1Jókuae ara rupi mburuvicha guasu Ezequías imbaerasɨ pɨ̈chɨi yae, oyuka vaerä güɨnoi. Jare ñeemombeúa Isaías, Amoz taɨ ou ípɨri, jare jei chupe:
—YandeYa jei körai: “Emboarakuaa kavi neñemuña reta, echa remanota, mbaetɨta ma rekuera.”
2Jayave Ezequías oyerova ovapetea kotɨ jare oyerure Tumpa pe, körai:
3“Romoñera cheYa, nemaendúa vaerä jupi rupi jare añetete rupi ayeokuai ndeve vae re, jare ayapo ndepɨa jemimbotaño.” Jare oyaeo ipɨatɨtɨ yae reve.
4Jayave yandeYa jei Isaías pe
5ojo vaerä jei Ezequías pe: “Neñemuñagüe David iTumpa jei körai: ‘Aendu ndeyerure, aecha nderesaɨ. Ameeta ndeve quince año reiko ye vaerä.
6Roepɨta jare aroasayepeta Jerusalén mburuvicha guasu Asiria pegua ipo güi. Aepɨta kuae tëta guasu.’ ”
7Jayave Isaías jei chupe:
—Kuae rupi reikuaata añetete ko yandeYa ombopota jeigüe vae:
8Acaz iora pe, payandepo ma osɨrɨ tëi küaraɨa kuae ara vae omboɨpɨ pɨau yeta.
Jare jökorai jókuae payandepo ma osɨrɨ tëi küaraɨa jókuae ara vae, omboɨpɨ pɨau ye.
9Jare mburuvicha guasu Ezequías okuera ma imbaerasɨ yave, oikuatía kuae tairari:
10Che ayemongeta tëi körai:
Ndei chendechi mbove ou mano cheve,
aja vaerä omanogüe ñogüɨnoia pe, jekuae avei pegua.
11Che jae: Mbaetɨ yeta ma aecha cheYa,
mbaetɨ yeta ma aecha cheYa kuae ɨvɨ pe,
mbaetɨ yeta ma aecha kuae ɨvɨ pegua reta.
12Cherete opa oyemboai, o oyemboai rami,
metei vecha iyangarekoa jo oyemboai rami.
Ombaapo vae jembiapo opa ma yave oyasɨa rami,
mbaerasɨ oyasɨa cherekove metei ara pe.
13Chereroköe chemoäse mbaerasɨ,
yaguapope oakɨo chekägüe oï rami.
Ara pe jare pɨ̈tu yave oiporarauka cheve.
14Cheräse ärakua jare tapérai rami,
ani pɨkasu rami.
Cheköe amae ara kotɨ.
¡CheYa, aiporara aï, chemborɨ!
15¿Mbae pa jaeta oyapogüe re?
Omombeu cheve vae etei ko, oyapo cheve kuae.
Aiporara reve, tañemomichi taiko, aikove aiko ramboeve.
16Oikoveta opaete jókuae yandeYa oyangareko jese vae reta,
jae reta ndive aikoveta che.
Nde ko chembogüera ye,
remee aiko ye vaerä.
17Chepɨagüive kavi aiko pe ou
cheve mbɨatɨtɨ tuichagüe vae,
ërei nde reyemoambeko cherenoe vaerä mano güi,
echa neɨ̈ro cheve opaete cheyoa reta re.
18Tɨvɨa pe ñogüɨnoi vae reta mbaetɨ ko ipuere ndemboete,
omanogüe reta ndemboete rapeä ko,
tɨvɨa pe oñeñonogüe reta mbaetɨ ko ipuere oyeko nderé.
19Oikove vae retaño ko ipuere ndemboete,
che añave ayapo aï rami.
Kuimbae reta imiarita taɨ reta pe, nde jupi ko vae re.
20YandeYa ko cheangareko.
Yaikove yaiko ramboeve yambopu arpa jare yatairari
ara ñavo yandeYa jo pe.
21Echa Isaías oporookuai yepe oyeapaso vaerä ɨva jare oñeñono vaerä mburuvicha guasu ipere re, jare okuera vaerä.
22Jare Ezequías jei yepe Isaías pe:
—¿Mbae rupi pa aikuaata, akuerata ko vae aja vaerä tupao pe?
Who We AreWhat We EelieveWhat We Do
2025 by iamachristian.org,Inc All rights reserved.
