1Alejandro Macedonia pegua, Filipo taɨ, ojo jëta güi jare omoamɨri Darío, jae ko Persia jare Media pegua reta juvicha guasu, joko güi oguapɨ jae jendagüe pe; tenonde ete oiko Grecia juvicha guasurä.
2Oyapo jeta ñoraro, oyemboiya tëta guasu reta jëguambae vae re, oyuka mbovɨ katu jokuaeɨgua mburuvicha reta,
3ojo oväe ɨvɨ iyapɨ rupi jare opavusu jeta tëta guasu reta re. Joko güi, opaete ɨvɨ opɨta kïrii ngatu jae ipogüɨ pe, jaema Alejandro iyaguara jare oyembotuicha opɨta.
4Opa ma omboatɨ yave metei ejército jëia yae vae, oñono ipogüɨ pe provincia, tëta guasu jare tuvicha reta, joko güi omboepɨuka chupe reta tributo.
5Ërei güɨramoiño imbaerasɨ; jare oyandu ma yave omanota,
6oenɨi isundaro ruvicha tuichagüe reta, jae itaɨrusu pe iyemboe ïru reta, jare ndei omano mbove omboyao yao chupe reta iɨvɨ.
7Doce año ma oiko yave mburuvicharä, Alejandro omano.
8Joko güi isundaro ruvicha reta oyembojuvicha, iɨvɨ ñavo rupi,
9jaema Alejandro imano jaɨkue rupi oguapɨ reta mburuvicha guasurä, jae reta jaɨkue pe iñemuñagüe reta jökorai vi, ɨma año rupi körai yogüɨreko, jökorai omonɨe reta jókuae ɨvɨ maemegua pe.
Antíoco IV Epífanes. Oike itumpa ambuae vae reta jeko Israel pe(2 Mac 4.7-17)10Jókuae japo reta güi, oyepota jekopochɨ vae Antíoco Epífanes, mburuvicha guasu Antíoco taɨ, jae ko oiko tembipɨɨ rami Roma pe jare omboɨpɨ oiko mburuvicharä ciento treinta y siete año ma griego reta oporookuai güive.
11Jókuae ara reta rupi oyekuaa Israel pe jeko ae güɨröɨro vae reta, jeta oporombotavɨ körai: “Yayapo ñomoïru tëta guasu yandeɨpɨ rupigua reta ndive, echa yasɨrɨ chugüi reta güive ma ou jeta maemegua yanderupi.”
12Amogüe reta pe ipöra kuae,
13jare opa yogüɨraja reta mburuvicha guasu pɨri, jare jae omee chupe reta ñee oiko vaerä teko ambuae rupi,
14omopüa reta metei yuvanga renda Jerusalén pe, itumpa ambuae vae reta jeko rami;
15oyeasɨa pɨau ye reta oñomi vaerä oñemokañɨmaagüe, jökorai güɨröɨro reta ñomoïru ikɨambae vae; oñemoïru itumpa ambuae vae reta ndive jare oñemee pɨ̈chɨi vae oyapo vaerä.
Antíoco opoko tupao Jerusalén pegua re(2 Mac 5.11-20)16Oecha ma yave Antíoco iɨvɨ ipɨ̈rata yae oï, oyemboiya Egipto re oiko vaerä mókoi tëta juvicharä.
17Jare jökorai, oike Egipto pe ejército tuichagüe ndive, guataka reta, elefante reta yepe matɨ ñapɨta,
18jare opoko mburuvicha guasu Tolomeo re, ërei jae oñemoata chugüi jare osɨi oeya reve jeta omano vae joko pe.
19Antíoco opɨ̈ro Egipto pegua tëta guasu jëguambae vae pe jare opa omokañɨtei jókuae tëta.
20Omoamɨri ma yave Egipto, año ciento cuarenta y tres pe, Antíoco oguata ejército tuicha vae ndive Israel kotɨ, ojo oväe Jerusalén pe.
