ISAÍAS 33 - Guarani Bible with DC

YandeYa güeruta yereroasayepe

1¡Ndeparavete, nde remaepɨ̈ro avei vae, ërei mbaetɨ kia omaepɨ̈ro ndegüi!

¡Reyapo ikavimbae, ërei mbaetɨ kia oyapo ikavimbae ndeve!

¡Opa remaepɨ̈ro yave, oñepɨ̈rota vi mbae ndegüi,

opa reyapo ikavimbae yave, oyeapota vi ikavimbae ndeve!

2OreYa, oreparareko,

ndereño ko royeko.

Oremborɨ ndeimbove ñavo,

jare eiko oreve orereroasayepe vaerä oime mbaesusere yave.

3Neñeeäta yave, opaete vae reta opa otekuarai,

repüa yave tëtaguasu reta opa oñemoai moai;

4jovaicho reta tuku jeta vae rami

oporepeña jese reta,

opaetei imbaeyekou oitɨvɨro chugüi reta,

taso okaru vae rami.

5YandeYa ko tuicha vae, echa ara pe oiko;

jae ko opa omotɨnɨe Sión isɨmbi vae pe jare mbaejupi pe,

6jare omeeta oiko pɨagüive vaerä.

Arakuaa katu jare mbaembae yaikuaa katu vae ko oporogüɨroasayepe vae;

yandeYa güi yaipoɨu vae ko, mbaembae jepɨ yae vae rami.

7¡Mase, kërai jäseta tëta guasu ikatu pe,

omondo imiari jekovia pe vae reta,

yogüɨraja mbɨakatu oyapo vaerä vae reta täta oyaeota!

8Tape reta opa oñererokomegua,

mbaetɨ kia oguata jupi vae,

mbaetɨ mboromboete morogüɨrökuavee päve oyeapogüe re,

güɨröɨro reta,

mbaetɨ mboromboete kia peguarä ave.

9Ɨvɨ imbaerasɨ jare ipɨatɨtɨ oï,

Líbano oñemomarai jare opa yɨpi oï,

ɨvɨtɨ päu ipe kavi vae Sarón ipombae opɨta oï,

ɨvɨ Basán jare ɨvɨtɨ Carmelo opaetei oyetɨvɨro opɨta.

10YandeYa jei:

“Añave apüata;

añave aechaukata chembaepuere tuicha yae vae.

11Peyemongeta reta jare perembiapo reta kapii jare ɨtɨ rami ko;

chepɨ̈túe opata omokañɨtei, tata opa oporomokañɨtei rami.

12Tëta reta opata opɨta tanimburä,

ñurati opa oyeasɨa oyeapɨ vae rami opata ókai.

13Matɨ rupi peï vae reta, peyeapɨsaka ayapogüe re,

jare pe köi peï vae reta, pemae chembaepuere re.”

14Sión pegua iyoa vae reta, orɨrɨi okɨɨye güi,

jare jovayoyavi vae reta, okɨɨye jare jei reta:

“¿Kia pa yandegüi ipuere oiko tata oporombokañɨtei vae pe?

¿Kia pa yandegüi ipuere oiko tata ogüembaea pe?”

15Jupi rupi oiko vae jare jupi rupi imiari vae,

güɨröɨro yemboikokatu maepɨ̈ro rupi vae,

mbaetɨ omomora mbae oyemboepɨ vɨari vae,

mbaetɨ oyeapɨsaka yemongeta ikavimbae pegua vae re vae,

jare mbaetɨ omae ipɨa pe ikavimbae re vae;

16jókuae nunga ko oiko pɨagüive aveita,

iñepɨ̈roka ɨ̈vavira katuai vae ramita,

ngaraa oata chupe tembíu jare ɨ.

17Jekuae reecha yeta Mburuvicha guasu

iyemboetea ikavi yae vae;

jare reechata kuae ɨvɨ ipɨguasu yae ko vae.

18Nemaendúa kɨɨye rupi reikose vae re yave, rereta:

“¿Mbaetɨ ma mbae jepɨgüe oipapase vae,

mbaetɨ ma mbae jepɨgüe ojäa yepi vae,

mbaetɨ ma oipapase yepi maeka ɨvate vae reta vae?”

19Ngaraa ma reiko yarakuaambae reta ipɨte pe,

tëta ñee ambuaeyee vae reta ndive,

ñee yaikuaa rapembae jare yavai yae vae.

20Pemae Sión re, tëta guasu yandearete mbaemboete pegua jenda re;

pemae Jerusalén re, tëta guasu oiko pɨagüive vae re,

tëta guasu ngaraai oyererosɨrɨ o guakapi pegua rami vae,

ietaka ave ngaraa oyeekɨ ani iïcha ave ngaraa oso.

21Joko pe yandeYa oïta yandeveguarä imbaepuere yae reve,

ɨ̈aka ipɨguasu vae oime joko pe ramita,

ërei ngaraa oporepeña jokoropi tovaicho reta,

ibarco pe ani ibarco tuicha yae vae pe ave.

22Echa yandeYa ko jae oporojäa vae yandevegua,

jae ko omee yandeve mborookuai vae,

jae ko yandeRuvicha guasu,

jae etei ko yandereepɨta.

23Jókuae barco reta iguataka iɨ iïcha opa okúe,

ngaraa ma ikavi omoata kavi vaerä.

Oñepɨ̈rota opa oyemboyao yao jeta mbaembae tovaicho reta güi,

oguatambae reta ave oiketa güɨnoe mbaembae.

24Sión pegua reta ngaraa ma jei:

“Chembaerasɨ aï.”

Tumpa iñɨ̈rota opaete iyoa re chupe reta.