TOBIT 7 - Guarani Bible with DC

Yogüɨraja oväe Ragüel jëta pe

1Yogüɨraja ma oväe Ecbatana pe yave, Tobías jei iguataïru pe:

—Chëi Azarías, chereraja aramoete ñanerëtara Ragüel jëta pe.

Jaemai araɨgua güɨraja Ragüel jëta pe. Oecha oime oguapɨ oï jöke pe, jare omee reta tamaraeme chupe. Jaema jei chupe reta:

—¡Püa ma, tëtara! ¡Ayerovia yae aipo!

Jare omboasa reta jo pe.

2Jare jei jembireko Edna pe:

—¡Maera yera kuae kunumi täta ogua katu cherëtara Tobit!

3Jaema Edna oparandu chupe reta:

—¿Ketɨ güi pa ko peyu cheraɨe reta?

Jare jae reta jei chupe:

—Ore jae ko Neftalí iñemuña reta, ërei royemombo jeko pegua roiko Nínive pe.

4Jare oparandu ye chupe reta:

—¿Peikuaa pa orerëtara Tobit?

—Roikuaa —jei chupe.

5Jare oparandu ye chupe:

—¿Ikaviño pa oï?

—Oime ikaviño oiko —jei reta chupe.

Jaema Tobías jei chupe:

—¡Jae ko cheru Tobit!

6Jare Ragüel ochaguariko opüa oyemboɨ jare oyerovia reve oñañuküava, oyaeo oyerovia güi jare jei:

—¡Tumpa iporerekua toiko nde ndive cheraɨ! Nderu kuimbae jupigüe vae ko. ¡Maera pa ko susere jeko pegua kuimbae ipɨakavigüe vae añave jesaä ma oiko!

Jekuae oñañuküava ye oyaeo reve jëtara Tobías.

7Jembireko, Edna, oyaeo vi, jare tayɨ Sara.

8Ragüel, tuicha oyerovia jare oyuka chupeguarä metei vecha raɨ.

Oñeñonokavi menda regua

9Oyau reta, opa oyepoe reta jare ojo oguapɨ reta karu renda pe. Jaema Tobías jei Rafael pe:

—Chëi Azarías, ere Ragüel pe tomee cheve chekuña Sara.

10Jare Ragüel oendu jókuae kunumi jei vae jare jei chupe:

—Ekaru, jare eɨu jare eyerovia katu emboasa kuae pɨ̈tu. Echa, mbaetɨ yé ko kia ïru vae ipuereta güɨreko ndegüi cherayɨ Sara. Jókuae ramo vi che mbaetɨ kia pe chepuere amee, ndeve ramo ko ameeta, echa nde jae cherëtara ete: Erei cheraɨ metei mbae amombeuta ndeve añetegüe.

11Cherayɨ omenda tëi ma ko chiu kuimbae ndive, ërei ndei oya jese mbove opa omano reta. Añave, cheraɨ, ekaru jare eɨu pɨagüive, yandeYa ndemborɨta ko.

12Ërei Tobías jei chupe:

—Mbaetɨta chepuere akaru, kuae teko ndei ñañono kavi cheve mbove.

Jaema Ragüel jei ye chupe:

—Ikavi jayave yayapo mborookuai Moisés oikuatiagüe jei rami, echa Tumpa ko omee amee vaerä ndeve, jare ameeta ndeve. Añave kuae güi tenonde kotɨ nde eiko imerä, jare jae nderembirekorä. Añave kuae güire jae ndembae. Cheraɨ, yandeYa kuae pɨ̈tu tandemborɨ toechauka ndeve iporoaɨu jare tomee ndeve reiko kavi vaerä.

13Jaema Ragüel oenɨi tayɨ Sara. Jare ou yave oipɨɨ ipo pe jare omee Tobías pe, jaema jei chupe:

—Jaema che amee ndeve, mborookuai Moisés itupapire pe oyekuatía oï rami, joko pe jei, amee vaerä ndeve nderembirekorä. Eipɨɨ jare eyerova ye ikavi nderu jëta pe. Tumpa ara pe oï vae tapemborɨ.

14Jare oenɨi kuñatai ichɨ güeru vaerä chupe metei tupapire, jare jókuae re oikuatía jókuae menda regua, pɨpe oikuaauka jae omee oï tayɨ Tobías pe jembirekorä, Moisés iporookuai jei rami, jayave ramo omboɨpɨ okaru reta.

15Joko güi Ragüel oenɨi jembireko Edna jare jei chupe:

—Jaɨ, michi eñono kavi ojo ïru, jare eraja Sara joko pe.

16Jaemai ojo oñono kavi ojo ïru ime jei chupe rami, jare güɨraja joko pe imemɨkuña. Jare opoko oäpiro. Jaɨkue rupi opa jesaɨ oyoe jare jei chupe:

17—Chemembɨ, enoi mborogüɨrovia. YandeYa ara pe oï vae tomee yerovia ndeve mbɨatɨtɨ jekovia pe. ¡Enoi mborogüɨrovia, chemembɨ!

Jare oë ojo.