JOSUÉ 2 - Guarani Bible with DC

Josué omondo oporopïaro vae reta Jericó kotɨ

1Josué, Nun taɨ omondo vɨari Sitim güi mókoi oporopïaro vae, jei reve chupe reta: “Pekua pemae ɨvɨ re jare tëta guasu Jericó re.”

Jayave jae reta opa yogüɨraja jare oike reta opɨta metei kuña iyaguasa pota vae, RahabHeb 11.31; Stg 2.25. jee vae jo pe.

2Ërei ïru vae oikuaauka mburuvicha guasu Jericó pegua pe, jei:

—Ko yogüeru kuae pɨ̈tu kuimbae reta, Israel iñemuña reta, omae vaerä kuae ɨvɨ re.

3Jayave mburuvicha guasu Jericó pegua omondo jeiuka Rahab pe:

—Enoe kuimbae reta yogüeru ndépɨri vae, ndero pe oike vae reta, echa yogüeru ko omae vaerä opaete kuae ɨvɨ re.

4Ërei kuña Rahab, opa yepe omoñemi jókuae mókoi kuimbae reta, jare jei:

—Yogüeru ko añete chépɨri kuimbae reta, ërei mbaetɨ aikuaa ketɨgua reta ko vae.

5Ërei pɨ̈tuta ma yave, oyeokendata ma öke yave, jókuae kuimbae reta opa oë yogüɨraja, jare mbaetɨ aikuaa ketɨ ra opa yogüɨraja vae; peaɨkuemoña voi jarembae, peupitɨta ko.

6Ërei jae omboyeupi reta yepe o iárambo, jare omoñemi joko pe lino oyeokua okua güɨnoi vae ipäu pe.

7Jare jókuae kuimbae reta yogüɨraja jaɨkue ɨ̈aka Jordán kotɨ tape ojo vae rupi, opa yogüɨraja oväe ɨ jembeɨ tɨpɨmbaea pe. Jare oyeokenda tëta guasu jöke oporoaɨkuemoña vae reta opa yogüɨraja güire.

8Jayave jókuae kuimbae oporopïaro vae reta ndei oke mbove, Rahab oyeupi jae reta ñogüɨnoia pe o iárambo, jare jei chupe reta:

9—Aikuaa peYa ko omee peve kuae ɨvɨ; echa opaete ore rokɨɨye yae pegüi. Opaete kuae tëta guasu pegua reta okɨɨye yae ko ñogüɨnoi pereko pegua.

10Echa roendu kërai peYa opa omondɨpa Ɨguasu Pɨ̈ta vae peasa vaeräEx 14.21. Egipto güi peë yave; jare kërai opa pemokañɨtei, jókuae mókoi mburuvicha guasu reta, Sehón jare Og,Nm 21.21-35. amorreo reta juvicha guasu, ɨ̈aka Jordán jovaicho kotɨ ñogüɨnoi vae reta.

11Kuae roendu ramboeve, opaetei rorɨrɨi rokɨɨye güi; mbaetɨ etei mɨ̈rata opɨta metei kuimbae re ave pereko pegua, echa peYa Tumpa, jae ko Tumpa ɨvate ara pe jare kuae ɨvɨ pe.

12Pomoñera añave, pere cheve peYa jee re, che anoi mboroparareko pekotɨ rami, jökorai penoi vi mboroparareko cheru jo pegua reta kotɨ, jáeramo añave pere cheve añetegüe rupi;

13kërai pemondoyepe vaerä cheru, chesɨ, chekɨvɨ reta, jare chepɨkɨɨ reta jekove, jare opaete imbae vae reta. ¡Orereroasayepe mano güi!

14Jae reta jei chupe:

—Pemano yave ore toromano vi, mbaetɨ yave reñeapo oreré kuae royu vae re; jare oreYa omee oreve kuri kuae ɨvɨ yave, ore royapota ndeve mboroparareko jare añetete vae.

15Jayave Rahab ombogüeyɨ reta ventana rupi metei tɨmasa pe; echa jae jo oï tëta guasu ikësea re, jae oiko jókuae tëta guasu ikësea re.

16Jare jei chupe reta:

—Pekua ɨvɨtɨ kotɨ, agüɨye vaerä peraɨkuemoña vae reta peväe chupe; jare peñemi joko pe mboapɨ ara rupi, jókuae peraɨkuemoña vae reta opa ye oyerova regua; javoi ramo pekua ye peyúa rupi.

17Jayave jae reta jei chupe:

—Ore toropɨta orerekombae kuae yemongeta royapo ndeve Tumpa jee re vae güi, nde rere oreve royapo vaerä ndeve vae güi.

18Ërei ore roike ma kuae ɨvɨ pe yave, nde eñapɨti kuae tɨmasa pɨ̈ta vae kuae ventana orembogüeyɨ jupi vae re; jare emboatɨ ndero pe nderu jare ndesɨ, ndekɨvɨ reta jare opaete nderu jëtara reta.

19Kia nunga vae oë yave ndero güi ikatu pe, jaeiño güɨnoita teko iyeupe imano re, jare ore ngaraa rogüɨnoi teko. Ërei ndero pe oï nde ndive vae re kia nunga vae oñono yave ipo, oreré toï teko.

20Ërei nde reñeapo yave oreré, ore ngaraa orereko kuae yemongeta royapo Tumpa jee re ndeve vae re.

21Jare Rahab jei:

—Toiko jökorai, pe pere rami.

Jayave Rahab opa omondo reta, jare opa yogüɨraja. Javoi jae oñapɨti jókuae tɨmasa pɨ̈ta vae ventana re.

22Jare yogüɨraja ɨvɨtɨ kotɨ, joko pe yogüɨreko mboapɨ ara rupi, oaɨkuemoña vae reta oyerova ye regua; jare oaɨkuemoña vae reta oeka tëi opaete tape rupi, ërei mbaetɨ oväe reta chupe.

23Jayave jókuae mókoi kuimbae reta oyerova jare ogüeyɨ reta ɨvɨtɨ güi, oasa reta ɨ̈aka, jare yogüeru reta ye Josué, Nun taɨ pɨri, imiari reta chupe opaete mbaembae oasa jae reta ndive vae re.

24Jei reta Josué pe: “YandeYa omee yandepo pe opaete kuae ɨvɨ. Opaete kuae ɨvɨ ipo reta ipɨtu ñogüɨnoi yanderenonde.”