1Zofar Naamat pegua jei Job pe:
2Jeta yae nemiari vae, ¿mbaetɨta pa jekovia ndeve?
¿Kuimbae jeta yae imiari vae jeko pegua, oyembojupita pa?
3Neñee ngatu yae vae ¿oremokïriita pa?
Reyuvanga katu kia re,
ërei ¿ngaraa pa kia nemomaraiuka?
4Nde rere: “Cheporogüɨrovia isɨmbi ko,
che mbaetɨ ko chekɨa Tumpa jóvai.”
5Ërei, ¡Tumpa etei mona imiari,
jare omboyevɨ ndeve!
6Jare omombeu ndeve yaikuaa rapembae vae, arakuaa katu regua,
echa jókuae arakuaa katu oyapɨraa ye ko mbaeyekou reta jepɨ yae vae.
Jayave reikuaata Tumpa mbaetɨ ko
oiporarauka ndeve mbaeyoa reyapo rami etei.
7¿Reikuaata pa nde mbaembae yavai yae Tumpa regua vae?
¿Reikuaata pa, Imbaepuere yae ete vae kërai etei ko vae?
8Ɨvate yae ko ara güi, ngaraa mbae ndepuere reyapo;
kɨ̈pe yae ko omanogüe reta ñogüɨnoia güi, ngaraa ndepuere reikuaa.
9Ipɨguasugüe, ipɨguasu yae ko ɨvɨ güi,
jare oasa ipɨguasu, ɨguasu ipɨguasugüe güi.
10Tumpa oasa kuae rupi yave,
oporopɨɨ jare oporoenɨi morojäa pe yave,
¿kia pa ipuereta oyopia?
11Echa jae oikuaa kuimbae oporombotavɨ vae reta;
jökorai oecha vi mbaeyoa, ¿rerovia pa mbaetɨta mbae jei?
12Mburika ñana rupigua imembɨ jeko kavi yave,
kuimbae ipɨa pɨ̈chɨi vae yarakuaata.
13Nde reñono kavi yave ndepɨa;
jare ndepo remopüa reyerure chupe yave.
14Mbae nunga mbaeyoa renoi vae,
rembosɨrɨ yave ndeyeugüi;
jare mbaetɨ remaeño ndero pe oï jupimbae yave.
15Jayave nderova remopüata ikɨambae;
nepɨ̈ratata, jare ngaraa etei mbae güi rekɨɨye.
16Jare neakañɨta reiporaragüe güi,
neakañɨta chugüi ɨ oasagüe güi rami.
17Ndeara ikavi yeta, kuaraɨ jembipeasɨ yae ara mbɨte pe rami,
yepe tëi pɨtumimbi, ërei jembipe katuta ndeve köe-pota yave rami.
18Reyererovia katuta, echa oime neräro mbae ikavi vae,
remaeta ndeɨ́vɨri, jare reke pɨagüiveta.
19Reyapakua yave, ngaraa kia nemongɨɨye,
jeta yogüeruta oeka ndeve ndeporomborɨ vae.
20Ërei jeko pɨ̈chɨi vae reta, okañɨteita;
mbaetɨta ketɨ oväe reta oñepɨ̈ro vaerä,
jae reta jaeño ma oäro vae, jae ko mano.
Who We AreWhat We EelieveWhat We Do
2025 by iamachristian.org,Inc All rights reserved.
