1 CRÓNICAS 14 - Guarani Bible with DC

Hiram omondo jekovia pe kuimbae reta imiari vaerä David ndive(2 S 5.11-12)

1Hiram, mburuvicha guasu Tiro pegua, omondo jekovia pe kuimbae reta imiari vaerä David ndive, jare o iyapoa reta jare oikatu oparavɨkɨ ɨvɨra pe vae reta, güɨraja reve ɨvɨra ɨ̈vɨrare omopüa vaerä metei o chupe.

2Jayave David oikuaa Tumpa ko omee chupe oiko vaerä mburuvicha guasurä Israel iñemuña reta pe vae, echa oecha ikavi yae opaete iporookuaía jëta Israel pe.

David taɨ reta oa Jerusalén pe vae(2 S 5.13-16; 1 Cr 3.5-9)

3David güɨreko ye vi kuña reta Jerusalén pe, jare güɨnoi ye ïru taɨ reta jare tayɨ reta.

4Jerusalén pe oa chupe vae reta jae jee: Samúa, Sobab, Natán, Salomón,

5Ibhar, Elisúa, Elpelet,

6Noga, Nefeg, Jafía,

7Elisama, Beeliada jare Elifelet.

David omoamɨri filisteo reta(2 S 5.17-25)

8Filisteo reta oikuaa David oyeparavo mburuvicha guasurä Israel pe yave, yogüɨraja opaete oeka David; ërei David oikuaa yave kuae, oë chupe reta.

9Jayave yogüeru filisteo reta opa oñemoai ɨvɨtɨ päu ipe kavi vae rupi Refaim pe.

10Jayave David oparandu yandeYa pe, jei:

—¿Aëta pa añoraro filisteo reta ndive? ¿Remoamɨriuka retata pa cheve?

Jare yandeYa jei chupe:

—Eë chupe, echa ameeta ndepo pe, remoamɨri reta vaerä.

11Jayave yogüɨraja Baal-perazim kotɨ, joko pe David omoamɨri filisteo reta, jare jei: “Ɨ ipɨ̈rata vae rami Tumpa oipea cheve cherovaicho reta.” Jáeramo ombojee reta jókuae oñeraroa Baal-perazim.

12Jare filisteo reta opa omombo oeya itumpa-raanga reta, jare David opa oapɨuka.

13Ërei filisteo reta jekuae yogüeru ye ñogüɨnoi ɨvɨtɨ päu ipe kavi vae rupi Refaim pe.

14Jayave David jekuae oparandu ye Tumpa pe, jare Tumpa jei chupe:

—Agüɨye eporepeña jóvai kotɨ rupi jese reta, ekua ikupe kotɨ rupi chupe reta, ɨvɨra iyaɨsɨ vae reta jenda re katu eë chupe reta.

15Javoi reendu ɨvɨra reta jäka jɨapu vae yave, eë chupe reta, echa che ajata nderenonde amoamɨri vaerä sundaro filisteo reta.

16David oyapo Tumpa jei chupe rami, jare omoamɨri filisteo reta Gabaón güive Gezer pe.

17Jare David jërakua yae opaete ɨvɨ rupi; jare yandeYa omee opaete tëtaguasu reta okɨɨye yae vaerä David güi.