ra tumpa tuicha yae vae ndegüi?
14¡Nde ko jae Tumpa,
mɨakañɨ tuichagüe iyapoa!
¡Reechauka ndembaepuere opaete tëtaguasu reta pe!
15Ndembaepuere rupi reepɨ ndembae vae reta,
Jacob jare José iñemuña reta.
16CheRu Tumpa,
ɨguasu ndereecha yave, okɨɨye,
orɨrɨi ɨguasu jugua okɨɨye güi.
17Amapɨtu güi oyepɨyere ɨ yavaetegüe;
jare jɨapu ara reta,
overa opaete rupi.
18Ndeararɨapu oï kusumirou re;
neama-vera omoembipe ɨvɨ jare omokana.
19Ɨguasu rupi oï nderape;
reasa jeta ɨ reta,
ërei mbaetɨ kia oväe nderaɨkuere.
20Reroatase ndembae vae reta vecha rami,
Moisés jare Aarón rupi.
Who We AreWhat We EelieveWhat We Do
2025 by iamachristian.org,Inc All rights reserved.
