PROVERBIOS 22 - Guarani Bible with DC

1Jërakua kavi vae ko ikavi yae ete, oikokatu yae vae güi,

jeta korepoti jare oro güɨnoi vae güi.

2Oikokatu vae jare paravete vae, oyovakeño ko;

opareve, yandeYa ko oyapo.

3Oyeandu katu reve oiko vae oecha ikavimbae yave, oñemi chugüi;

ërei yarakua ambae oasaño ojo jare oiporara.

4Ñañemomichi jare yaipoɨu yandeYa güi yave,

ñanoita mbaeyekou, mboromboete jare tekove katu.

5Ipɨapochɨ vae jape, mbaemboavai katuai;

ërei jekove re oyangareko vae, oyembosɨrɨ ko jókuae reta güi.

6Emboe kavi michia ndei güive voi,

jare yepe tëi indechi ma yave ngaraa opia chugüi.

7Oikokatu vae, oyemboiya paravete vae reta re,

ipía vae, opɨta ko ipía chupe vae jembiokuairä.

8Ikavimbae oyapo vae, ikavimbae rupi vi jekoviata chupe;

yandeYa omokañɨteita, ichikote arasɨ pegua pe.

9Japicha oiparareko vae, oikota mborerekua rupi,

paravete vae pe omboyao jembíu jeko pegua.

10Iporoyóyai yoyaise vae oyemombo yave, opa ñeraro,

mbaetɨ ma ñeapo jare ñeeasɨ katu.

11Mburuvicha guasu oaɨu ipɨa jupi rupi kavi oiko vae,

jare oyapo ivɨa-ïrurä jupi rupi kavi imiari vae.

12YandeYa oyangareko avei arakuaa re,

ërei jae güɨrokomegua oporombotavɨ vae reta iyemongeta.

13Iyakɨ vae jei: “Yaguapope oime oï ikatu pe; cheyukata ko tape rupi.”

14Ɨvɨkua kɨ̈pe yae vae rami ko, kuña iyaguasa pota vae iñee reta,

joko pe oata, yandeYa iyarasɨ ikotɨ vae.

15Arakuaambae oimeño mai kunumi ipɨa pe;

ërei yembosɨmbi ñenupa reve vae ombosɨrɨta ko chugüi.

16Oyemboikokatu vaerä paravete vae omombaravɨkɨasɨ katu

ani omee oikokatu vae pe vae, iparaveteta ko opɨta.

Treinta ñee reta arakuaa pegua

17Emboɨke ndeapɨsa eyeapɨsaka iyarakuaa vae reta iporomboarakuaa re;

eñono ndepɨa pe che romboarakuaa vae re.

18Echa ndemboyerovia yaeta ko, reñovatu yave ndeyeupe ndepɨa pe;

ara ñavo remboaɨkuere nemiari pɨpe yave.

19Reyeko vaerä yandeYa re, aikuaauka vi ndeve añave.

20Che aikuatía ndeve treinta yemboarakuaa,

jare arakuaa tuichagüe,

21ndemboe vaerä reikuaa kavi añetete vae,

reraja ye vaerä ñee reta añetete vae jókuae nemondo vae reta pe.

- 1 -

22Agüɨye mbae eñomi paravete vae güi paravete güiño,

agüɨye erekoasɨ katu mbɨatɨtɨ rupi oiko vae oporojäa vae reta jóvai,

23echa yandeYa oepɨta jókuae reta,

oiporaraukata, jókuae oiporarauka chupe vae reta pe.

- 2 -

24Agüɨye eyemoinge iyarasɨ katu vae ipɨte pe,

agüɨye eñemoïru iyarasɨ katu vae ndive;

25agüɨye vaerä reyemboe jeko re,

jare reyeitɨ jókuae teko pe.

- 3 -

26Agüɨye eyemoingeiño mbae pe,

jókuae oporomborɨ ipía vaerä vae rami,

27echa mbaetɨ renoi mbae pe remboepɨ vaerä yave,

nderupa ave ko opɨ̈ro retata ndegüi.

- 4 -

28Agüɨye erosɨrɨ ndeɨvɨ jembeɨ oyembojaangaño mai oï vae;

neñemuñagüe reta oñono arakae vae.- 5 -

29Iparavɨkɨ oyapo kavi vae,

oyeokuaita mburuvicha guasu pe,

mbaetɨta oparavɨkɨ oipotagüe pe.