NÚMEROS 24 - Guarani Bible with DC

1Jare Balaam oecha yandeYa pe jae kaviño jei vaerä ñee kavi Israel iñemuña reta kotɨ yave, mbaetɨ oyapo tenonde yave jare mokoía pe ojo oeka mbae ra Tumpa jeita vae rami; omae ñuu kotɨ;

2omopüa iñäka omae yave oecha Israel iñemuña reta ñogüɨnoi jeyupa pe, ñemuña ñavo; ou jese Tumpa iEspíritu;

3jayave Balaam jei ombojaanga reve mbae oasata vae, körai:

“Jei Balaam, Beor taɨ,

kuimbae mbae oecha katu vae,

4Tumpa iñee oendugüe jei vae,

Imbaepuere yae ete vae oechauka mbae chupe vae,

ikera rupi mbae oecha katu vae:

5¡Jacob iñemuña reta, ipöra

yae ndero guakapi pegua reta!

¡Israel iñemuña reta jeyupa ipöra yae!

6Ɨ osɨrɨ vae rami ñogüɨnoi,

ko raɨ ɨ̈aka jembeɨ pe oï rami,

temitɨ áloe yandeYa oñotɨgüe rami,

¡ɨ̈vɨrare ɨ jembeɨ pe oï rami!

7Oyekou retata ɨ re,

iñemuña reta ñogüɨnoita ɨ katu pe.

Juvicha guasu güɨnoita mbaepuere Agag re;

jare iporookuaía tuicha yaeta.

8Tumpa ko, Egipto güi güɨnoe reta;

jae ko ipɨ̈rata yae chupe reta toro rami.

Israel iñemuña reta opata omokañɨtei tëtaguasu tovaicho reta,

opata oikägüe rakɨo reta,

oñɨvota mii raɨ ipo pegua pe.

9Jare itindɨ retata oyapakua vaerä yaguapope kuimbae jare yaguapope kuña rami.

¿Kia ra omombaBalaam omombeu mbaembae oasata vae

10Jayave Balac iyarasɨ yae Balaam kotɨ, jare ipo re okua okua reve jei chupe:

—Reyepopeyu cherovaicho re vaerä ko roekauka, ërei nde mboapɨ ye ma rere ñee kavi ikotɨ.

11¡Ekua nerëta kotɨ! Amombeu tëi ndeve rombopota vaerä jeta mbaembae pe, ërei Tumpa omboavai ndeve.

12Jare Balaam jei chupe:

—Amombeu voi ko ñee jerajaa reta pe körai,

13yepe tëi Balac omotɨnɨe jo omee cheve korepoti jare oro, ngaraa chepuere ayavɨ yandeYa iñee, ayapo vaerä mbae ikavi vae yepe ani mbae ikavimbae yepe, chepɨa jemimbota rupi aeño; yandeYa mbae jei vae, jokuaeño jaeta.

14Aja yeta cherëta kotɨ, ërei tamombeu voi ndeve këraita kuae tëta oyapo kuri nerëta vae.

15Jayave Balaam jei ombojaanga reve mbae oasata vae, körai:

“Jei Balaam, Beor taɨ,

kuimbae mbae oecha katu vae,

16yandeYa iñee oendugüe jei vae,

oikuaa Tuichagüe yae ete vae oikuaa vae,

Imbaepuere yae ete vae oechauka mbae chupe vae,

ikera rupi mbae oecha katu vae:

17Aechata, ërei mbaetɨ añave;

amaeta jese, ërei mbaetɨ köi güi:

Jacob iñemuña güi oëta metei Yasɨtata,

Israel iñemuña reta güi opüata metei Mburuvicha guasu,

jae ombopereta Moab iñäka,

jare opata omboai Set iñemuña reta.

18Opɨ̈ro retata Edom,

opɨ̈rota vi jovaicho Seir,

Israel ikuimbae yaeta.

19Jacob iñemuña güi oëta oporomoamɨri vae,

omboaita tëta pe jembɨregüe.”

20Jare Balaam omae yave tëta Amalec iñemuña reta re, jei ombojaanga reve mbae oasata vae, körai:

“Amalec, tëtaguasu reta iñäka;

ërei opata okañɨtei kuri jekuae avei pegua.”

21-22Jare Balaam omae yave ceneo iñemuña reta, jei ombojaanga reve mbae oasata vae, körai:

“Caín iñemuña reta:

yepe tëi perëta jëguambae;

yepe tëi peñono perorä ɨ̈vavira re;

opata ko peyeekɨuka peyemombo,

Asiria pereraja yave tembipɨɨrä.”

23Jaɨkue rupi jei ombojaanga reve mbae oasata vae, körai:

“¡Tataɨ! ¿Kia ra oimeñota oiko kuri Tumpa oyapo yave kuae mbaembae?

24Yogüeruta barco reta ɨguasu mbɨte Quitim jee vae kotɨ güi,

oiporaraukata Asiria pe jare Heber pe;

ërei jae reta opata vi ko okañɨtei jekuae avei pegua.”

25Javoi Balaam opüa jare ojo ye jëta kotɨ; jare Balac ojo ye vi.