1 REYES 2 - Guarani Bible with DC

David oyókuai Salomón

1David pe güɨramoiño oväeta ara omano vaerä; jare jae oyókuai taɨ Salomón, jei reve:

2“Opaete ɨvɨ pegua yogüɨrajaa rupi che jaema vi ajata. Eñemoäta ngatu jare eyembokuimbae.

3Eyapo ndeYa Tumpa jeigüe, jae jemimbota jare iporookuai reta, mborookuai oyeapo vaerä vae eyapo oyekuatía oï rami, mborookuai reta Moisés oikuatiagüe, opaete mbaembae reyapogüe oë kavi vaerä ndeve, jare kerupi reoa rupi.

4Oyeapo vaerä yandeYa iñee oñererökuavee cheve yave jei vae, echa jei: “Nderaɨ reta oyapo yave cheremimbota, oiko reve jupi rupi cheróvai opaete ipɨa ndive jare opaete jekove ndive, ngaraa oata kuimbae neñemuña güi oguapɨ vaerä mborookuaía Israel pegua pe.”

5Añave reikuaa kavi ma Joab, Sarvia imembɨraɨe oyapo cheve vae, jae oyuka mókoi sundaro reta itenondegua ete Israel pegua: Abner,2 S 3.27. Ner taɨ, jare Amasa,2 S 20.10. Jeter taɨ, jae oyepɨ mbɨakatu iara pe, ñeraroa pe jeta omano vae re, chemboeko reve jókuae mano re.

6Jáeramo, kuae eyapo ndearakuaa reve kavi, agüɨye emaeño tindechi tomano.

7Ërei Barzilai, ɨvɨ Galaad2 S 17.27-29. pegua taɨ reta re emae kavi, emee tokaru reta ndépɨri, echa jae reta ko cheñomi atekuarai aiko nderɨkeɨ Absalón güi yave.

8Jare emae vi oime oï nde ndive Simei, Gera taɨ, jae ko Benjamín iñemuña reta pegua Bahurim pegua. Kuae reta oyepopeyu chekotɨ, jókuae ara aja aiko yave Mahanaim2 S 16.5-13. kotɨ. Ërei jae etei oë cherövaiti ɨ̈aka Jordán pe, jare che joko pe jae Tumpa jee re mbaetɨ vaerä ayuka.2 S 19.16-23.

9Ërei añave agüɨye neɨ̈ro chupe. Ndearakuaa katu ko, nde reikuaata mbae reyapo vaerä chupe. Ërei eeka kërai omanoasɨ katu vaerä.”

David imano(1 Cr 29.26-30)

10David omano, jare oñotɨ reta iñemuñagüe reta oñeotɨa pe, jëta guasu pe.

11David oiko cuarenta año mburuvicha guasurä Israel iñemuña reta re: Chiu año Hebrón pe, jare treinta y tres año Jerusalén pe.2 S 5.4-5; 1 Cr 3.4.

12Jare Salomón oguapɨ mburuvicha guasurä tu1 Cr 29.23. David jekovia pe, jare iporookuaía ikavi yae ete.

Adonías jare jupiegua reta imano

13Adonías, Haguit imembɨraɨe, ojo Betsabé, Salomón ichɨ pɨri. Betsabé oparandu chupe:

—¿Reyu pa ndepɨakatu reve?

Jare Adonías jei chupe:

—¡Jäa!

14Jare jei ye:

—Oime mbae jaeta ndeve.

Betsabé jei chupe:

—Ere cheve.

15Adonías jei:

—Nde reikuaa ko mborookuaía chembaerä tëi vae, jare opaete Israel iñemuña reta oäro che aguapɨ vaerä mburuvicha guasurä. Ërei oñemee chegüi cherɨvɨ pe, echa yandeYa rupi jae imbae ko.

16Añave jaeño aipota aiporu vae. Agüɨye eikuaku chegüi.

Jare Betsabé jei:

—Nemiari.

17Jae jei:

—Romoñera reiporu vaerä cheve mburuvicha guasu Salomón pe, omee vaerä cherembirekorä Abisag Sunem-ɨgua. Jae ngaraa jäkateɨ jese ndeve.

18Betsabé jei chupe:

—Tachemiari mburuvicha guasu pe ndeve kuae rere vae.

19Jökorai Betsabé ojo imiari vaerä mburuvicha guasu Salomón pe Adonías jei chupe vae re. Mburuvicha guasu opüa omboresive ichɨ jare itindɨ jóvai. Javoi ojo ye oguapɨ tenda mborookuai pegua pe, jare oyókuai tembiokuai reta güeru vaerä ichɨ pe tenda oguapɨ vaerä, jayave jae oguapɨ iyakatu kotɨ.

20Jare jei chupe:

—Aipota aiporu ndeve reyapo vaerä cheve ikavi vae. Romoñera agüɨye vaerä reikuaku.

Mburuvicha guasu jei chupe:

—Eiporuño reipota vae chesɨ, ngaraa cheräkateɨ jese ndeve.

21Jayave jae jei chupe:

—Emee Abisag Sunem-ɨgua nderɨkeɨ Adonías jembirekorä.

22Jayave mburuvicha guasu jei ichɨ pe:

—¿Maera pa reiporu Abisag Sunem-ɨgua, Adonías peguarä? ¡Michi oata reiporu vaerä mborookuaía oñemee vaerä chupe, echa jae ko cherɨkeɨ jare güɨnoi sacerdote Abiatar omborɨ vaerä jare Joab Sarvia imembɨraɨe!

