ÉXODO 9 - Guarani Bible with DC

Mɨmba reta imano

1Jayave yandeYa jei Moisés pe:

—Eike Faraón oïa pe jare ere chupe: “OreYa, hebreo reta iTumpa jei körai: ‘Emaeño toyogüɨraja tëta chembae oyeokuai vaerä cheve.

2Echa mbaetɨ remaeño yogüɨraja reta yave, jare jekuaeño remombɨta reta ye yave,

3aitɨta chembaepuere opaete nderɨmba ñana pe ñogüɨnoi vae re: Kavayu reta, mburika reta, camello reta, guaka reta jare vecha reta re ambouta mbaerasɨ pɨ̈chɨi yae ete vae.

4Jare che amboyaota Israel iñemuña reta jɨmba Egiptoɨgua reta jɨmba güi; jökorai mbaetɨta omano Israel iñemuña reta jɨmba.’ ”

5Jare yandeYa oñono iyemongeta oyapo vaerä, jei körai:

—Kuae ayapota pɨareve kuae ɨvɨ pe.

6Jare pɨareve pe yandeYa oyapo. Jare jeta omano mɨmba Egipto pegua; ërei Israel iñemuña reta jɨmba mbaetɨ metei ave omano.

7Jayave Faraón omondo omae vaerä Israel iñemuña reta jɨmba re, jare oecha reta mbaetɨ etei metei ave omano. Ërei Faraón ipɨa oñemotäta, jare mbaetɨ omaeño yogüɨraja Israel iñemuña reta.

Kuru mbaerasɨ

8YandeYa jei Moisés jare Aarón pe:

—Pepoagua penoe tanimbu horno güi, jare Moisés tomombo ara kotɨ Faraón jóvai;

9jare oyeapota ɨvɨtimborä oñemoaita opaete ɨvɨ Egipto rupi, jare ipire omojemɨita ipere reve kuimbae reta jare mɨmba reta, opaete tëta guasu Egipto pe.

10Javoi güɨnoe reta tanimbu horno güi jare yogüɨraja Faraón jóvai, jare Moisés omombo tanimbu ara kotɨ; jare oyekuaa kuru oporombopere vaeAp 16.2. kuimbae reta jare mɨmba reta re.

11Jare imbaekuaa vae reta mbaetɨ ipuere yogüeru oyovaicho Moisés kotɨ kuru jeko pegua, echa ikuru imbaekuaa vae reta jare opaete Egiptoɨgua reta.

12Ërei yandeYa omotäta Faraón ipɨa, jare mbaetɨ oendu jae reta iñee, yandeYa jei Moisés pe rami.

Amandau regua

13Jayave yandeYa jei Moisés pe:

—Epüa ekua ndeimbove ere Faraón pe: “Körai jei cheYa, hebreo reta iTumpa: ‘Emaeño toyogüɨraja tëta chembae, chemboete vaerä;

14echa añave opaete mbaerasɨ reta amondota nderé, nderembiokuai reta re, nerëta pegua reta re, reikuaa vaerä mbaetɨ ye ïru Tumpa che rami opaete kuae ɨvɨ pe vae.

15Echa, añave ambouta ndeve, reiporara vaerä jare nerëta pegua reta re, metei mbaerasɨ pɨ̈chɨi vae jare rekañɨteita ɨvɨ güi;

16che, añetete roñono aechauka vaerä nderé chembaepuere, oñemoërakua vaerä cheree opaete ɨvɨ rupi.Ro 9.17.

17Körai reve jekuaeñoi nde reyembopɨapochɨ tëta chembae kotɨ, mbaetɨ remaeño yogüɨraja reta.

18Mase, pɨareve koyave ambouta yavaetegüe amandau, Egipto arakae oikoɨpɨ ramo güive añave rupi mbaetɨi oime kuae nunga vae.

19Añave, emondo emboatɨuka nderɨmba reta jo rupi jare opaete ñana rupi renoi vae; echa opaete kuimbae ani mɨmba ikatu rupi ñogüɨnoi vae mbaetɨ oñeñono o japɨpe vae reta, amandau oa jese yave opata omano.’ ”

20Faraón jembiokuai reta, yandeYa jei vae güi okɨɨye vae opa güeru jo rupi jembiokuai reta jare jɨmba reta;

21ërei, yandeYa iñee mbaetɨ güɨrovia vae reta, oeyaño ñana rupi jembiokuai reta jare jɨmba reta.

22YandeYa jei Moisés pe:

—Emopüa ndepo ara kotɨ oa vaerä amandau opaete ɨvɨ Egipto pe, kuimbae reta re jare mɨmba reta re jare opaete ñana reta re ɨvɨ Egipto pe.

23Jare Moisés güɨropövee ipopoka ara kotɨ, jayave yandeYa ombojɨapu ara jare ombou amandau, jare ama-tiriri yavaetegüe oa ɨvɨ re; jökorai yandeYa oitɨ amandau ɨvɨ Egipto pe.

24Jökorai oa jeta yae amandau, ama-tiririAp 8.7; 16.21. ndive vae; mbaetɨi oa jókuae nunga opaetei ɨvɨ Egipto re arakae oikoɨpɨ güive.

25Jókuae amandau opaetei güɨrokomegua ɨvɨ Egipto; opaete ñana rupi ñogüɨnoi vae reta, oyuka kuimbae reta jare mɨmba reta; jaeramiño vi opa güɨrokomegua ñana reta, jare opa oakɨo ɨvɨra reta jäka opaete ɨvɨ Egipto rupi.

26Jaeño ete ɨvɨ Gosén pe, Israel iñemuña reta yogüɨrekoa pe mbaetɨ oa amandau.

27Jayave Faraón omondo oenɨiuka Moisés jare Aarón, jare jei chupe:

—Añave cheyoa aipo, peYa jupi ko; che jare cherëtaɨgua reta oreyoa vae reta ko.

28Peyerure peYa pe kuae ararɨapu jare amandau osondo vaerä, jare che amaeñota ma peo, jare ngaraa ye ma omombɨta.

29Jare Moisés jei chupe:

—Kuae tëta güi aë ñoete aupita chepo ayerure oreYa kotɨ, jare ararɨapu jare amandau osondo vaerä; reikuaa vaerä oreYa ko jae ɨvɨ iya vae.

30Ërei che aikuaa ko nde jare nderembiokuai reta ndeiño pekɨɨye oreYa Tumpa güi vae.

31Lino jare cebada opaetei oikomegua, echa cebada jäɨ tëi ma oï jare lino iɨ tëi ma oï.

32Ërei trigo jare centeno mbaetɨ opa oikomegua, echa jeñɨi raivimbae reta ko.

33Moisés oë Faraón jóvai güi ñoete, tëta guasu güi ikatu pe yave omopüa ipo, jare oyerure yandeYa pe, jare osondo ararɨapu jare amandau, jare mbaetɨ ye okɨ ɨvɨ iárambo.

34Jare Faraón oecha ma osondo ama, amandau jare ararɨapu yave, ipɨayemboete reve iyoa, jare jae omotäta ipɨa jare jembiokuai reta.

35Faraón ipɨa oñemotäta, jare mbaetɨ omaeño yogüɨraja Israel iñemuña reta, yandeYa jei Moisés rupi rami.