JOSUÉ 21 - Guarani Bible with DC

Leví iñemuña reta imbaerä vae tëta guasu reta(1 Cr 6.54-81)

1-2Leví iñemuña juvicha reta yogüeru omomiari vaerä jëtara sacerdote Eleazar, Josué, Nun taɨ jare Israel iñemuña juvicha reta Silo pe ɨvɨ Canaán pe; jei reta körai: “Moisés rupi, yandeYa oporookuai oñemee vaerä oreve tëta guasu reta, roiko vaerä pɨpe, orerɨmba reta ikaruarä vae ndive.”Nm 35.1-8.

3Jayave Israel iñemuña reta omee iɨvɨ pegua tëta guasu reta mɨmba ikarúa ndive ndive Leví iñemuña reta imbaerä, yandeYa oporookuai rami.

4Leví iñemuña reta pe oñemee tëta guasu yave, oë suerte rupi Coat iñemuña reta pe, jae ko Aarón iñemuña pegua reta; oë chupe reta trece tëta guasu, Judá, Simeón jare Benjamɨ́n iñemuña reta iɨvɨ pe.

5Coat iñemuña ïru vae reta pe oë suerte rupi payandepo tëta guasu, Dan, Efraín jare Manasés iñemuña reta oyemboyaogüe iɨvɨ pe.

6Gersón iñemuña reta pe oë suerte rupi trece tëta guasu, Isacar, Aser, Neftalí jare Manasés iñemuña reta oyemboyaogüe iɨvɨ pe, Basán pe.

7Merari iñemuña reta, jëtara ñavo peguarä oë doce tëta guasu, Rubén, Gad jare Zabulón iñemuña reta iɨvɨ pe.

8Israel iñemuña reta omee suerte rupi Leví iñemuña reta pe tëta guasu reta, mɨmba ikaruarä ndive ndive, yandeYa oporookuai Moisés rupi rami.

9Judá jare Simeón iñemuña reta omee iɨvɨ pegua tëta guasu reta;

10kuae tëta guasu reta opɨta Aarón iñemuña reta pe; Aarón jae ko Coat jɨmɨmino, Leví iñemuña pegua; echa chupe reta räri oë suerte oyeapo yave.

11Judá iñemuña reta iɨvɨ pegua ɨvɨtɨ guasu re omee chupe reta tëta Quiriat-arba, jae ko Hebrón, jare iyɨ́vɨri güɨnoi mɨmba ikaruarä, jae ko tëta guasu tuicha yae vae, Anac kuimbae puku yae vae iñemuña reta imbaegüe.

12Ërei jókuae tëta guasu pegua ko reta jare tëta raɨ reta omee reta Caleb, Jefone taɨ pe.

13Jare sacerdote Aarón iñemuña reta pe omee reta tëta guasu Hebrón, mɨmba ikaruarä ndive, ñepɨ̈rokarä oporoyuka vae reta pe; omee reta vi tëta guasu reta: Libna,

14Jatir, Estemoa,

15Holón, Debir,

16Aín, Juta jare Bet-semes. Kuae chau tëta guasu reta mɨmba ikaruarä ndive ndive.

17Jare Benjamín iñemuña reta iɨvɨ pe oñemee chupe reta: Gabaón, Geba,

18Anatot jare Almón; irundɨ tëta guasu, mɨmba ikaruarä ndive ndive.

19Opaete tëta guasu sacerdote Aarón iñemuña reta imbaerä opɨta vae jae ko trece tëta guasu mɨmba ikaruarä ndive ndive.

20Coat, Leví taɨ iñemuña reta oataño vɨteri vae pe oñemee suerte rupi tëta guasu reta Efraín iñemuña reta iɨvɨ pe.

21Efraín iñemuña reta iɨvɨtɨ pe oñemee chupe reta tëta guasu Siquem mɨmba ikaruarä ndive, ñepɨ̈rokarä oporoyuka vae reta pe; oñemee vi chupe reta tëta guasu reta: Gezer,

22Kibsaim jare Bet-horón; irundɨ tëta guasu mɨmba ikaruarä ndive ndive.

23Dan iñemuña reta iɨvɨ pe oñemee chupe reta: Tëta Elteque, Gibetón,

24Ajalón jare Gat-rimón; irundɨ tëta guasu mɨmba ikaruarä ndive ndive.

