JEREMÍAS 27 - Guarani Bible with DC

Yuvo reta re oyembojaanga vae

1Sedequías,2 R 24.18-20; 2 Cr 36.11-13; Jer 28.1. Josías taɨ irundɨa año ma oiko mburuvicha guasurä Judá pe yave, yandeYa jei Jeremías pe:

2“Eyapo ndeyeupe kuyunda jare metei yuvo, javoi eñono ndeayu re.

3Javoi emondo ñee mburuvicha guasu reta Edom, Moab, Amón, Tiro jare Sidón pegua reta pe, ñee jerajaa reta yogüeru Jerusalén pe opou mburuvicha guasu Sedequías pɨri vae ndive.

4Eyókuai jei reta vaerä juvicha reta pe, che peYa Imbaepuere yae ete vae, Israel iTumpa jae:

5Che chembaepuere pe ko ayapo ɨvɨ, kuimbae jare mɨmba reta ñogüɨnoi ɨvɨ iárambo vae, jare amee che aipota vae pe.

6Jare añave che amee opaete ɨvɨ cherembiokuai Nabucodonosor, mburuvicha guasu Babilonia pegua ipo pe, mɨmba ñana rupigua reta ave opa amee ipo pe.

7Opaete tëtaguasu reta oyeokuaita chupe, taɨ reta pe jare jɨmɨmino reta pe, ou regua oväe ara, jae iɨvɨ ma oyeokuai vaerä tëtaguasu reta jare mburuvicha guasu reta imbaepuere yae vae pe.

8Oime yave kia nunga vae tëtaguasu ani metei mborookuaía mbaetɨ oñemee Nabucodonosor ipo pe, che aiporaraukata chupe ñeraro rupi, karuai jare mbaerasɨ ovakatu vae rupi, opaete opɨta regua ipo pe. Che ndeYa ko jae kuae.

9Ërei ngatu pe reta agüɨye perovia jókuae ñeemombeúa reta jeigüe re, ani maratuta vae imombeúa re, ani mbaɨu re omombeu vae, ani susere re omombeu vae, ani imbaekuaa vae reta oporomboe jei reve, ngaraa peyeokuai mburuvicha guasu Babilonia pegua pe.

10Opaete jókuae jei reta peve vae pembotavɨ ko; che opata ko pogüɨrajauka peɨvɨ güi, opata pomoai moai jare pemanota.

11Ërei tëtaguasu oñemee mburuvicha guasu Nabucodonosor ipo pe vae, che amaeñota opɨta iɨvɨ pe, oikota pɨpe jare oparavɨkɨta. Che peYa ko jae kuae.”

12Che, Jeremías, opaete kuaekuae jae Sedequías mburuvicha guasu Judá pegua pe, jae chupe: “Peñemee mburuvicha guasu Babilonia pegua ipo pe jare jëtaɨgua reta pe, peyeokuai chupe reta jare peikoveta.

13¿Maera pa pemanota, nde jare nerëta pegua reta kɨsepuku pe ani karuai jare mbaerasɨ ovakatu vae rupi, yandeYa jei rami tëtaguasu mbaetɨ oñemee oyeokuai vaerä mburuvicha guasu Babilonia pe vae?

14Agüɨye peyapo jókuae ñeemombeúa reta pemboarakuaa vae, jei reve: ‘Ngaraa peyeokuai mburuvicha guasu Babilonia pegua pe.’ Echa omoërakua reta peve vae apu ko.

15YandeYa jei jae mbaetɨ ko ombou reta; omoërakuaiño ma yandeYa jee re. Jare jökorai yandeYa opata pemoai moai jare opata pemano, jökoraiño vi jókuae ñeemombeúa reta omoërakua kuaekuae vae.”

16Chemiari vi sacerdote reta pe jare opaete vae reta pe, jae chupe reta: “Körai jei yandeYa: ‘Agüɨye perovia jókuae ñeemombeúa reta jei peve, jarembaeño ko Babilonia güi oyereru yeta tembiporu reta yandeYa itupao pegua reta vae. Jókuae jei reta peve vae apu ko.

17¡Agüɨye peyapo jeigüe! Peñemee mburuvicha guasu Babilonia pegua ipo pe jare peikoveta. ¿Maera pa kuae tëta guasu opɨtata tëtagüerä?

18Añetete ko jae reta ñeemombeúa yave, jare añetete ko chemiari jae reta ndive yave, toyerure cheve reta che peYa imbaepuere yae ete vae pe, agüɨye vaerä oñemaeño oyereraja tembiporu reta Babilonia kotɨ, oimeño oï tupao pe vae, mburuvicha Judá pegua jëta pe vae jare Jerusalén pe oï vae.’

19-21Mburuvicha guasu Nabucodonosor güɨraja yave Babilonia kotɨ Jerusalén güi Jeconías,2 R 24.8-17; 2 Cr 36.9-10. Joacim taɨ, jae ko Judá pegua mburuvicha guasu, güɨraja vi opaete iyɨvɨrigua mburuvicha reta Judá pegua jare Jerusalén pegua ndive, ërei mbaetɨ güɨraja okɨta reta, ɨrɨru guasu, iguapɨka reta jare tembiporu reta oimeño opɨta tupao pe vae. YandeYa Imbaepuere yae ete vae, Israel iTumpa jei kuae tembiporu reta regua, opɨtaño tupao pe vae, jare mburuvicha guasu Judá pegua jo pe vae, jare Jerusalén pe vae re:

22‘Güɨraja retata Babilonia pe, jare joko pe opɨtata che aru ye regua kuae ɨvɨ pe. Che ndeYa ko jae kuae.’ ”