ECLESIÁSTICO 18 - Guarani Bible with DC

Tumpa imbaepuere jare iporoparareko

1Tumpa, oiko ñomai oiko vae, oyapo ɨvɨ;

2Tumpaño ko jae ikɨambae vae.

4Ngaraa kia ipuere oipapa jae oyapogüe;

¿kia pa ipuere oyemboe iporomopɨakañɨ re?

5¿Kia pa ipuereta ojäa imbaepuere tuichagüe vae

ani ramo oechauka opaete ipɨakavi reta?

6Ngaraa ipuere oyemboeta ani ramo oyemboagüe;

ngaraa kia ipuere oväe Tumpa iporomopɨakañɨ.

7Metei vae opa omboapɨ yave, jaeramo ko omboɨpɨ oï;

ojo oväe iyapɨ pe yave, mbaetɨ oikuaa mbae re oyemongetata.

8¿Mbae pa ko kuimbae?, ¿mbaerä pa ko ikavi?,

¿mbae pa ko ikavi vae ani ramo pɨ̈chɨi vae ipuere vaerä oyapo?

9Metei kuimbae oikopuku yave, ojota oväe cien añoa pe;

10ërei yamboyovake opambae ndive yave,

metei ɨ otɨkɨ ɨguasu pe rami ko

ani ramo metei räɨ ɨvɨkuitï rami ko.

11Jókuae ramo Tumpa ipɨaguasu kuimbae reta ndive

jare täta oiparareko reta.

12Jae oikuaa kërai oiporara yaeta iyapɨ pe kuimbae

jare jókuae ramo ikangɨä iñɨ̈ro vaerä.

13Kuimbae iporoparareko japicha kotɨño,

ërei Tumpa ko iporoparareko opaete oikove vae reta re;

jae oñeengata, oporombosɨmbi, oporomboe

jare oporogüɨroata metei vecha iyangarekoa güɨroata jɨmba rami.

14¡Oyerovia katu ko iporoparareko re güɨrovia vae reta

jare iyandeko oyapo iporookuai reta!

Mbɨakavi

15Cheraɨ michi, metei ikavi vae reyapo yave agüɨye eñeengata,

agüɨye emokañɨtei metei mbota ñeeasɨ pe.

16Ɨsápɨi araku omoröɨsa rami,

jökorai ko metei ñee kavi má ikavi metei mbota güi.

17Añetete ko, metei ñee má ikavi metei mbota güi,

jare metei kuimbae ipɨakavi vae omee mókoi reve.

18Iyarakuaambae oporokura omae mbae reve,

jare mbae ñamee yandepɨakatua reve vae oporomboyaeo vae ko.

Mbaepoɨu

19Ndei nemiari mbove, eikuaa räri,

jare ndei mbaerasɨ ndereitɨ mbove, eyangareko ndeyé.

20Ndei reñejäauka mbove, emae räri ndeyé aeño,

jaema Tumpa oeka ndeve reyapogüe yave, iñɨ̈rota ndeve.

21Ndei mbaerasɨ ndereitɨ mbove, eñemomichi;

jare ndeyoa yave, eyembopɨambuae.

22Agüɨye ɨma eeya reyapombae Tumpa pe rerökuavee vae,

jare agüɨye eäro remano regua remboepɨ vaerä.

23NdeTumpa pe reyapo mbove metei ñererökuavee, eyeapo katu;

agüɨye embojaangaiño Tumpa.

24Eyemongeta Tumpa iyarasɨ re ara iyapɨ pe,

echa iporoparareko mbae reve omeeta metei ñavo pe oyapogüe.

25Mbae jeta iara pe nemaendúa mbae oata vae re,

jare yemboikokatu pe nemaendúa mbaravete re.

26Pɨ̈tu yave pɨareve pe oyemoambuae ara;

Tumpa oipota yave, opaete oasa jarembae pegua.

27Iyarakuaa vae jaeñoi ko oïndaivita oï;

oime ikavimbae iyoa vaerä yave, osɨrɨ pɨ̈chɨi vae güi.

28Opaete kuimbae iyarakuaa katu vae oikuaa arakuaa re

jare omboete kia oövaitigüe.

29Kia ñavo ñee raanga reta oikuaa vae iyarakuaa vi ko oyeapo

jare jaekavi jei jeigüe vae.

Oyangareko iyé aeño vae

30Agüɨye eyererajauka nderemimbota rupi

emoamɨri ndepɨapotaa.

31Nderemimbota reyapo yave,

nderovaicho reta opukata nderé.

32Agüɨye emomora teko vɨa vɨa pegua;

imboepɨ ndereeyata ko mbaravete pe.

33Agüɨye jeta rupi ekaru eiko jare eyembosavaɨpo,

ndembaerɨru ipoä renoi reve.