21Oyembotuicha reve oike mbaemboetea renda pe jare opoko mɨmba oyeyuka oyeapɨ jese vae oro pegua re, mechero jenda re,
22mesa mbɨyape ikɨambae vae reta jenda, kopa reta re, tasa reta re, kuchara guasu reta oro pegua, mbae iñovaa jare äka-regua reta yepe, jare opaetei omondoro tupao jova iñovaa oro pegua.
23Oyemboiya vi korepoti re, oro re, tembiporu jepɨ vae re, jare mbaeyekou oñeomi oï vae reta, oväe vi chupe.
24Opaete mbaembae reta ndive ojo jëta kotɨ. Oporoyuka mbatee vi joko pe jare ojäa oeya ñee pɨ̈chɨigüe vae.
25Opaetei Israel pe oiko mbɨatɨtɨ tuicha vae;
26tuvicha jare ndechi reta ojäa ñee tembiporara pegua,
kuñatai jare kunumi reta opa ipɨ̈rata ogüe chugüi,
ipöra veä ma vi kuña reta.
27Omenda ramo vae reta jäse mbɨatɨtɨ pegua pe,
omenda pota vae reta oechauka mbɨatɨtɨ, oguapɨ jo rupi.
28Opaetei ɨvɨ ombopɨakaviä
oecha yave jokuaeɨgua reta oikogüe;
opaetei Jacob jëta oa ñemomarai pe.
Jerusalén iyemboai(2 Mac 5.21-26)29Mókoi año ma oasa yave, mburuvicha guasu omondo metei oparavɨkɨ chupe vae, okovara vaerä impuesto re opaete tëta reta Judea rupigua pe, kuae ojo oväe Jerusalén pe metei ejército tuicha vae ndive;
30tavɨ rupi oike imiari reta chupe vɨakatu re ramo, jae reta güɨrovia. Ërei güɨramoi peguaño opüa jókuae tëta re, täta rupi voi okua jese ramo, oyuka jeta Israel-ɨgua reta,
31opa ma yave tëta re opavusu, oapɨ jare omboai o reta jare ikësea.
32Ikuimbae reta güɨraja jembiaurä kuña jare michia reta, jare oyemboiya mɨmba reta re.
33David jëtaguasu iyɨ́vɨri rupi omopüa reta oguambɨ tuicha jare tïɨgüe vae, o ɨvate reta jëguambae vae, jare joko pe omopüa reta metei tëta mí.
34Pɨpe oñono itumpa ambuae vae ipɨapochɨ vae reta jare judío jeko ae güɨröɨro vae reta, joko pe opa oñemomɨ̈rata reta.
35Omboatɨ reta tembiporu ñoraro pegua jare tembíu, jare oñovatu reta joko pe imondaapo Jerusalén pe omanarogüe. Joko güi opoko reta oporopïaro.
36Oiko ñemopïri mbaemboetea renda peguarä
jare yemomburu tuichagüe Israel peguarä.
37Opɨyere reta jekombae vae jugüɨ
mbaemboetea renda iyɨ́vɨri rupi, jare omomaraiuka reta.
38Jókuae güi okɨɨye ramo opa otekuarai Jerusalén ipo reta;
tëta guasu opɨta tëta ambuaeɨgua reta jorä,
taɨ reta ave yogüɨreko tëta ambuaeɨgua rami joko pe
jare jáeramo oeya reta.
39Tupao oyemboai jare ipombae opɨta,
arete reta opa oyeapo mbɨatɨtɨrä,
ara mbutuu reta ñemomarairäño ma,
tëta jee ɨvate vae añave oyeapo yuvangatarä.
40Tenonde yave ɨvate rupi jërakua rami,
jökorai vi tuicha oñemomichiuka.
Iyembotuicha vae oyepoepɨ chupe mbɨatɨtɨrä.
Oyereroike mborogüɨrovia mbuae reta(2 Mac 6.1-11)41Mburuvicha guasu omoërakua jayave opaete iɨvɨ rupi metei mborookuai oyapouka vaerä opaete vae pe metei ramiño yogüɨreko vaerä,
42metei metei ñavo oeya vaerä jeko ae. Opaetei ïru tëta guasu reta oyapo mburuvicha guasu jeigüe,
43jare jeta Israel-ɨgua reta ave oipɨɨ mburuvicha guasu iporogüɨrovia, güɨrökuavee reta mbaeyuka tumpa-raanga reta pe jare omongɨa reta ara mbutuu.