25Jare Manasés iñemuña reta oyemboyaogüe iɨvɨ pe oñemee mókoi tëta guasu mɨmba ikaruarä ndive ndive, jae ko Taanac jare Gat-rimón.

26Opaete tëta guasu Coat iñemuña reta oataño vae reta imbaerä opɨta vae, jae ko payandepo tëta guasu mɨmba ikaruarä ndive ndive.

27Jare Gersón, Leví taɨ iñemuña reta pe oñemee Manasés iñemuña reta oyemboyaogüe iɨvɨ pe mókoi tëta guasu mɨmba ikaruarä ndive ndive; tëta guasu Golán ñepɨ̈rokarä oporoyuka vae reta pe, Basán pe oï vae; oñemee vi chupe reta tëta guasu reta: Beestera,

28jare Isacar iñemuña reta iɨvɨ pe oñemee chupe reta Cisón, Daberat,

29Jarmut jare En-ganim; irundɨ tëta guasu mɨmba ikaruarä ndive ndive.

30Aser iñemuña reta iɨvɨ pe oñemee chupe reta: Tëta Miseal, Abdón,

31Helcat jare Rehob; irundɨ tëta guasu mɨmba ikaruarä ndive ndive.

32Neftalí iñemuña reta iɨvɨ pe oñemee chupe reta mboapɨ tëta guasu mɨmba ikaruarä ndive ndive: Tëta guasu Cedes, Galilea pe oï vae, ñepɨ̈rokarä oporoyuka vae reta pe; omee reta vi Hamot-dor jare Cartán.

33Opaete tëta guasu reta, Gersón iñemuña reta jëtara ñavo rupi imbaerä opɨta vae jae ko trece tëta guasu mɨmba ikaruarä ndive ndive.

34Merari, Leví taɨ iñemuña reta pe mbaetɨño tëta guasu oñemee vae pe, omee reta Zabulón iñemuña reta iɨvɨ pe: Tëta Jocneam, tëta Carta,

35Dimna jare Naalal; irundɨ tëta guasu, mɨmba ikaruarä ndive ndive.

36Rubén iñemuña reta iɨvɨ pe oñemee chupe reta: Tëta Beser, Jahaza,

37Cademot jare Mefaat; irundɨ tëta guasu, mɨmba ikaruarä ndive ndive.

38Gad iñemuña reta iɨvɨ pe oñemee chupe reta tëta Ramot, Galaad pe oï vae, ñepɨ̈rokarä oporoyuka vae reta pe; omee reta vi tëta Mahanaim,

39Hesbón jare Jazer; irundɨ tëta guasu, mɨmba ikaruarä ndive ndive.

40Opaete tëta guasu reta Merari iñemuña reta, jëtara ñavo rupi imbaerä opɨta suerte rupi vae jae ko doce tëta guasu.

41Opaete tëta guasu Leví iñemuña reta imbaerä opɨta Israel iñemuña reta ipɨte vae, jae ko cuarenta y ocho tëta guasu, mɨmba ikaruarä ndive ndive.

42Jare kuae tëta guasu reta mbaetɨ köi ñogüɨnoi oyougüi, metei ñavo güɨnoi iyɨ́vɨri rupi mɨmba ikaruarä. Jökorai metei ñavo opaete kuae tëta guasu reta.

YandeYa jupi ko

43Körai yandeYa omee Israel iñemuña reta opaete kuae ɨvɨ, jae oñererökuavee jee re ae omee vaerä iñemuñagüe reta pe vae, oike reta opɨ̈ro jare yogüɨreko jókuae ɨvɨ pe.

44Jare yandeYa omee yogüɨreko pɨagüive vaerä jókuae ɨvɨ pe, jae oñererökuavee jee re ae Israel iñemuñagüe reta pe rami; jare opaete jovaicho reta güi mbaetɨ metei ave ipuere oñeraro jae reta ndive, echa yandeYa omee jae reta ipo pe opaete jovaicho reta.

45Mbaetɨ metei ave ñee oyeapombae, opaete ñee ikavigüe yandeYa jei Israel iñemuña reta pe vae, opaetei oyeapo.