23Jare mburuvicha guasu Salomón jei yandeYa jee re: “¡Tumpa täta toiporarauka cheve, echa Adonías jekove kotɨ aeño ko jei kuae ñee reta.

24Tumpa jee re, jae omee aguapɨ vaerä cheru iporookuaía pe vae, jare cheñono mburuvicharä cherëtara pe vae jee re, Adonías omanota añave voi!”

25Jayave mburuvicha guasu Salomón oyókuai Benaía, Joiada taɨ oyuka vaerä Adonías, jare jae ojo oyuka.

26Mburuvicha guasu jei sacerdote Abiatar pe: “¡Ekua Anatot kotɨ, ndeɨvɨ pe! Reyepapa ko remano vaerä, ërei ngaraa royuka añave, echa revoɨ yandeYa Tumpa ikäjou cheru David2 S 15.24. jenonde, jare reiporara jae oiporara rami.”1 S 22.20-23.

27Jökorai Salomón oekɨ Abiatar sacerdoterä oyeokuai Tumpa pe vae güi, jare jökorai oyembopo yandeYa jei Silo pe Elí1 S 2.27-36. iñemuña reta kotɨ vae.

28Joab oikuaa yave Adonías regua, otekuarai jare ojo oñepɨ̈ro tupao guakapi pegua kotɨ, jare oyepɨɨ mɨmba oyeyuka oyeapɨ jese vae regua guakarätiecha vae re, echa jae oñemoïru Adonías ndive, mbaetɨ omoïru Absalón.

29Ërei oikuaauka reta Salomón pe, Joab otekuarai tupao guakapi pegua kotɨ vae jare oñeñono mɨmba oyeyuka oyeapɨ jese vae iyɨpɨ pe. Jayave mburuvicha guasu omondo Benaía, Joiada taɨ, oyuka vaerä.

30Jare Benaía ojo tupao guakapi pegua pe jare jei Joab pe:

—Mburuvicha guasu jei reë vaerä kuae güi.

Ërei Joab jei:

—¡Ani! ¡Kuae pe tamano!

Benaía ojo ye jókuae ñee ndive mburuvicha guasu pɨri, jare omombeu chupe Joab iñee.

31Jayave mburuvicha guasu jei:

—Toyeapo jae jei rami. Eyuka jare eñotɨ, toyemboai cheru jëta güi jare chegüi, Joab oporoyuka jupimbae reve vae regua.

32YandeYa ko omboekovia chupe oporoyuka vae; echa oyuka mókoi kuimbae jekombae jare ikavi yae vae reta cheru David oikuaambae reve: Abner, Ner taɨ, sundaro reta itenondegua ete Israel pegua, jare Amasa, Jeter taɨ sundaro reta itenondegua ete Judá pegua.

33Kuae reta imano jekovia Joab pe, jökoraiño vi iñemuña reta pe jekuae avei rupi. Ërei David re, iñemuña reta re, jo re, jare iporookuaía re oimeta mbɨakatu jekuae avei rupi.

34Jayave Benaía ojo oyuka Joab. Jare oñotɨ reta jëta pe, ñuu pe.

35Jaɨkue rupi mburuvicha guasu oñono Benaía, Joiada taɨ sundaro reta juvicharä, jare sacerdoterä oñono Sadoc, Abiatar jekovia pe.

36Jaɨkue rupi mburuvicha guasu omondo oenɨi Simei, jare oyókuai jei reve:

—Emopüa o Jerusalén pe reiko vaerä pɨpe joko pe. Ërei agüɨye eë joko güi ketɨ yepe,

37echa reë jare reasa yave ɨ̈aka Cedrón, remanota jare nde aeño renoita teko ndeyeupe.

38Simei jei mburuvicha guasu pe:

—Ikavi, tayapo ndeporookuai mburuvicha guasu.

Jare Simei oiko ɨma Jerusalén pe.

39Ërei mboapɨ año oasa yave, Simei jembiokuai mókoi otekuarai chugüi, jare opa yogüɨraja Aquis pɨri, jae ko Maaca taɨ mburuvicha guasu Gat pegua. Jare omombeu reta Simei pe jókuae tembiokuai reta oime ñogüɨnoi Gat pe vae.

40Jayave Simei opüa jare oyokua imburika jare ojo Aquis pɨri Gat pe, oeka vaerä jembiokuai reta. Jökorai Simei ojo güeru ye jembiokuai reta.

41Kuae omombeu reta Salomón pe, Simei oë Jerusalén güi ojo Gat pe, jare oyerova ye ma vae.

42Jayave mburuvicha guasu omondo oenɨiuka Simei jare jei chupe:

—¿Reñererökuaveeä yera Tumpa jee re, jare amombeu voi ndeve jókuae ara reë ko yave Jerusalén güi remanota vae? ¿“Ikavi”, rereä yera cheve, jare “Ayapota rere vae”, rereä yera cheve?

43¿Maera pa reñererökuavee yandeYa pe vae mbaetɨ reyapo, jare mbaetɨ reyapo che jaegüe?

44Nde reikuaa kavi yae ikavimbae reyapo cheru David pe vae. Jáeramo yandeYa omee jókuae ikavimbae reyapo vae oyerova ndekotɨ.

45Ërei mburuvicha guasu Salomón oikota mborerekua rupi, David iporookuai oikota jekuae avei pegua yandeYa jóvai.

46Jayave mburuvicha guasu oyókuai Benaía, Joiada taɨ, jare jae ojo oyuka Simei. Jökorai Salomón iporookuaía jeiete oñemomɨ̈rata.