JUDIT 2 - Guarani Bible with DC

Nabucodonosor omondo Holofernes kuaraɨ oikea kotɨ öi vae tëta reta pe

1Año dieciocho pe tenondegua yasɨ pe veintidó ara ma oasa yave iyarasɨ oï jëta pe Nabucodonosor, Asiria ruvicha guasu, kërai oyepɨ vaerä opaete ɨvɨ ipo reta re, jae mburuvicha guasu iñee omee rami.

2Omondo oekauka opaete imborɨa jare ïru mburuvicha raɨ raɨ, jare oikuaauka chupe reta oyemongeta oiko vae opaetei vaerä omokañɨtei tëta guasu reta.

3Jare opa metei rami opɨta reta opa vaerä omokañɨtei opaete mburuvicha jei vae mbaetɨ oyapo vae reta.

4Jare mburuvicha guasu Nabucodonosor opa ma iyemongeta omombeu chupe reta yave, oekauka Holofernes, jae ko sundaro ruvicha tenondegua ete vae, jae ko mburuvicha tuicha vae mburuvicha guasu jaɨkuegua vae, jare jae jei chupe:

5“Che, jae mburuvicha guasu tuicha vae jare opaete ɨvɨ iya, añave amee mbaepuere ndeve, reo kuae güi rupive, emboatɨ ndeyeupe ciento veinte mil kuimbae jëiagüe vae reta, jare doce mil kavayu regua reta,

6jare ekua kuaraɨ oikea kotɨ oï vae tëta reta kotɨ, echa che jae vae mbaetɨ oyapo reta.

7Ere chupe reta topa toñeñono ndepo pe, echa täta chearasɨ aï jare ajata chupe reta. Arajata chesundaro reta pe opaetei amboi yave jókuae ɨvɨ jare topa mbae topɨ̈ro chugüi reta.

8Jeta rupi omano retata, tɨnɨeta ɨvɨtɨ päu; ɨupa jare ɨ oguatagüe reta opata tëogüe tɨnɨe jare oasa yeta.

9Aipɨɨta jeta rupi jare opata araja añono matɨ ɨvɨ jugua rupi.

10Jayave, ekua tenonde, jare che cheree re ekua eï jókuae ɨvɨ pe. Jare opoko oñeñono reta ndepo pe yave, joko peño enoi cheve echa che ajata chupe reta.

11Jare agüɨye eiparareko emae ñäteɨ nde reregüe oyapo vae re. Eyukauka voi jare oipota ketɨ ojo yave tojo köraiño.

12¡Jae Tumpa jee re jare cherekove re jare chembaepuere re, kuae jae aï vae che etei ayapo vaerä!

13¡Agüɨye toyeapombae kuae jae aï ndeve vae; eyapo cheve jae aï ndeve rami, jare jarembae pegua!”

14Jare Holofernes oë ojo mburuvicha jëta güi rupive, oenɨi omboatɨ opaetei sundaro ruvicha reta, Asiria pegua,

15jare opoko oiparavo sundaro mburuvicha guasu jei chupe rami: ciento veinte mil ɨvɨ rupigua reta vae jare doce mil kavayu regua juvɨ reve vae reta,

16jare opa omboyupavo reta ñoraro pe.

17Joko güi oipɨɨ ye jeta camello reta, mburika jare mburika guasu reta voɨta jerajaarä, jare jeta vecha reta, guaka jare kavara güɨraja reta jou vaerä,

18jare jeta yeyé ïru tembíu reta jeta rupi metei pegua ñavo jare oñono kavi reta vi oro jare korepoti jeta rupi.

19Jare oë oguata Holofernes, opaete isundaro reta ndive, oyembotenonde ojo mburuvicha guasu Nabucodonosor güi ojo vaerä oï jókuae ɨvɨ reta kuaraɨ oikea kotɨ oï vae reta rupi ikäretou reta ndive jare isundaro kavayu regua reta jare ïru sundaro ɨvɨ rupigua oiparavogüe reta ndive.

20Jaema jeta yeyé jei vae ko yogüɨraja tuku nunga ani ramo ɨvɨkuitï rami, yandepuere rapeä opa yaipapa.

Holofernes iñemopüa

21Oë reta Nínive güi jare mboapɨ ara oguata reta Bectilet ñuu kotɨ. Jare Bectilet güi opa ye ojo, opa ye ojo opɨta Cilicia güi ɨvɨtu guasu kotɨ ɨvɨtɨ oï vae igüɨ pe.

22Joko güi Holofernes ojo yoapɨ ye isundaro ɨvɨ rupigua reta ndive, kavayu regua reta ndive jare ikäretou reve reve vae reta ndive, ɨvɨtɨ ɨvate vae kotɨ.

23Oasa reta Fud jare Lud rupi, jare opaetei mbae omboai reta güɨraja jare opa mbae opɨ̈ro Rasís pegua reta güi jare ismaelita reta, Queleón güi arayevɨ kotɨ ñuu jembeɨ rupi yogüɨreko vae reta güi.

24Oasa Éufrates ɨ̈aka, jare ojo Mesopotamia rupi opa omboai reta opaete tëta tuicha vae reta oï Abrona ɨ̈aka iyɨ́vɨri vae, jare ojo oväe ɨguasu pe.

25Opɨ̈ro Cilicia pegua reta iɨvɨ jare opa omoamɨri oñemopüa tëi chupe vae reta. Yogüɨraja oväe Jafet ɨvɨ pe, arayevɨ kotɨ, jae ko Arabia jóvai.

26Opa oikëse madianita reta, jare opa jeyupa oapɨ chugüi reta jare opa jɨmba opɨ̈ro chugüi reta.

27Joko güi ogüeyɨ reta Damasco ñuu kotɨ trigo iyepoo iara pe ma, opa ye joko pe oapɨ reta mbae, omboendagüe vecha reta jare guaka reta, opoko reta tëta tuicha vae reta re, omboendagüe mbae japerä rupi oïgüe jare opa kɨse pe oyuka kunumi reta.

28Kɨɨye tätagüe vae ou oväe Sidón pe, jare Tiro iyɨ́vɨri yogüɨreko vae reta pe, jare Ocina güi arayevɨ kotɨ yogüɨreko vae reta pe, jaeramiño vi Jabniaɨgua reta, jare Asdod pegua reta jare Ascalón pegua reta.