2 REYES 13 - Guarani Bible with DC

Joacaz oiko mburuvicha guasurä Israel pe

1Joás, Ocozías taɨ veintitré año ma oiko mburuvicha guasurä Judá pe yave, Joacaz, Jehú taɨ omboɨpɨ oï mburuvicha guasurä ɨvɨ Israel re; oiko mburuvicha guasurä diecisiete año Samaria pe.

2Ërei oyapo ikavimbae yandeYa jesa róvai, echa omomoe Jeroboam, Nabat taɨ iyoa reta, Israel iñemuña reta pe oyapouka mbaeyoa vae güi, mbaetɨ oyembosɨrɨ jókuae mbaeyoa güi.

3Jare yandeYa iyarasɨ Israel kotɨ, omee Hazael mburuvicha guasu Siria pegua ipo pe jare Ben-adad, Hazael taɨ ipo pe ɨma año rupi.

4Jayave Joacaz oyerure yandeYa pe, jare yandeYa oendu chupe iyerure, echa omae Israel iñemuña reta ipɨatɨtɨ yae vae re, oecha kërai mburuvicha guasu Siria pegua oiporarauka yae Israel iñemuña pe reta vae.

5Javoi yandeYa oñono Israel pe metei kuimbae oporoepɨ vae, jökorai Israel iñemuña reta oasayepe Siriaɨgua reta güi; jare yogüɨreko pɨagüive ye jo reta rupi, tenonde rupi rami.

6Ërei ngatu mbaetɨ oyembosɨrɨ reta Jeroboam iñemuña reta mbaeyoa oyapogüe güi, Israel pe oyapouka mbaeyoa vae, echa jókuae omomoe reta; Asera iä oimeño Samaria pe.

7Echa jókuae kuimbae oporoepɨ vae ndei ou mbove, mburuvicha guasu Joacaz pe mbaetɨ ma jeta jembɨre sundaro, jaeño ma jembɨre chupe cincuenta kuimbae kavayu regua reta, payandepo käretou ñeraro pegua, jare diez mil kuimbae ɨvɨ rupigua, echa mburuvicha guasu Siria pegua opa oyuka, jare opa oeya ɨvɨkúi rami.

8Ïru mbaembae Joacaz regua, opaete oyapogüe, mbae tuichagüe oyapo vae regua oyekuatía oï tembikuatía pe, Israel pegua mburuvicha guasu reta regua oyekuatía oïa pe.

9Joacaz omano yave oñotɨ reta Samaria pe; taɨ Joás oguapɨ jekovia pe mburuvicha guasurä.

Joás oiko mburuvicha guasurä Israel pe

10Joás, Ocozías taɨ treinta y siete año ma oiko mburuvicha guasurä Judá pe yave, Joás, Joacaz taɨ omboɨpɨ oï mburuvicha guasurä ɨvɨ Israel re, jare oiko mburuvicha guasurä Samaria pe diecisei año.

11Jare oyapo ikavimbae yandeYa jesa róvai; mbaetɨ oyembosɨrɨ opaete Jeroboam, Nabat taɨ iyoa reta güi, Israel iñemuña reta pe oyapouka mbaeyoa vae güi, echa jókuae mbaeyoa omomoe.

12Ïru mbaembae Joás regua, opaete oyapogüe, jare kërai oñeraro Amasías, mburuvicha guasu Judá pegua ndive vae oyekuatía oï tembikuatía pe, Israel pegua mburuvicha guasu reta regua oyekuatía oïa pe.

13Joás omano yave oñotɨ reta Samaria pe, Israel pegua mburuvicha guasu reta oñeotɨa pe. Jeroboam oguapɨ jekovia pe mburuvicha guasurä.

Eliseo jae vaeño ma omoërakua vae jare imano

14Eliseo imbaerasɨ jeiete yae, omanota ma, jare Joás, mburuvicha guasu Israel pegua ojo omae jese, oäpiro jare oiküava, jei reve:

—¡Cheru! ¡Cheru! Nde reiko ɨvɨ Israel peguarä sundaro reta imbaepuere yae vae rami.

15Eliseo jei chupe:

—Eipɨɨ metei güɨrapa jare uvɨ reta.

Jare mburuvicha guasu oipɨɨ metei güɨrapa jare uvɨ reta.

16Jayave Eliseo jei chupe:

—Eyeapo kavi remondo vaerä metei uvɨ.

Jare mburuvicha guasu oyapo ramboeve jókuae, Eliseo oñono ipo mburuvicha guasu ipo re,

17jare jei chupe:

—Eipea ventana kuaraɨ oëa kotɨgua.

Jare mburuvicha guasu oipea, javoi Eliseo jei chupe:

—¡Añave emondo!

Jare mburuvicha guasu omondo uvɨ. Jayave Eliseo osapúkai:

—¡Uvɨ yandeYa oporoepɨ pɨpe vae! ¡Uvɨ oporoepɨ Siria pegua reta güi vae! ¡Nde remoamɨrita Siriaɨgua reta Afec pe, jare opata reyuka reta!

18Jaɨkue rupi jei ye mburuvicha guasu pe:

—Eipɨɨ uvɨ reta.

Mburuvicha guasu oipɨɨ ramboeve, Eliseo jei chupe:

—Añave eiporu ɨvɨ re.

Mburuvicha guasu oiporu ɨvɨ re mboapɨ ye, jare opɨta.

19Jayave Tumpa iñeemombeúa iyarasɨ ikotɨ, jare jei chupe:

—Uvɨ reiporu yave mona pandepo ani ova ye, remoamɨrita tëi Siria opaetei remokañɨtei regua; añave mboapɨ veseño remoamɨrita.

20Eliseo omano, jare oñotɨ reta. Jókuae año re Moab iñemuña reta oporepeña omaepɨ̈ro vaerä jókuae ɨvɨ pe, yogüeruñoi rami.

21Jese katu amogüe Israel iñemuña reta oñotɨta ñogüɨnoi metei tëogüe, oecha reta ñäpɨta yogüeru Moab pegua reta yave, oitɨ reta jókuae tëogüe Eliseo jɨvɨa pe; javoi jókuae tëogüe oa Eliseo ikägüegüe re yave rupive, oikove ye, jare opüa oyemboɨ.

22Hazael, mburuvicha guasu Siria pegua, oiporarauka Israel pegua reta pe, opaete ara Joacaz oiko ramboeve mburuvicha guasurä.

23Ërei ngatu yandeYa güɨnoi mboroparareko ikotɨ reta, jare morogüɨrökuavee päve oyapo Abraham, Isaac, jare Jacob ndive jeko pegua mbaetɨ omokañɨtei jare mbaetɨ omombo iyeugüi; jökorai añave rupi mbaetɨ omokañɨtei.

24Hazael, mburuvicha guasu Siria pegua omano yave; taɨ Ben-adad oguapɨ jekovia pe mburuvicha guasurä.

25Jayave Joás, Joacaz taɨ opɨ̈ro ye Ben-adad, Hazael taɨ güi tëta guasu reta ñeraro pe opɨ̈ro tu Joacaz güi vae. Joás omoamɨri mboapɨ ye Ben-adad, jare opɨ̈ro ye tëta guasu reta ɨvɨ Israel pegua.