1 REYES 4 - Guarani Bible with DC

Salomón oporookuai

1Salomón oiko mburuvicha guasurä Israel iñemuña reta pe.

2Jare imborɨa mburuvicha reta jae kuae: Azarías, sacerdote Sadoc taɨ;

3Elihoref jare Ahías, Sisa taɨ reta, jae ko ombaekuatía vae reta; Josafat, Ahilud taɨ jae ko mburuvicha guasu pe ombaekuatía vae;

4Benaía, Joiada taɨ, jae ko sundaro ruvicha; Sadoc jare Abiatar, jae ko sacerdote reta;

5Azarías, Natán taɨ jae ko ɨvɨ ruvicha reta itenondegua; Zabud, sacerdote Natán taɨ, jae ko mburuvicha guasu omboarakuaa vae;

6Ahisar, jae ko mburuvicha imbaembae re oyangareko vae; jare Adoniram, Abda taɨ jae ko mburuvicha peguarä okovara vae.

7Salomón güɨnoi doce ɨvɨ ruvicha opaete Israel pe, kuae reta iparavɨkɨ jae ko omeeuka vaerä mburuvicha guasu pe opaete mbaembae jare jo pegua reta pe. Metei ñavo chugüi reta omeeta metei yasɨ kavi año pe.

8Jókuae ɨvɨ ruvicha reta jae kuae:

Hur taɨ oï mburuvicharä ɨvɨtɨ reta Efraín re;

9Decar taɨ oï mburuvicharä tëta Macaz, Saalbim, Bet-semes, Elón jare Bet-hanán re;

10Hesed taɨ oï mburuvicharä Arubot, Soco jare opaete ɨvɨ Hefer re;

11Abinadab taɨ oï mburuvicharä opaete ɨvɨ Dor re; jembireko jae Tafat, Salomón tayɨ;

12Baana, Ahilud taɨ oï mburuvicharä Taanac, Meguido jare opaete Bet-seán, Saretán iyɨpɨ peño güɨnoi vae, Jezreel güi ɨ́vɨkotɨ, Bet-seán güive Abel-mehola kotɨ, Jocmeam kutɨ;

13Geber taɨ oï mburuvicharä Ramot pe ɨvɨ Galaad pe, güɨnoi vi ipo pe tëta raɨ reta Galaad pegua, Jair, Manasés taɨ imbae reta, jare vi ɨvɨ Argob, Basán pe oï vae, sesenta tëta guasu reta oïa pe, oñekëse kavi jare jöke reta jiero iyu vae pegua katuai;

14Ahinadab, Iddo taɨ oï mburuvicharä tëta guasu Mahanaim pe;

15Ahimaas, oï mburuvicharä Neftalí iñemuña reta iɨvɨ pe; jókuae omenda Basemat ndive vae, jae ko Salomón tayɨ,

16Baana, Husai taɨ oï mburuvicharä Aser iñemuña reta iɨvɨ pe jare Alot pe:

17Josafat, Parúa taɨ oï mburuvicharä Isacar iñemuña reta iɨvɨ pe;

18Simei, Ela taɨ oï mburuvicharä Benjamín iñemuña reta iɨvɨ pe;

19Geber, Uri taɨ oï mburuvicharä ɨvɨ Galaad pe, Sehón amorreo reta juvicha guasu jare Og, Basán pegua mburuvicha guasu iɨvɨ pe.

Jae ko metei ɨvɨ ruvicha opaete pegua ɨvɨ re.

Salomón iyarakuaa katu jare oikokatu

20Ɨvɨ Judá jare ɨvɨ Israel pegua reta jeta yae ko, ɨguasu jembeɨ pe jeta ɨvɨkuitï oï rami. Mbaetɨ oata tembíu jare iɨguarä, oyerovia katu yogüɨreko.

21Jare Salomón güɨnoi mbaepuere opaete ïru mburuvicha guasu reta re, ɨ̈aka Éufrates güive filisteo reta iɨvɨ kotɨ, jare ɨvɨ EgiptoGn 15.18; 2 Cr 9.26. jembeɨ kotɨ oya regua; güeru reta imbaemboepɨ, jare Salomón jeia re yogüɨreko, opaete ara rupi jae oikove oiko ramboeve.

22Jare Salomón peguarä ara ñavo vae ko jae, seis mil seisciento litro trigokúi ipɨuasɨ vae, trece mil dosciento litro trigokúi,

23payandepo güeye ikɨra vae, veinte güeye oyemongɨra kapii pe vae, jare cien vecha; oyepapambae reve guasukaka, guasu jare guasu pɨ̈ta, uru ikɨra vae reta,

24echa Salomón güɨnoi vi mbaepuere Éufrates güi kuaraɨ oikea kotɨgua ɨvɨ re, Tifsa güive Gaza pe, jare opaete joko pegua mburuvicha reta re, jare oime mbɨakatu opaete ɨvɨ iyɨ́vɨri rupigua reta ndive.

25Salomón oikove oiko ramboeve, Judá jare Israel pe yogüɨreko vae reta, jare Dan güive Beerseba pe, metei vae ñavo yogüɨreko pɨagüive iuva jembo igüɨ rupi jare iɨva igüɨ rupi.

26Salomón güɨnoi cuatro mil kavayu reta jókai reta rupi ikäretou peguarä, jare doce mil sundaro kavayu regua reta.1 R 10.26; 2 Cr 1.14; 9.25.

27Jókuae ɨvɨ ruvicha reta metei ñavo güeru mbaembae mburuvicha guasu Salomón pe, jare jo pe okaru vae reta peguarä, metei yasɨ etei omboatambae reve chupe reta.

28Jókuae yasɨ vi güeruruka reta cebada jare kapii kavayu reta peguarä, jare kavayu käretou omoata vae reta peguarä.

29Jare Tumpa omee arakuaa katu Salomón pe oikuaa yae vaerä jeta mbaembae, ɨguasu jembeɨ pe jeta ɨvɨkuitï oï rami.

30Iyarakuaa tuicha yae opaete kuaraɨ oëa kotɨgua reta güi jare Egiptoɨgua reta güi.

31Yarakuaa yae ete opaete kuimbae reta güi: Oyapɨraa Etán, Zera iñemuña jare Hemán, Calcol jare Darda, Mahol taɨ reta. Jërakua yae opaete tëtaguasu iyɨ́vɨri rupigua reta rupi.

32Oyapo tres mil ñee arakuaa katu pegua jare mil cinco tairari reta.Pr 1.1; 10.1; 25.1; Cnt 1.1.

33Imiari vi ɨvɨra reta re jare ñana re, ɨ̈vɨrare Líbano pegua güive ñana ovapetea regua re; imiari vi mɨmba reta re, güɨra reta re, ipɨtía re oguata vae reta re jare jevae ɨ rupigua reta re.

34Jare Salomón iyarakuaa katu oendu reta vaerä yogüeru opaete tëta ñavo kotɨ güi, opaete mburuvicha guasu reta ñogüɨnoia ñavo kotɨ güi, iyarakuaa katu jërakua ojo oväea kotɨ güi.