1YandeYa jae ko cherekove jare chereroasayepe vae,
¿kia güi pa akɨɨyeta?
YandeYa jae ko cheñepɨ̈roa,
¿kia güi pa akɨɨyeta?
2Jeko kavimbae vae reta,
chembopɨatɨtɨ vae reta jare cherovaicho reta oyomboatɨ chemokañɨtei vaerä yave,
mbaetɨ ipuere reta jare opa ogüɨapi.
3Yepe tëi jeta vae sundaro oporepeña cheré,
ngaraa akɨɨye,
yepe tëi oñemopüa oñeraro vaerä chekotɨ reta,
aï pɨagüiveñota.
4Metei mbae aiporu yandeYa pe,
jaeño kuae aipota vae:
Aï vaerä yandeYa itupao pe, opaete ara aikove aiko ramboeve,
amae vaerä yandeYa ipöra re,
amboete vaerä itupao pe.
5Echa jae cheomita itupao guakapi pegua pe,
ou yave ara ikavimbae vae.
Jae jëta oñono tee vae pe cheomita.
¡Ɨvate cheñonota ita guasu re!
6Javoi chemopüata cherovaicho oyere cheré vae reta re,
jayave ameeta mɨmba oyeyukagüe itupao guakapi pegua pe,
jare ayerovia reve atairarita, mbaemboete yandeYa pe.
7Eyeapɨsaka cheré cheYa Tumpa,
asapúkai ndeve vae re;
¡cheparareko! ¡Eendu cheyerure!
8Nde rere cheve: “¡Chereeka!”
Jare che roeka cheYa Tumpa.
9¡Agüɨye eyerova chegüi!
¡Agüɨye chereröɨro ndearasɨ reve!
¡Ndeño ko jae chemborɨ vae!
Agüɨye ekua chegüi, agüɨye chereeya,
cheTumpa chereroasayepe vae.
10Yepe tëi cheru jare chesɨ opa chereeya,
ërei nde cheYa cheangarekota ko.
11CheYa, chemboe nderemimbota re,
chereroata teko ikavi vae rupi,
cherovaicho reta jeko pegua.
12Agüɨye chemee cherovaicho reta ipɨa jemimbota pe,
echa oñemopüa chekotɨ añetembae imiari vae, ipɨa-pïrimbae.
13Ipuere ayembopɨtu,
mbaetɨ yave arovia aecha vaerä yandeYa ipɨakavi,
kuae ɨvɨ pe oikove aiko ramboeve.
14¡Eäro yandeYa re!
¡Eñemomɨ̈rata, eñemoäta ngatu!
¡Eyeko yandeYa re!
Who We AreWhat We EelieveWhat We Do
2025 by iamachristian.org,Inc All rights reserved.