44Ñee imombeúa reta rupi, mburuvicha guasu omondo jembikuatía Jerusalén jare ïru tëta reta Judea pegua pe oyeapo vaerä teko ambuae jókuae ɨvɨ pe
45jare oyopia reta chugüi agüɨye vaerä ombaeyuka, ombaerapɨ jare omee mbota mbaemboetea renda pe, ara mbutuu omongɨauka vaerä, jaeramiño vi arete reta,
46mbaemboetea renda yepe jare opaete mbae ikɨambae vae;
47oyapouka reta mɨmba oyeyuka oyeapɨ jese vae, tupao guasu jare tupao raɨ ñavo rupi oyemboete vaerä tumpa-raanga, jare oyuka vaerä joko pe kuchi jare ïru mɨmba ikɨa vae reta,
48agüɨye vaerä vi omokañɨmaa michia reta oyemongɨa vaerä oipotagüe mbae ikɨagüe pe jare yemboetembae pe,
49iñakañɨ vaerä mborookuai güi jare oipoepɨ mborookuai guasu reta jeigüe.
50Kia mbaetɨ yave oyapo mburuvicha jeigüe, jaema etei omanota.
51Kuae mborookuai oyekuatía ojo opaete iɨvɨ rupi; jare vi, mburuvicha guasu ombojee jókuae tëta rupi omaeta vae reta, jare omee ñee tëta guasu reta Judea pegua ñavo rupi oyeapo vaerä mbaeyuka.
52Jeta judío reta, opia mborookuai güi, oyapo reta kuae ñee jeigüe; jekopochɨ reve kuae oyapo reta ramo
53opa Israel-ɨgua ete reta omoñemiuka oipotagüe ñepɨ̈roa rupi.
54Payandepo pandepo Quisleu yasɨ pe año ciento cuarenta y cinco pe, mburuvicha guasu oyapo oyeapo rapembae vae, echa omopüa mɨmba oyeyuka oyeapɨ jese vae raanga mɨmba oyeyuka oyeapɨ jese vae ete mbaerapɨa iárambo. Jökoraiño vi omopüa reta mɨmba oyeyuka oyeapɨ jese vae ïru tëta reta Judea pegua rupi.
55O reta jöke ñavo jare ikatu rupi oapɨ reta incienso.
56Omboai jare oapɨ reta tembikuatía mborookuai oyekuatía oï pɨpe vae,
57jare kia oväe reta yave chupe tembikuatía Tumpa ndive ñemoïru pegua ndive, ani ramo kia oyapo yave mborookuai guasu jeigüe, jaema etei oyuka reta, mburuvicha jei rami.
58Jökorai, ñäteɨ reve, oyapouka ipɨapotaambae vae Israel-ɨgua reta pe tëta ñavo rupi.
59Yasɨ ñavo veinticinco ara pe güɨrökuavee reta mɨmba oyeyuka oyeapɨ jese vae raanga iárambo mbaeyuka mɨmba oyeyuka oyeapɨ jese vae mbaerapɨa renda ete oïa re.
60Tembikuatía jei rami, kuña reta omokañɨmaauka imembɨ vae, oyuka reta
61imembɨ iyayu re ovoɨ reve, oyuka reta vi jëtara reta jare oporomokañɨmaa vae reta.
62Ërei ngatu, jeseve jeta Israel-ɨgua reta oyembokuimbae jare oñemomɨ̈rata agüɨye vaerä jou tembíu reta ikɨa vae.
63Jae reta oiparavo mano agüɨye vaerä oyemongɨa jókuae tembíu pe jare opia ñemoïru ikɨambae vae güi; jare jáeramo, omano reta.
64Ikavimbae vae maemegua ou Israel rupi.
Who We AreWhat We EelieveWhat We Do
2025 by iamachristian.org,Inc All rights reserved.
